Julio de 2022 huatapica muyundij Allpapica achca gentecunata disparashpami huañuchishcacuna.

•   “Japón llajtapi armacunata utilizangapajca sinchi leycunami tiyan. Chai llajtapi mana tanto violencia tiyajpipish shuj rijsishca ex primer ministro runatami disparashpa huañuchircacuna. Cai runaca Shinzo Abe shutimi carca. Cai runata huañuchishcata yachaj chayashpaca chai llajtapi causajcuna, mundo enteropi causaj gentecunapish mancharishcami saquirircacuna” (10 de julio de 2022, The Japan Times).

•   “Dinamarca llajtapi causaj gentecunaca Copenhague llajtapi saquirij shuj centro comercialpi shuj runa paipaj pistolahuan quimsa gentecunata huañuchishcata uyashpaca achcatami mancharircacuna” (4 julio de 2022, Reuters).

•   “Sudafricamanta Soweto llajtapi saquirij shuj cꞌatuna ucupica shuj runaca paipaj pistolahuanmi 15 gentecunata huañuchirca” (10 de julio de 2022, The Guardian).

•   “Estados Unidos llajtapica 4 de julio nishca fiestami tiyan. Cai fiestapica 220 yalli gentecunami huañurca. Cai gentecunataca millai gentecunaca pistolahuan disparashpami huañuchircacuna” (5 de julio de 2022, CBS News).

 ¿Shuj punllaca cashna laya llaquicunaca tucuringachu? ¿Bibliaca caimantaca imatataj nin?

 Bibliaca ‘tucuri punllacunapi’ pꞌiña millai gentecuna tiyana cashcatami huillarca (2 Timoteo 3:1, 3). Cunan tiempopica cashna laya gentecunaca ñami tiyan. Chaimantami gentecuna mancharishpa causancuna (Lucas 21:11). Bibliapica gentecunaca “ima llaqui mana tiyan llajtapimi causangacuna. Pi mana cuyuchipaj llajtapi caj huasicunapimi causangacuna” ninmi (Isaías 32:18). ¿Llaquicunaca ima shinashi tucuringa?

 Diosca millai gentecunata, tucui armacunatapishmi tucuchinga

•   Proverbios 2:22-pica: “Ashtahuanpish Diosta mana manchajcunaca, cai llajtamanta llujshichishpa cachashcami canga” ninmi.

•   Salmo 46:9-pica: ‘Diosca tucui cai pacha macanacuicunata tucuchijmi. Paica arcocunatapish pꞌaquijmi. Lanzacunatapish ñutujmi. Macanacuna carrocunatapish rupachijmi’ ninmi.

 Diosca gentecuna sumaj causaita charichun yachachishpaca tucui llaquicunatami tucuchinga

•   Isaías 11:9-pica: “Chai punllapica ñucapajlla urcupica, ima millaita mana rurangachu. Imata mana llaquichingachu. Mama cucha yacuhuan junda caj shinami tucui cai pachaca Mandaj Diosta rijsishcahuan junda canga” ninmi.

•   Diosca llaquichij gentecunahuan ama chagrurichun, armacunata ama utilizachunmi yachachicun. Chashnami ñucanchij espadacunata tacashpa azadonta ruracuj shina rurashcanchij. Lanzacunatapish hocesta ruraj shinami rurashcanchij (Miqueas 4:3).

 Bibliapi nishca shinaca cai Allpapica manchai illaj causaitami charishun. Caimanta ashtahuan yachasha nishpaca “¿Es posible librarse del miedo?” nishca temata yachai.

 Llaquicuna ima shina tucurinata ashtahuan yachasha nishpaca “¡Por fin paz en la Tierra!” nishcata temata yachai.