Huaquin traductorcunallami sucursalcunapi trabajancuna pero la mayoría traductorcunaca uchilla oficinacunapi trabajancuna. Chai oficinacunataca RTO nishpami rijsinchij. ¿Imamantataj caica valishca can? ¿RTO-pi trabajajcunaca imallatataj minishtincuna? ¿Cai uchilla oficinacunaca imamantataj alli traducichun ayudan?

 Cai oficinacuna tiyashcamantami traductorcunaca paicunapaj shimita parlaj llajtacunallapitaj causashpa chai shimicunaman traducincuna. Por ejemplo, huauqui Karinca México llajtapi bajo alemán shimipi traducishpami trabajan. Paica: “Chihuahua llajtapi saquirij RTO de Cuauhtemocpi causanaman rishcamantami bajo alemán shimipi tucui tiempo parlanchij. Traductorcunahuan cashpa, huillanaman o randinaman rishpapish chai shimillatatajmi uyanchij parlanchij. Achca tiempota mana uyashca shimicunatapishmi cutin uyanchij. Cunanmi gentecuna chai shimita parlajtaca alli yachanchij” ninmi.

 Ghana llajtapi causaj huauqui Jamesca frafra shimipi traducishpami trabajan. Paica: “Betelpi causanata huaquinpi llaquirishpapish RTO-pi trabajanataca achcatami munani. Gentecuna parlaj shimipi huillashpa, paicuna alli huillaicunata uyajpica cushillami sintirini” ninmi.

 Cunanca shuj RTO huasita maipi churanata ima shina agllashcata ricushun. Warwick llajtamanta Departamento Mundial de Diseño y Construccionpi trabajaj huauqui Josephca cashnami nirca: “Huaquinpica cai llaquicunatami chꞌimbapuranchij por ejemplo, yacu, luzpish mai lugarcunapica mana tiyanchu. Shinallataj huaquin trabajocunata rurangapajca internetpish mana tiyanchu. Chaimantami RTO huasita maipi shayachinataca manaraj decidishpa huaquin lugarcunata mashcanchij”.

 Huaquinpica RTO oficinacunataca Jatun Tandanacuna Huasicunapi, Tandanacuna Huasipi o misionerocuna causan huasicunapimi churanchij. Chashnami mana tanto cullquita gastanchij. Chashnallataj traductorcunapajpishmi chaiman rina, cutin tigranaca jahualla can. Chashna lugarcuna traducingapaj mana tiyajpica huauquicunaca huasicunata, oficinacunata randingapajmi sucursalman permisota mañan. Cutin traductorcunapaj oficinacunapi cambio tiyajpica chai oficinacunata cꞌatushpami cullquitaca minishtirishca cosascunapi utilizanchij.

 Traducina uchilla oficinacunapi huauqui panicuna trabajashpa catichunca año de servicio 2020-pica 13 millones de dólares cullquitami gastarcanchij. Traductorcunaca computadoracunata, computadorapaj programacunata, grabacioncunata rurangapaj equipocunata, internetpish alli cachunmi minishtincuna. Shinaca shuj computadorata randingapaj chai computadorapi programacunata churangapajpish 750 dolarcunata minishtincuna. Shinallataj traductorcunaca traducina documentocunaman yaicungapaj, trabajota alli organizangapajpish Watchtower Translation System nishca programatami minishtincuna.

 Traductorcunaca paicunapaj oficinacunapi grabacioncunata rurangapajca minishtirishca equipocunatami charincuna. Chaimi pandemia callarijpica traductorcunaca videocunata grabashpa, publicacioncunata traducishpa catingapajca chai equipocunata paicunapaj huasicunaman aparcacuna.

 Shinallataj chai llajtallapitaj causaj huaquin huauqui panicunaca traducishcacunata revisashpa, oficinacunata allichishpami ayudancuna. Ciudad del Cabo Sudáfrica llajtapi afrikáans shimiman traducishpa trabajaj huauqui Cirstinca: “RTO oficinacunapimi achca publicadorcuna, precursor regularcunaca paicuna pudishcata rurashpa ayudancuna” ninmi.

 Cai huauqui panicunaca cushillami sintirincuna. Shuj panica: “RTO-pi trabajanaca chirijlla huaira shinami can” ninmi. Shinallataj chai llajtallapitaj causaj huaquin huauqui panicunaca audiocunata grabashpami ayudancuna. Chaimi Veracruz México llajtapi, totonaco shimipi traducij pani Juanaca: “Cunanca ñucanchij shimipi parlaj cꞌuchullapi trabajashcamantami ashtahuan turi ñañacunaca videocunata, publicacioncunata grabanaman shamui tucuncuna” nin.

 Shinaca RTO uchilla oficinacuna tiyashcamantami traductorcunaca ashtahuan alli traducishcacuna. Chaitaca millón gentecunami cuentata cushca. República Democrática del Congo llajtapimi huauqui Cedricca congo shimiman traducishpa trabajan. Paica cashnami nirca: “Ñaupaca congo shimipi traducishca publicacioncunaca mana paicuna rimashca laya traducishca cajpimi huaquin huauqui panicunaca, ‘Watch Tower shimipimi traducishca can’ nijcuna carca. Pero cunanca congo shimipi parlaj shina traducishca cajpimi huauqui panicunaca, ‘cunanca ñucanchij rimashca layami traducishca can’ nincuna”.

 Sudáfrica llajtapi xhosa shimiman traducij Andile shuti huauquipish cashnami nirca: “Achcacunaca ñucanchij traducishcacuna ashtahuan alli cashcatami cuentata cushcacuna. Shinapish ñaupaca huaquin huahuacunaca La Atalaya revistataca inglés shimipi liyijcuna carca. Pero cunanca xhosa shimipimi liyincuna. Shinallataj revisashca Traducción del Nuevo Mundo Bibliaca intindirinalla shimicunata charishcamantami liyinata achcata munancuna”.

 RTO uchilla oficinacunata rurangapaj, chaita mantinishpa catingapaj, chaipi trabajajcunata ayudangapajpishmi shungumanta cushca cullquita, donate.pr418.com paginapi cushca cullquitapish utilizanchij.