Jesusca paita catijcunamanca: ‘Cai pachapi tiyaj tucui llajtacunapi ñucamanta huillanguichij’ nircami (Hechos 1:8). Testigo de Jehovacunaca cai mandashcata pajtachingapajmi sinchita esforzarincuna. Shinapish tucui ladocunapica manaraj huillai tucushcanchijchu. Maijan ladocunapica achca gentecunami causan. Cutin shujtaj ladocunapica ashalla Testigocunami tiyan (Mateo 9:37, 38). ¿Tucui gentecunaman huillangapajca imatataj ruracunchij?

 Jesús mandashcata pajtachingapajmi Comité de Serviciopi sirvij huauquicunaca huillajcuna minishtirij ladocunaman misionerocunataca cachancuna. Cunan punllacunapica muyundij Allpapimi 3.090 misionerocuna tiyan. a Achca misionerocunaca Escuela para Evangelizadores del Reino nishcaman o shujtaj escuelacunamanmi rishcacuna. Cai misionerocunaca paicuna causana llajtata saquishpami shujtaj llajtaman rishcacuna. Paicunaca alli yachajcuna cashcamanta, experienciata charishcamantami alli huillaicunata huillashpa ayudashcacuna, mushuj huauqui panicunapajpish alli ejemplo cashcacuna.

 Cada llajta sucursalpimi Departamento de Serviciopi sirvij huauquicunaca Comité de Sucursalpi sirvij huauquicunahuan misionerocunata ima shina ayudanata parlanacuncuna. Por ejemplo, shuj huasita, alli saludta charichunmi ayudancuna. Shinallataj paicunapaj gastocunapaj asha cullquitapish cushpami ayudancuna. 2020 huatapica misionerocunata ayudangapajca testigo de Jehovacunaca casi 27 millones de dolarestami gastarcacuna. Chashna ayudashcamantami misionerocunaca mana imapi preocuparishpa, predicashpa catishcacuna, congregacionpi sirvij huauqui panicunatapish sinchiyachishcacuna.

 ¿Misionerocunaca ima shinataj predicanapica ashtahuan ayudancuna? Malaui llajta Comité de Sucursalpi sirvij huauqui Frank Madsenca: “Misionerocunaca mana manchashpa, alli huillajcuna cashpami mana yaicuipaj ladocunapi, shujtaj shimita parlaj ladocunapi huillachun congregacioncunataca ayudashcacuna. Misionerocunaca paicuna sirvicushca llajtapi tiyaj costumbrecunata yachangapaj, chaipi parlashca shimitapish yachangapajmi esforzarincuna. Chashnami alli ejemplota churancuna. Shinallataj jovencunatami tiempo completopi sirvichun animancuna. Cai misionerocunata cushcamantami Jehová Diostaca diosolopagui ninchij” ninmi.

 Shujtaj llajtamanta Comité de Sucursalpi sirvij huauquica: ”Misionerocunata ricushpami muyundij Allpapi huauqui panicunahuan shuj shinalla causana cashcata yachashcanchij. Ima culturamanta cashpapish chashna tandalla causai tucushcatami mana Testigo gentecunapish cuentata cushcacuna. Bibliamanta yachanami huauqui panicunahuan shuj shinalla causangapaj ayudashca” ninmi.

 ¿Misionerocunaca ima shinataj huauqui panicunataca ayudancuna? Timor Orientalmanta huauqui Pauloca paipaj congregacionpi misionerocuna sirvicushcamantami achcata pagui nin. Paica: “Ñucanchijca achca calor tiyaj llajtapimi causanchij. Misionerocunaca chiri llajtacunamanta shamushpapish huillanaman llujshina tandanacuicunamanca mana faltancunachu. Huaquinpicarin chaupi punllami achca calor tiyajpi revisitacunata rurashpa catincuna. Chishicunapishmi huillashpa catincuna. Paicunaca achcacunatami Bibliamanta yachachishpa ayudashcacuna, ñucatapishmi ayudarcacuna. Paicunaca cushicushpami Diosta sirvincuna. Chashnami huauqui panicunataca Diosta ashtahuan sirvichun animancuna” ninmi.

 Malaui llajtamanta Ketti shuti precursoraca shuj cusa huarmi misionerocuna ima shina paipaj familiata ayudashcatami parlan. Paica: “Misionerocuna ñucanchij congregacionman chayajpica ñuca familiapica ñucallami Testigo carcani. Paicunami ñucataca achcata ayudarca. Ñuca familiahuanpish alajatami amigarircacuna. Paicunamantami ñuca huahuacunapish Jehová Diosta sirvishpa cushilla causana cashcata yacharcacuna. Misionerocunapaj alli ejemplota ricushpami ñuca quimsa ushushicunaca precursora regular cancuna. Ñuca cusapish tandanacuicunamanmi ri callarishca” ninmi.

 ¿Misionerocunata ayudangapajca maimantataj cullquitaca japinchij? Obra mundialman cushca cullquihuanmi ayudanchij. Cai cullquitaca donate.pr418.com paginaman yaicushpami cuncuna. Cancuna shungumanta cushcamantami diosolopagui ninchij.