Latinoamericapica achca millón gentecunami causan. Paicunapuramantaca comunidadcunapimi achca gentecuna causan. Cai gentecunaca paicunapaj propio shimita, paicunapaj propio costumbrecunatami charincuna. Achca huauqui panicunapishmi chai comunidadcunapica causancuna. Chai comunidadcunapi causaj gentecunata Bibliamanta yachachishpa ayudangapajmi testigo de Jehovacunaca Latinoamericapi tiyaj 130 yalli shimicunapi publicacioncunata traducinchij. a Shinapish achca huauqui panicunaca Jehová Diosta sirvicushcamanta, gentecunapaj costumbrecunata mana catishcamantami huaquin problemacunata charishcacuna. ¿Shungumanta cushca cullquihuanca ima shinataj shujtajcunata ayudanchij?

 Jalisco urcucunapica (México), huichol nishca comunidadmi tiyan. Chai comunidadpimi huauqui panicunaca Biblia mana yachachishca costumbrecunata mana catisha nircacuna. b Chaimantami maijancunaca paicunahuan pꞌiñarircacuna. Chashna pꞌiñarishpami 4 de diciembre de 2017-pica huaquin Testigocunatapish, paicunahuan tandanacuj gentecunatapish macarcacuna. Paicunataca comunidadmantapishmi llujchishpa cacharcacuna. Paicunapaj huasicunatapishmi dañarcacuna. Shinallataj, maijanpish tigramujpica huañuchishunmi nircacunami.

 Chai cꞌuchulla pueblomanta Testigocunami huauqui panicunaman tucui imalla minishtishcata cushpa ayudarcacuna. ¿Shinapish comunidadman tigrangapajca imatataj rurana carca? Huauqui Agustinca: “Abogadota japingapajpish cullquita mana charircanchijchu. Maipi ima ayudata mashcanatapish mana yacharcanchijchu” ninmi.

 Ñucanchij huauqui panicuna Diosta sirvishpa ama catichunmi jarcaicunata churarcacuna. Chaimantami Centroamérica sucursalmanta huauquicunaca utca ayudarcacuna. Callaripica ima tucushcatami autoridadcunata investigachun mañarcacuna. Qꞌuipaca Comité de Coordinadores del Cuerpo Gobernantemi chai llajta sucursal huauquicuna central mundialmanta Departamento de Asuntos Legaleshuan tandalla trabajachun aprobarca. Shinallataj huichol huauqui panicunata ayudangapaj shuj demandata churachunmi mañarca. Tiempohuanca Suprema Corte de Justicia de la Nación nishcamanmi cai demandaca chayarca. Chai tribunalca México llajtapica achca autoridadtami charin.

 Chꞌican chꞌican llajtamanta abogadocunaca: “Ima shinami shujtaj gentecunaca comunidadcunapi causaj gentecunapaj culturata respetana can. Chashnallatajmi chai comunidadcunaca chai ucupi causajcunatapish respetana can, tucuicunata ayudana can. Gentecunaca tucuicunami derechota charin” nishpami alajata intindichircacuna.

 8 de julio de 2020 huatapimi Suprema Corte de Justiciaca Testigocunapaj favor llujshirca. Shinallataj comunerocunataca comunidadmanta llujshichishpa cachashcacunata cutin chasquichunmi mandarcacuna. Ñajaman parlashca huauqui Agustinca: “Tucuicunami cushilla canchij. Ñucanchijta ayudashcamantami huauquicunataca diosolopagui ninchij. Paicuna mana ayudashca cajpica imachari tucuiman carcanchij” ninmi.

 Ecuador llajtapipish San Juan de Ilumanpica chashnallatajmi ñucanchij huauqui panicunataca llaquichircacuna. Cai comunidadca Otavalopimi saquirin. Chaipica achca gentecunami causan. 2014 huatapica permisocunata llujchishca qꞌuipami shuj Tandanacuna Huasita rurai callarircacuna. Shinapish shuj sacerdoteca 100 gentecunatami huauqui panicunapaj contra jatarichishpa ama rurashpa catichun jarcarca. Shinallataj chai comunidadca Testigocuna tandanacuicunata ama rurashpa catichunmi mandarca.

 Ecuador sucursalmanta, central mundialmanta Departamento de Asuntos Legalesmi cai huauqui panicuna Diosta sirvishpa catichun ayudarca. Chaimantami paicunata difindingapajca tribunalcunaman rircacuna. Chaita rurajpimi chai comunidadmanta gentecunaca ñucanchij huauqui panicuna cutin tandanacuchun, paicunapaj Tandanacuna Huasitapish tucuchichun saquircacuna. Shinapish ñucanchij huauqui panicunata qꞌuipa punllacunapi ama chashnallataj llaquichichunmi ñucanchij abogadocunaca: “Comunidadpi causaj gentecunaca derechos humanospi ima nishcatami respetana can” nishpami tribunales superiorestaca mañarcacuna.

 16 de julio de 2020 huatapimi Corte Constitucional del Ecuadorca cai problemata allichingapaj ayudarca. Cai tribunalca ashtahuan autoridadtami charin. Ecuadormanta huauqui abogadocunallatajmi Ilumán congregaciontaca difindircacuna. Paicunahuanca chꞌican chꞌican llajtacunapi cashna problemacunata allichingapaj experienciata charij shujtaj chuscu huauqui abogadocunapishmi carca. COVID-19 pandemia tiyashcamantami cai tandanacuitaca chꞌican chꞌican llajtacunamanta videoconferenciapi rurarcacuna. Tribunalca punta cutinmi testigo de Jehovacunapaj abogadocuna cashna tandanacuchun saquishca. c Abogadocunaca autoridades legales internacionales imata nishcata ricuchishpami, comunidadcunapi causaj gentecunapish derechocunatami charin nircacuna.

 Otavalomanta huauqui panicunaca Corte Constitucional imata decidishcatami shuyacuncuna. Paicunaca cashna ayudata chasquishcamantami achcata pagui nincuna. Quichua Ilumán congregacionmanta huauqui Cesarca: “Jehová Diosllami paipaj organizacionhuan ashallacuna cajpipish achcata ayudai tucun” nircami.

 Ñucanchij huauqui panicunata ayudaj abogadocunaca testigo de Jehovacunallatajmi cancuna. Paicunaca imata mana cobrashpami ayudarcacuna. Shinapish cai problemata tribunal ñaupajpi difindingapajca allimi prepararina carcacuna. Chaipajca tiempo, cullquimi minishtirirca. México llajtapi problemata allichingapajca ñucanchij abogadocunapish, shujtaj huauquicunapish 380 yalli horacunatami prepararircacuna. Cutin documentocunataca 240 horaspimi traducircacuna. Shinallataj Ecuadorpi tiyashca problemata allichingapajca chꞌican chꞌican ladocunamanta casi 40 abogadocunami achca horacunata prepararircacuna. ¿Ñucanchij huauqui panicunata difindingapajca maimantataj cullquitaca llujchishcanchij? Donate.pr418.com paginapi cullquita cancuna cushcamantami chashna ayudai tucushcanchij. Cancuna shungumanta cujcuna cashcamantami pagui ninchij.