Samuelca paipaj tucui causaipimi Jehová Diostaca alli sirvirca. Paica huahuaraj cashpaca Elipaj churicuna Ofni, Finees shina mana alli ejemplocunaca mana casha nircachu (1Sa 2:22-26). Pai huiñashpa catijpica Jehová Diosca paitaca manataj saquircachu (1Sa 3:19). Samuelca paipaj churicuna Diosta mana alli sirvijpipish paica mayoryangacamami Jehová Diostaca tucuipi alli sirvirca (1Sa 8:1-5).

¿Samuelpaj ejemplomantaca imatataj yachai tucunchij? Jovencuna cancuna ima shina pruebacunata charishcata, ima shina sintirishcataca Diosca allimi yachan. Paillatajmi cancunataca ama manchaj cachun ayudanga (Is 41:10, 13). Yaya mamacunapish Samuelpaj ejemplomantami yachai tucunguichij. Cancunapaj huahuacuna Diosta sirvinata saquijpica paicunataca mana obligai tucunguichijchu. Samuelca paipaj churicuna Jehová Diosta mana sirvisha nijpica paica Yayitu Diosta sirvingapajmi tucui pudishcata rurarca. Chashnami Jehovataca cushichirca. Yaya mamacuna Jehová Diosta sirvinata manataj saquijpica cancunapaj huahuacunapishmi Diosta sirvisha ningacuna.

DIOSTA SIRVIJCUNAMANTA YACHASHUNCHIJ: SAMUEL NISHCA VIDEOTA RICUSHCA QꞌUIPACA CAI TAPUICUNATA CUTICHI:

• ¿Samuelca huahuaraj cashpaca ima shinataj mana manchaj cashcata ricuchirca?

• ¿Danielca ima shinataj mana manchaj cashcata ricuchirca?

• ¿Samuelca mayoryashpapish ima shinataj alli ejemplota ricuchirca?

• ¿Danielca ima shinataj yaya mamacunapajpish shuj alli ejemplo carca?