Testigo de Jehovacunaca ñucanchij huauqui panicunamantami preocuparinchij (1 Pedro 2:17). Ñucanchijca Kenia llajtamanta Tannis shuti pani shinachari sintirinchij. Paica: “Ñucaca shujtaj llajtamanta caj huauqui panicunahuan ima pasacushcatami yachanata munani” ninmi. ¿Mundo enteromanta huauqui panicunahuan ima pasacushcataca testigo de Jehovacunaca ima shinataj yachanchij? 2013 huatamantami jw.org paginapi caj “Noticiacuna” nishca parteman yaicushpa ñucanchij cꞌuyashca huauqui panicunamanta ashtahuan yachai tucunchij.

 Cai paginapica testigo de Jehovacuna ima shina Tandanacuna Huasicunata shayachishcata, jatun llaquicuna tiyan lugarcunapi ima shina huauqui panicunata ayudashcata, Bibliacuna imalla shimicunapi llujshishcatapishmi huillan. Shinallataj maijan huauqui panicuna paicunapaj crishcacunamanta prezu cashcatapishmi huillan. Shinallataj Jesús huañushcata yuyaringapaj tandanacuicunapi, huillangapaj campañacunapi imalla experienciacuna tiyashcatapishmi huillan. Pero ¿cai noticiacuna alli llujshichunca picunataj investigancuna? ¿Ima shinataj preparancuna?

 Oficina de Información Pública nishca departamentomi noticiacunata llujchingapaj trabajancuna. Cai departamentoca central mundialpimi saquirin. Cuerpo Gobernantemanta Comité de Coordinadorespi sirvij huauquicunami paicunata ricurashpa ayudancuna. Oficina de Información Pública nishcapica 100 yalli huauqui panicunami trabajancuna. Paicunapuramantaca achcacunami shujtaj ladocunamanta ayudan. Cai huauqui panicunaca investigashpa, escribishpa, traducishpa, huaquin fotocunata llujchishpami ayudancuna. Shinallataj paicunaca autoridadcunahuan, noticiacunata cujcunahuan o universidadcunapi yachachijcunahuanmi parlancuna. Chꞌican chꞌican sucursalcunapi saquirij 80 yalli Secciones de Información Pública nishcacunami cai departamentota ayudan.

 Oficina de Información Pública nishcapi trabajajcunaca, Servicios de Información Pública nishcapi trabajajcunahuanmi tandalla noticiacunata llujchincuna. Huauquicunaca shuj llajtapi ima pasacushcata yachaj chayashpaca manaraj noticiapi llujchishpami chaimanta alli investigancuna. Chaipajca entrevistacunatami rurancuna, o chaimanta alli yachajcunahuanmi parlancuna. Ña tucui chai informacionta charishpaca chaitami escribincuna, allichincuna, corregincunapish. Qꞌuipaca fotocunata churashpami Comité de Coordinadorespi sirvij huauquicunaman chaita aprobachun cachan.

 ¿Ñucanchij huauqui panicuna, jw.org paginapi tiyaj “Noticiacuna” nishca partemantaca imatataj yuyancuna? Filipinas llajtapi causaj pani Cherylca cashnami nin: “Ñucaca Diospaj organizacionmanta, huauqui panicunamanta noticiacunata tutamantapi liyinatami achcata munani”.

 Achcacunami mundopi llujshishca noticiacunahuan, jw.org paginapi llujshishca noticiacunahuan mana igual cashcata cuentata cushcacuna. Por ejemplo, Kazajistán llajtamanta Tatiana shuti huarmica cashnami nin: “JW.ORG paginapi llujshishca noticiacuna cierto cashcata yachashpami achcata contentarini. Chai noticiacunapica mana llullancunachu”. Shinallataj México llajtamanta Alma shuti panica cashnami nin: “Cai mundopi llujshishca noticiacunaca mana allicunallatami huillan. Pero jw.org paginapi llujshishca noticiacunaca achcatami cushichin”.

 JW.ORG paginapi llujshishca noticiacunaca verdadtami huillan. Shinallataj ñucanchij fetami sinchiyachin. Kenia llajtamanta Bernardca cashnami nin: “Cai paginapi noticiacunata ricushcamantami huauqui panicuna maijan llajtapi cajpipish ñuca familia cashcata shina ricuni. Diosta mañashpaca paicunapaj shuticunata nombrashpa, paicunapaj llaquicunamantapishmi huillani”. Kenia llajtapi causaj Bybron shuti panica: “Biblia shuj mushuj shimipi llujshijta ricushpami achcata contentarini. Chaipimi Jehová Dios tucuicunata cꞌuyashcata yuyarini” ninmi.

 Noticiacunapi shujtaj huauqui panicunata catirashpa llaquichicujta liyishpaca achcatami animarinchij. Por ejemplo, Kenia llajtamanta pani Jacklineca cashnami nin: “Huauqui panicuna mana manchashpa yaya Diosta sirvicujta ricushpami ñuca feta sinchiyachini. Paicuna ahuantachun ima ayudashcata ricunatami munani. Paicunaca Yaya Diosta mañashcamanta, Bibliata liyishcamanta, cantocunahuan Diosta alabashcamantami fuerzata charincuna”.

 Costa Rica llajtamanta Beatriz shuti panica jatun acapanacunamanta, terremotocunamanta o shujtaj llaquicunamanta parlaj noticiacunata ricunatami munan. Paica: “Diospaj organización huauqui panicunata cꞌuyaihuan, rato ayudajcuna cajtami ricuni. Cai tucuicunata ricushpaca Jehová Dios ciertotaj cai organizacionta pushacushcatami intindini” ninmi.

 Tucuicunami jw.org paginapi noticiacuna tiyashcamanta cushilla, agradecidos sintirinchij. Cai noticiacunamantami mundo enteropi causaj huauqui panicunahuan ima pasacushcata yachai tucunchij. Pero cai laya noticiacuna tiyashpa catichunca cancunapaj shungumanta cushca cullquimi ayudan. Achcacunaca donate.pr418.com paginaman yaicushpami cullquitaca cushcacuna. Tucui caicunamantami achcata agradicinchij.