Terroristacuna llaquichijpica cai tapuicunatami rurarinchij: “¿Yaya Dios tucui caicunata ricushpaca ñucanchijmanta preocuparinchu? ¿Imamantataj cashna llaquicunaca tiyan? ¿Terrorismoca a tucuringachu? ¿Terrorismomanta mana tanto sustaringapajca imatataj rurai tucuni?”. Cai tapuicunataca Bibliami cutichin.

 Yaya Diosca shujtajcunata llaquichijcunata, terroristacunataca pꞌiñanmi (Salmo 11:5; Proverbios 6:16, 17). Jesusca paipaj Yaya ima shina yuyashcatami ricuchirca. Chaimantami paita catijcuna shujtajcunata llaquichisha nicujpi corregirca (Mateo 26:50-52). Maijancunaca, Diospaj shutipimi caita ruranchij nishpami achcacunata llaquichincuna. Pero Yaya Diosca paicuna rurashcacunataca mana chasquinchu. Ashtahuanpish paicunapaj mañashcata mana uyanchu (Isaías 1:15).

 Jehová Diosca llaquita apajcunamanta, terrorismomanta sufricuj gentecunamantami achcata preocuparin (Salmo 31:7; 1 Pedro 5:7). Chaimantami Yaya Diosca millai ruraicunata tucuchinga (Isaías 60:18).

 Bibliapica imamanta terrorismo tiyashcatami huillan. Eclesiastés 8:9-pica: “Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” ninmi. Tucui cai tiempopica autoridadta charijcunaca shujtaj gentecunatami llaquichishcacuna. Cai gentecunaca chashna llaquita apashcamantami paicunapish tigra llaquichisha nishpa terrorista tucushcacuna (Eclesiastés 7:7).

 Jehová Diosca millai ruraicunata tucuchishpami sumaj causaita callarichinga. Chaipimi gentecunaca imata mana manchashpa causangacuna (Isaías 32:18; Miqueas 4:3, 4). Taita Diosca caicunatami ruranga:

•   Terrorismotaca huiñaipajmi tucuchinga. Jehová Diosca cai Allpapi tiyaj gobiernocunata tucuchishpami paipaj Gobiernota churanga. Jesucristo chai Gobiernopi mandacushpaca llaquichijcunata tucuchishpami tucuicunata igual tratanga (Salmo 72:2, 14). Tucui caicuna pajtarijpica ni pi terrorista tucushpa shujtajcunata llaquichingachu. Ashtahuanpish tucuicunami ‘yallitaj sumaj causaipi cushicungacuna’ (Salmo 37:10, 11).

•   Jehová Diosca terrorismomanta tiyaj llaquicunatami allichinga. Por ejemplo. Diosca terrorismopi llaquichishca gentecunatami jambinga. Shinallataj dimastij llaquilla cajcunatapishmi cushichinga (Isaías 65:17; Apocalipsis 21:3, 4). Ashtahuanpish Yayitu Diosca cai llaquicunapi huañushcacunata causachishpami sumaj paraisopi churanga (Juan 5:28, 29).

 Bibliata yachacushpami Yayitu Dios ñalla cai llaquicunata tucuchina cashcata crinchij. Pero maipica, “¿imamantataj Taita Diosca terrorismotaca manaraj tucuchishca?” nishpami tapurinchij. Cai tapuimanta yachasha nishpaca ¿Diosca imamantataj llaquicuna tiyachun saquin? nishca videota ricui.