Marzo 2020 huatapica Organización Mundial de la Salud nishcaca COVID-19 ungüica shuj pandemia tucushcatami huillarca. Pero shuj huata yalli cai ungüica gentecunata llaquichinataca mana yuyarcanchijchu. COVID virus ungüimantami achca gentecunaca ungushca, llaquilla, cullqui illajpish saquirishcacuna. ¿Cai llaquicunata charij huauqui panicunata ayudangapajca testigo de Jehovacunaca imatataj rurashcacuna?

 Testigo de Jehovacunapaj Cuerpo Gobernantemanta Comité de Coordinadorespi sirvij huauquicunaca COVID ungüimanta llaquita apacujcunata ima shina ayudanatami ricuracuncuna. Chaimantami mundo enteropi ayudachunca 950 yalli Comité de Socorro nishcata churashcacuna. Huaquin llajtacunapica chai comitecunapi sirvijcunaca huauqui panicunata ayudangapajmi organizashcacuna. Pero shujtaj llajtacunapica testigocunaca gobiernocunapaj ayudatami chasquishcacuna. Cai Comité de Socorro nishcacunapi sirvij huauquicunaca achcacunatami ayudashcacuna.

 Por ejemplo, Paraguay llajtamanta shuj periodicopi nishca shinaca cai pandemia tiyashcamantami gentecunaca cullqui illaj saquirishcacuna. Chaimantami micungapajpish ña mana charishcacuna. Shinapish chai llajtapaj Comité de Socorropi sirvijcunaca ishqui semanapajmi micunata, huasita pꞌichangapaj, cuerpota maillangapaj cosascunata paquetecunapi ña cachai callarishcarcacuna. Cada paqueteca más o menos 30 dolaresmi valin. Y chuscupurapajmi pajtan.

 ¿Comité de Socorropi ayudajcunaca shujtajcunata ama contagiangapaj, paicunallataj ama contagiaringapajca imatataj rurancuna? Paicunaca mascarillacunatami churarincuna, paicunapurapish mana tanto cꞌuchuyarincunachu. Shinallataj paicunaca alimentocunata cꞌatujcuna limpio lugarcunapi, autoridad cushca instruccioncunata catishpa trabajachunmi ricuncuna. Ayudajcunaca paquetecunata cachajcuna ama contagiarichun tucui minishtirishca cosascunata churarishca cachunmi ricuncuna. Shinallataj paquetecunata huaquichina lugarcuna, entregajcunapaj carrocuna limpio, desinfectado cachunmi ricuncuna. Cai paquetecunata entregajcunaca caicunata chasquij huauqui panicunapajman mana tanto cꞌuchuyashpami saquincuna.

 Enero de 2021 huatapica Comité de Coordinadoresmanta huauquicunaca COVID ungüimanta llaquicunata charijcunata ayudangapajmi 25 millones yalli dolarescunata utilizachun decidircacuna. Sucursalcunamanta, Comité de Socorrocunamanta huauquicunaca huauqui panicuna cushca cullquitaca alli yuyashpami utilizancuna. Chaimantami minishtirishca cosascunataca alli preciopi randingapaj esforzarincuna. Por ejemplo, Chile llajtapica Comité de Socorropi ayudaj huauquicunaca 1.653 libras lentejacunatami randisha nircacuna. Pero shuj quilla qꞌuipallami cai lentejacunaca ashtahuan valirca. Shina cajpipish huauquicunaca mushuj preciopi valij lentejacunata randingapajmi ari nircacuna. Pero ishqui horas qꞌuipami lentejacunata cꞌatuj runaca shujtaj randij lentejacunata tigrachishcatami huillarca. Chaimantami cai cꞌatuj runaca ashtahuan valishca lentejacunata cꞌatunapaj randica, tigrachishca lentejacunatami normal preciopi cꞌatusha nirca.

 Shinapish huauquicuna lentejacunata apanaman rijpica cꞌatuj runaca: “Cancunaca shujtaj organizacioncuna layallatajmi alimentocunataca mana alli chaupinguichij. Cancunallatajmi beneficiaringui” nishpami mana cꞌatusha nirca. Chaimi shuj huauquica rato Yaya Diosta shungullapi mañarca. Qꞌuipaca cai huauquica cꞌatuj runamanca, “tucui congregacioncunapi pi de verdad ayudata minishtishcata ricushpami tucuita organizashcanchij” nircami. Huauquicunaca cꞌatuj runamanca, “ñucanchij huauqui panicuna chꞌican chꞌican cashcata yachashpami paquetecunapica cada familia ashtahuan minishtishca alimentocunata churanchij” nircacunami. Shinallataj testigo de Jehovacuna shungumanta cullquita cujcuna cashcata, mana imata cobrashpa ayudajcuna cashcatapishmi huillarcacuna. Chaita uyashpaca cꞌatuj runaca achcata cushicushpami lentejacunata cꞌaturca. Shinallataj huauquicuna cutin lentejacunata randijpica cꞌatuj runaca 882 libras lentejacunahuanmi yaparca.

 Liberia llajtapica, Lusu shuti mayorlla viuda panimi causan. Paipaj huasipica sujtacunapurami causan. Shuj punlla paicuna desayunacujpi, texto diario nishcata liyicujpica Lusupaj nietoca micuna ña tucurishcatami cuentata curca. Paica: “¿Cunanca imatataj micushun?” nishpami tapurca. Chaimi pani Lusuca paipaj nietitotaca: “Ama sustarichu. Ñucaca Jehová Diostaca ñucanchijta ayudachunmi mañarcani. Yayitu Dios ñucanchij minishtishcacunata cunatajmi crini” nircami. Chai chishillatajmi congregacionmanta ancianocunaca pani Lusuta cayashpami, “huaquin alimentocunata japinaman shamui” nircacuna. Pani Lusuca: “Ñuca nietitoca Jehová Dios ñuca mañashcata cutichishcata ricushpami paipaj mañaicunatapish cutichina cashcata tucui shunguhuan crin” nircami.

 República Democrática del Congo llajtapica, shuj huarmica shuj testigo de Jehová familia cꞌuchullapimi causan. Shujtaj testigocuna chai familiaman micunata carashcata ricushpaca chai huarmica: “Testigo de Jehovacunaca sinchi punllacunapipish caishuj chaishujmi ayudanacuncuna. Chaimantami cai pandemia tucurishca qꞌuipaca testigo de Jehová tucushun” nircami. Chaimi paipaj cusaca: “¿Arroz fundata chasquingapajllachu testigo de Jehová tucugringui?” nishpa tapurca. Paica: “Mana, mana chaimantachu can. Pero testigocuna chai arrozta carashpami paicunapura ciertotaj cꞌuyanacushcata ricuchincuna” nircami.

 Cancuna shungumanta cullquita cushcamantami testigo de Jehovacunaca huauqui panicunata rato ayudai tucushcanchij. Donate.pr418.com paginapi shungumanta cullquita cushcamantami diosolopagui ninchij.