Yuyashun. Canca Jesús causashca tiempopi Galilea llajtapi causashcanguiman. Jerusalenmanmi viajashcangui. Jerusalenpica chugllacunata rurana fiestami can. Achca huauqui panicunami tucui ladocunamanta shamushca. Cunanca Diospaj templopi Diosman ofrendata cungapajmi quichqui ñancunata shuj chivota apashca puri callaringui. Ña temploman chayashpaca achca gentecuna Diosman ofrendata cucujtami ricungui. Shuj chaquillatapish mana maipi churaipajchu. Chaimantami ashata shuyana cashcangui. Shinapish ñami cambaj ofrendata cuna turno chayashca. Pero ofrendata ña cugricushpaca cambaj huauqui canhuan pꞌiñarishcatami yuyaringui. Chai huauquica gentecuna purapi o Jerusalenllapitajmi shujtaj ladopi canga. ¿Chai huauquihuan cutin alli tucungapajca imatataj rurana cangui? Jesusca shuj huauquihuan problemacunata charishpa imata ruranatami yachachirca (Mateo 5:24-ta leyipai). Catij listapi maijan yuyai alli cashcata señalai.

SHUJ HUAUQUITA CAN LLAQUICHISHCA CASHPACA:

• Can culpata charishcata yuyashpallami paihuan parlanacuna cangui.

• Chai huauqui deganamanta pꞌiñarishcata, paipish culpata charishcatami ricuchina cangui.

• Llaquichishca huauqui ima shina sintirishcata parlacujpica allimi uyana cangui. Pai nishcataca manachari tucuita intindingui. Pero shungumantami “perdonahuai mana chashna llaquichisha nircanichu” nina cangui.

SHUJ HUAUQUI CANTA LLAQUICHIJPICA:

• Cambaj lado tucuchunmi shujtaj huauqui panicunaman “paimi ñucata llaquichirca” nishpa parlana cangui.

• Pai culpata charishcata cuentata cuchunmi tucui imalla rurashcata yuyachina cangui.

• Llaquichij huauquica pingaita saquishpa, mana jatun tucushpa canhuan parlanacungapajmi esforzarishca canga. Chaimantami tucui shunguhuan perdonana cangui.

Cunan punllacunapica Diosmanca mana animalcunata cunchijchu. Pero Jesusca Dios munashca shina adorangapajca shujtajcunahuan allimi tucuna canguichij nircami. ¿Imamantataj Jesusca chaita nirca?