Muyundij Allpapi gobiernopaj trabajajcunaca paicunallapi yuyashpa beneficiarishcamantaca achca llaquicunami tiyashca. a Por ejemplo, COVID-19 ungüi tiyan punllacunapica gobiernopaj trabajajcunataca, “chai ungüihuan chꞌimbapurangapaj cullquita japishpami paicunalla beneficiarishcacuna” nishpami juchachircacuna. Chaimi achca gentecunaca jambicuna mana tiyashcamanta chai ungüihuan sufrishpa huañurcacuna.

 Corrupción tiyashcamantami gentecunaca achca llaquicunata charincuna. Reino Unido llajtamanta ex-primer ministro David Cameronca: “Corrupcionca araña rurashca jatun tela shinami can. Chaipica tucui gobiernocuna japirishca layami saquirin” nircami.

 Shinapish tucui gobiernocunapaj corrupcionca tucuchishcami canga. ¿Imamantataj seguros canchij? Yaya Dios imata rurasha nishcata ricushun.

 Bibliapica: “Ñuca Jehová Diosca, cashcata ruranatami munani. Shuhuacunatapish, mana cashcata rurajcunatapish pꞌiñanimi” ninmi b (Isaías 61:8, La Biblia. Traducción del Nuevo Mundo, NWT). Corrupcionmanta shujtajcunata llaquichishcataca Yaya Diosca tucuitami ricun (Proverbios 14:31). Yaya Diosca: ‘Huajchacunata llaquichishcamantaca, ñucami shayarigrini’ ninmi (Salmo 12:5).

 ¿Diosca imatataj ruranga? Gobiernocunata cambiashpa churanapaj randica paipaj propio Gobiernotami mandachun churanga. Chai Gobiernoca jahua pachapimi can. Chaitaca ꞌDiospaj Gobiernoꞌ nishpami rijsinchij (Marcos 1:14, 15; Mateo 6:10). Bibliapica: ‘Jahua pacha Taita Diosca nunca pi mana chingachina mandanata churanga. Shujtaj mandanacunataca tucuitami ñutushpa chingachinga. Paica manataj chingaringachu’ ninmi (Daniel 2:44). Chashnami Yaya Diosca corrupciontaca tucuchinga.

 Diospaj Gobiernopica corrupcionca mana tiyangachu. ¿Chaitaca ima shinataj yachanchij? Caicunapi yuyai:

1.  1. Diospaj Gobiernopaj poderpi yuyai. Diospaj Gobiernoca mandana podertaca Diosmantami chasquin (Apocalipsis 11:15).

    ¿Chaica imamantataj importante can? Cai Allpapi gobiernocunaca mandangapajca gentecunapaj cullquitami minishtin. Chashnami cai gobiernocunaca camarita japina, shuhuana oportunidadta charincuna. Shinallataj shujtajcunataca paicuna munashcata rurachunmi obligancuna. Pero Diospaj Gobiernopica tucui poderta charij Jehová Diosmi ayudanga. Chaimantami gentecunamanca tucui minishtirishcacunata cunga (Salmo 145:16).

2.  2. Diospaj Gobiernopaj mandajpi yuyai. Diosca Jesustami paipaj Gobiernopi mandachun agllashca (Daniel 7:13, 14).

    ¿Chaica imamantataj importante can? Huaquincuna alli mandanata munajpipish shujtajcunaca mana allicunata rurachunmi pandachi tucun (Eclesiastés 7:20). Pero Jesusca pipish paita mana pandachi tucushcatami ricuchishca (Mateo 4:8-11). Ashtahuancarin Jesusca imata rurashpapish gentecunata cꞌuyashcamantami chaita ruran (Salmo 72:12-14).

3.  3. Diospaj Gobiernopaj leycunapi yuyai. Diospaj Gobiernopi churashca leycunaca allicunallami can. Chai leycunata cazujcunaca cushillami causancuna (Salmo 19:7, 8).

    ¿Chaica imamantataj importante can? Gobiernocuna churashca leycunata pajtachinaca sinchimi can. Chaimantami gentecunaca corrupcionpi urmancuna. Pero Dios churashca leycunataca jahuallami pajtachi tucunchij. Chaicunaca ñucanchij allipajllatajmi can (Isaías 48:17, 18). Cai leycunaca gentecuna allita rurachunllaca mana rurashcacunachu can. Ashtahuanpish chaicunata shungumanta pajtachichunmi rurashcacuna can (Mateo 22:37, 39). Jehová Diosca ñucanchij shungupi ima tiyashcata tucuitami yachan. Chaimantami ñucanchijcuna ima shina cashcata ricushpa pai cushca leycunata pajtachichun ayudan (Jeremías 17:10).

 Bibliapica corrupcionca ña mana tiyangachu ninmi. Caimanta ashtahuan yachachunmi animanchij.

•   “El Reino de Dios, un gobierno sin corrupción” nishca temata españolpi ricui. Cai yachaica Diospaj Gobiernopi corrupción mana tiyanata tucui shunguhuan crichunmi ayudanga.

•   Shinallataj Diospaj Gobiernomanta, cai Gobierno Allpapipish imata ruranamanta yachangapajca ¿Diospaj Mandanaca imataj can? nishca videota ricui.

•   Ashtahuanpish Bibliamanta ima shina yachai tucunata ricui. Chaipimi Bibliapaj promesacuna ima shina canta ayudanata yachangui.