Tucui quillacunami JW Broadcastingpi llujshishca programacunata, animachij videocunata ricunata munanchij. Shinapish África llajtapi causaj achca huauqui panicunaca chai videocunataca internetpi mana ricui tucuncunachu. ¿Imamantataj mana ricui tucuncuna?

 África ladocunapica internetca mana tanto tiyanchu. Tiyashpapish lentomi can. Achca cullquimi valin. Por ejemplo, Madagascar llajtamanta shuj superintendente de circuitoca shuj centro de computo nishcamantami JW Broadcasting programata descargarca. Chashna descargashcamantaca paica 16 dolartami pagana tucurca. a Chaipi causaj gentecunaca shuj semana yallita trabajashpami cai cullquitaca ganancuna.

 Chai problema tiyajpipish, Africapica achca gentecunami internetta mana charishpapish JW Broadcasting programata ricui tucuncuna. ¿Ima shinataj chaitaca rurai tucuncuna?

 2017 huatamantami África subsaharianapica JW Broadcasting programataca televisionpi ricui tucuncuna. Cai televisionca tucui semanacunatami tutapish, punllapish 16 idiomacunapi programacunata gratis ricuchin.

 Testigo de Jehovacunaca chai programacunata pasachingapajca shuj canal de televisiontami alquilancuna. Televisionpaj señalca África subsahariana ladopica 35 llajtacunamanmi chayan. Cai canalta alquilashcamantaca cada quillami 12.000 dolarcunata pagancuna. Maipica programacunata en vivo pasachingapajca shujtaj canalmanmi ashahuan pagancuna. Chashna rurashcamantami jatun tandanacuicunatapish, sucursalta visitangapaj central mundialmanta shamuj huauqui cushca discursotapish huaranga gentecuna ricui tucuncuna.

 Testigocunapish, mana Testigocunapishmi cai canalta paicunapaj televisioncunapi ricuncuna. Shinapish achca huauquicunaca cai aparatocunataca mana randi tucuncunachu. Chaimantami 3.670 Tandanacuna Huasicunapi señal tiyachun jatun antenacunata churashcacuna. Chashnami huauqui panicunaca JW Broadcasting programata chaipi ricui tucuncuna. Tandanacuna Huasicunapi shuj televisión o shuj proyector tiyajpica cai señalpaj aparatocunaca 70 dolaresmi valin. Pero televisión o proyector mana tiyajpicarin tucuica hasta 530 dolaresmi vali tucun.

 Huauquicunaca cai canal tiyashcamantami achcata agradicincuna. Camerún llajtamanta shuj ancianoca: “Ñuca familiapajca chaquishca pambapi maná shuti micuna tiyaj shinami can” ninmi. Cutin Nigeria llajtamanta huauqui Odebodeca: “Ñuca familiahuanmi semanapica quimsa cutin chai canalta ricungapaj tandanacunchij. Ñuca huahuacunaca ña chai punlla chayachunmi shuyancuna. Shujtaj cutincunacarin chai canalpi churai nincunami” nircami. Nigeria llajtamanta Rose shuti panipish: “Cushillami cani. Ñaupaca noticiacunatami ricunata munaj carcani. Cunanca JW canaltami ricunata munani. Noticiacunata ricushpaca jahuallami pꞌiñarij carcani. Presión ungüitapishmi charij carcani. Pero JW canalta ricushpaca tranquilami sintirini, animarishcami sintirini. Cai canalca Jehová cushca sumaj bendicionmi can. Chai canalpi llujshishca programacunatami ricunata munani” ninmi.

 Mozambique llajtamanta shuj superintendente de circuitoca: “JW canalta televisionpi ricungapajmi Tandanacuna Huasicunapica señal tiyachun jatun antenacunata churashca. Huauqui panicunaca tandanacuipaj shuj hora o ashtahuan illajpirajmi JW Broadcasting programata ricungapajca tandanacuna huasiman chayancuna” ninmi.

 2019 huatapimi Johannesburgopica (Sudáfrica), shuj asamblea internacional tiyarca. Chaipica Cuerpo Gobernantepi sirvij shuj huauquipaj discursota, shujtaj discursocunatapish ricuchunmi nueve ladocunaman cai canalpi pasachircacuna. Sudáfrica sucursalmanta Departamento Local de Broadcastingpi sirvij huauqui Sphumeleleca: “Ñaupaca internetpimi discursocunataca ricuchij carcanchij. Chaita rurangapajca alli conexiontami minishtircanchij, datocunatapishmi randina carcanchij. Cunanca cai programacunata televisionpi pasachinami ashtahuan barato cashca” ninmi.

 Cancuna shungumanta cullquita cushpa ayudashcamantami África ladocunamanta huauqui panicunaca JW Broadcasting programataca ricui tucuncuna. Donate.pr418.com paginaman yaicushpa, obra mundialpaj cullquita cushpa ayudashcamantami cancunataca diosolopagui ninchij.