Trabajota pirdishpaca cullqui illajmi saquirinchij. Pero chashnallataj estresarishca, preocupadomi sintirinchij. Bibliapaj cai alli consejocunapi yuyai. Cai consejocunami cantaca achcata ayudai tucun.

•   Can ima shina sintirishcata shujtajcunaman huillai.

   Bibliapica caitami yachachin: “Alli apanacuj runaca paihuan apanacujtaca, tucui causaipimi cꞌuyan” (Proverbios 17:17).

   Maipica trabajota pirdishpaca llaquilla, pꞌiñarishca, imapaj mana valij shinami sintirinchij o imata ruranatapish mana yachanchijchu. Pero ñucanchij ima shina sintirishcata familiaman o amigocunaman huillajpica paicunaca ñucanchijta animachishpami ayudai tucun. Paicunami alli consejocunata cushpa shujtaj trabajota tarichunpish ayudai tucun.

•   Ama yallitaj preocuparichu.

   Bibliapica caitami yachachin: “Caya punllamantaca ama yallitaj sustarichijchu. Punllantami imamanta sustarinaca tiyan” (Mateo 6:34).

   Bibliapica imatapish rurangapajca alli yuyachunmi animan (Proverbios 21:5). Shinapish qꞌuipaman ima tucunapica ama yallitaj sustarichunmi nin. Maipica, “caimi o chaimi tucunga” yuyashpami dimastij sustarinchij. Pero ñucanchij yuyashca shinaca mana tucunchu. Chaimantami cada punlla imata rurai tucushcallapi yuyana canchij.

   Estresado sintirijpica Bibliapi tiyaj shujtaj alli consejocunapishmi quiquinta ayudai tucun. Caimanta ashtahuan yachangapajca “¿Estresta charishpaca imatataj rurai tucungui?” nishca temata liyi.

•   Cullquita menos gastangapaj cambiocunata rurai.

   Bibliapica caitami yachachin: “Achcata charishpapish, mana imata charishpapish cushilla canatami yachashcani” (Filipenses 4:12).

   Causangapaj cunan ima charishcacunallapi yuyai. Can charishca cullquihuan minishtirishca cosascunallata randingapaj esforzari. Ama yangamanta dibiyangui (Proverbios 22:7).

   Cunan charishca cullquihuan ima shina causanata ashtahuan yachasha nishpaca “¿Cómo vivir con menos?” nishca temata españolpi liyi.

•   Cambaj tiempota alli utilizai.

   Bibliapica caitami yachachin: “Imata rurashpapish alli yuyaihuan ruraichij. Cancunapaj tiempotapish alli aprovechaichij” (Colosenses 4:5).

   Trabajanaman ringapaj ña mana shuj horariota charishpapish cambaj tiempota alli aprovechashpa imatapish rurai. Chashna rurashpami canllataj alli sintiringui, imata mana rurashpapish mana saquiringuichu.

•   Ima trabajotapish rurailla.

   Bibliapica caitami yachachin: “Tucui yuyaihuan imatapish rurajpica, japinapish tiyanmi” (Proverbios 14:23).

   Can charishca shina trabajota mashcanapaj randica ima trabajotapish rurailla. Chai trabajitocunaca manachari importante shina canga o manachari ñaupa pagashca shina pagangacuna.

•   Ama shaicurichu.

   Bibliapica caitami yachachin: ‘Muyutaca tutamantapish tarpuilla, chishitapish ama samaricuichu. Maipi alli canataca mana yachanguichu’ (Eclesiastés 11:6).

   Trabajota mashcashpa cati. Familiacunaman, rijsishcacunaman, vecinocunaman, ñaupa trabajomanta compañerocunamanpish trabajota mashcacushcata huillai. Internetpi, periodicocunapi ricushpa o negociocunapaj anunciocunatapish ricushpa trabajota mashcai. Trabajocunata taringapaj ayudaj oficinacunamanpish ri. Shuj trabajota taringacamaca huaquin jefecunahuanmi parlana tucunga o shinallataj huaquin documentocunatapishmi cachana tucunga.