Testigo de Jehovacunaca 200 yalli llajtacunapimi Bibliamanta yachachinchij. Shujtajcunata ima minishtishcata cushpapishmi ayudanchij. Shinapish 35 llajtacunamanta huauqui panicunallami ima minishtirishcacunapaj cullquita cushpa ayudancuna. Cutin ¿pobre llajtacunapi causajcunataca ima shinataj ayudancuna?

 Cuerpo Gobernantepi sirvij huauquicunami tucui muyundij Allpapi testigo de Jehovacunapaj ruraicunataca alli ricuncuna. Espiritualmente alli cachunpishmi ayudancuna. Shuj llajta sucursalpi cullqui sobrajpica minishticuj llajta sucursalcunamanmi chai sobrashca cullquitaca cachancuna. Chashnami primer siglopi Jesusta catijcunapaj ejemplota catincuna. Paicunaca mana charij huauqui panicunata ayudangapajmi ima illashcata cachajcuna carca. Chashnami tucuicunallataj chai shinallataj charircacuna (2 Corintios 8:14).

 ¿Shujtaj sucursalcunamanta sobrashca cullquita chasquij huauqui panicunaca ima shinataj sintirincuna? Por ejemplo, Tanzania llajtapica la mayoría gentecunami casi dos dolarllahuan punllapica causancuna. Shujtaj sucursalcunamanta cachashca cullquihuanmi Mafinga congregacionpaj tandanacuna huasita allichircacuna. Cai congregacionmanta huauquicunaca: “Ñucanchij tandanacuna huasita allichishcamantami tandanacuimanca ashtahuan gentecuna shamushca. Chaimantami Jehová Diospaj organizaciontapish, muyundij Allpamanta huauqui panicunatapish shungumanta cullquita cushcamanta diosolopagui ninchij. Cunanca Jehová Diosta adorangapajca alaja Huasitami charinchij” nircacunami.

 COVID-19 ungüi tiyashcamantami Sri Lanka llajtapi causaj maijan huauqui panicunaca suficiente micunata mana charishca. Por ejemplo, pani Imara Fernando paipaj uchilla churi Enoshpish imata mana charircacunachu. Shinapish shujtaj llajtacunamanta ayudata chasquishpami, paicuna ima minishtishcata charircacuna. Chaimantami paicunaca shuj tarjetitapica: “Cꞌuyaita ricuchishcamantami huauqui panicunataca pagui ninchij. Cai familiapi cashcamantami cushilla sintirinchij. Shinallataj cai tucuri punllacunapi huauqui panicunata Jehová Dios ayudashpa catichunmi mañacunchij” nishpami quillcarcacuna.

 Ñucanchij huauqui panicunaca mai llajtapi causashpapish shungumanta ayudanatami munancuna. Por ejemplo, Enosh huahuitoca ashtahuan minishticuj familiacunata ayudangapajmi cullquita churangapaj shuj cajitata rurarca. Pani Guadalupe Alvarezpish shungumanta ayudanatami munan. Paica México llajtapimi causan. Pai causashca ladopica la mayoría gentecunaca shuj sueldota mana chasquincunachu. Shinapish pani Guadalupeca ima laya tucushpapish shujtajcunatami ayudan. Paica: “Jehová Diostami cꞌuyaita ricuchishcamanta, ñucata llaquishcamanta agradicini. Ñuca cushca cullquipish, shujtaj turi ñañacuna cushca cullquipish minishticuj turi ñañacunata ayudana cashcataca yachanimi” nircami.

 Sucursalcunamanta huauquicunaca cullquita cachashpaca cushillami sintirincuna. Brasil llajtapi tiyaj Comité de Sucursalpi sirvij huauqui Anthony Carvalhoca: “Shujtaj sucursalcunamanta huauquicunami ñucanchijtaca achca huatacunata cullquihuan ayudarcacuna. Chashna ayudashcamantami ashtahuan huillashpa catircanchij. Cunanca ñucanchijmi shujtajcunata ayudai tucunchij. Huauqui panicunaca muyundij Allpapi huillana cashcatami intindincuna. Paicunapish shujtajcunata ayudai tucushcatami cuentata cuncuna” nircami.

 ¿Testigo de Jehovacunaca minishticuj huauqui panicunataca ima shinataj ayudai tucuncuna? Shujtaj llajta sucursalcunaman cullquita cachanapaj randica obra mundial nishcapimi churai tucunguichij. Chaipajca Tandanacuna Huasicunapi “Obra mundial” nishca cajacunapimi churai tucunguichij. Mana cashpaca donate.pr418.com paginaman yaicushpami cui tucunguichij. Cancuna cushca cullquica achca valishcami can.