Mundo enteropica achca llajtacunami politicocunamanta chꞌicanyarishca cancuna. 2022 huatapica Centro de Investigación Pew nishcaca 19 llajtacunapi causaj gentecunatami chꞌican chꞌican politicocunata apoyanamanta imata yuyashcata tapurcacuna. 65% gentecunaca politicocunata apoyashcamanta sinchi llaquicuna paicunapaj llajtapi tiyashcatami nirca.

 ¿Politicamanta ashtahuan gentecuna chꞌicanyarishcataca cambaj causan lugarpi ricushcanguichu? ¿Imamantataj chꞌicanyaricuncuna? ¿Cai llaquitaca pi allichi tucungachu? Caimanta Biblia ima yachachishcata ricui.

 Bibliaca ‘tucuri punllacunapi’ gentecuna paicunapaj yuyaicunamanta, ruraicunamanta mana tandalla trabajai tucushcatami huillan.

•    ‘Tucuri punllacunapica mana ahuantaipaj sinchi, llaqui punllacunami shamunga. Chai punllacunapica gentecunaca paicunallatajmi cꞌuyaringacuna, alli tucunatapish mana munangacunachu’ (2 Timoteo 3:1-3).

 Gentecuna, gobiernocuna problemacunata allichingapaj tandalla trabajanata munashpapish chꞌican chꞌican yuyaicunata charishcamantami mana chaita pajtachi tucushcacuna. Tucui caicunata ricushpaca Biblia tucui verdadta huillashcatami ricunchij.

•    “Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” (Eclesiastés 8:9).

 Shinapish Bibliaca cai tiempopi gentecunata sufrichij problemacunata shuj mandaj ñalla tucuchinatami huillan.

 Bibliapica shuj alli mandajmantami parlan. Paica Jesusmi can. Paica poderta, autoridadta, tucuicunata ayudana munaita charishcamantami sumaj causaita apamunga.

•    “Paipaj punllacunapica cashcata ruranacunallami sisanga. Sumaj causaillami yallitaj tiyanga” (Salmo 72:7).

•    “Tucui llajtacunami paipajta rurangacuna” (Salmo 72:11).

 Jesusca alli mandajmi can. Paica tucui gentecunamantami preocuparin. Maltratashca gentecunatapish ashtahuanmi ayudasha nin.

•    “Huajchacuna caparijpica, paimi quishpichinga. Llaquilla caj pi ayudaj illajlla cajtapish paimi ayudanga. Huajchataca llaquingami. Imata mana charijtaca llaquingami. Huajchacunapaj causaitaca quishpichingami. Paicunapaj causaitaca umashca canamanta, llaquichij shitashca canamanta quishpichingami” (Salmo 72:12-14).

 Jesusca Diospaj Gobiernopimi mandanga. Cai Gobiernomanta ashtahuan yachai. Jesús mandacujpi tiyagrishca bendicioncunata chasquingapaj, cai Gobiernota apoyashcata ricuchingapajca imata rurana cashcata ricui.

•    ¿Diospaj Mandanaca imataj can? nishca videota ricui.

•    “El Reino de Dios: un gobierno sin corrupción” nishca temata liyi.