Cai mundopi millai gentecunaca mana allica allimi can, allica mana allichu can nishpami yuyancuna (Is 5:20). Chaimantami Dios millanayachishca cosascunata rurancuna, hasta cꞌaripura huarmipurami huainayancuna. Escuelapi compañerocunapish, shujtaj gentecunapish huahuacunataca paicuna shina cachunmi invitancuna. ¿Yaya mamacuna, cancunapaj huahuacuna chaicunapi ama urmachunca ima shinataj ayudai tucunguichij?

Dios mandashcacunata yachachichij (Le 18:3). Huahuacunamanca chayarinamanta Biblia imata yachachishcata yachachichij. Mashna huatacunata charishcata ricushpa, mashnata intindi tucushcata ricushpa yachachichij (Dt 6:7). Cashna tapurichij: “¿Ñuca huahuacunamanca shujtajcunata mana japirinalla, mana maipipish tuparinalla cashcata yachachicunichu? ¿Alli churarina cashcata yachachicunichu? ¿Shujtajcuna paicunata respetana cashcata yachachicunichu? ¿Maijan lluchulla gentecunata, huainayacuj gentecunata ricuchisha nijpi o mana allicunata rurachun nijpica ñucanchij huahuacuna imata ruranata yachanchu?” Huahuacunaca caicunata alli intindishpaca llaquicunapica mana urmangacunachu (Pr 27:12; Ec 7:12). Yaya mamacuna, huahuacunata alli huiñachishpaca Jehová Dios cushca herenciatami valorashcata ricuchinguichij (Sl 127:3).

HUASI AMA URMACHUNCA ALLI SHAYACHISHUNCHIJ: ‘MANA ALLI’ RURAICUNAMANTA HUAHUACUNATA CUIDASHPA NISHCA VIDEOTA RICUSHCA QꞌUIPA CAI TAPUICUNATA CONTESTAI:

• ¿Maijancunaca imamantataj paipaj huahuacunamanca chayarinamanta mana yachachincuna?

• ¿Yaya mamacunaca imamantataj huahuacunamanca Jehová Dios munashca shina huiñachina can? (Ef 6:4, La Biblia. Traducción del Nuevo Mundo).

• ¿Yaya mamacuna paicunapaj huahuacunaman chayarinamanta yachachichunca Diospaj organizacionca imatataj cushca? (w19.05 página 12).

• ¿Imamantataj llaquicunapi manaraj urmajpi cancunapaj huahuacunahuanca cutin cutin parlanacuna canguichij?