Ñucanchij congregacionpica achca huatacunata Diosta tucui shunguhuan sirvij huauqui panicunami tiyan. Paicunataca, “¿Diospaj organizacionca ñaupaca ima shinataj carca? ¿Jehová Dios ayudajpica ima llaquicunatataj chꞌimbapurashcangui?” nishpa tapushunchij. Chashnami paicunamanta achcata yachashun. Shinallataj familiahuan Diosta adoracushpaca paicunapaj experienciacunata parlachunmi mañai tucunchij.

Achca huatacunata Jehová Diosta sirvij huauqui o pani cashpaca cambaj experienciacunata jovencunaman parlai. Jacobpish Josepish paipaj huahuacunamanca Jehová Dios paicunamanta imata rurashcatami huillarca (Gé 48:21, 22; 50:24, 25). Qꞌuipaca Jehová Diosmi yaya mamacunataca paicunapaj huahuacunaman pai imallata rurashcata parlachun mañarca (Dt 4:9, 10; Sl 78:4-7). Cunan punllacunapish yaya mamacuna, shujtaj huauqui panicunaca Jehová Dios paipaj organizacionpi imallata rurashcatami jovencunaman parlai tucuncuna.

LLAQUICHIJPIPISH TANDALLAMI CANCHIJ NISHCA VIDEOTA RICUSHCA QꞌUIPA CAI TAPUICUNATA CUTICHI:

• ¿Diosmanta huillanata mana saquij llajtacunapi causaj huauqui panicunataca ima shinataj Austriamanta sucursalca ayudarca?

• ¿Chai huauqui panicunaca Diospi tucui shunguhuan crishpa catingapajca imatataj rurarcacuna?

• ¿Rumaniamanta achca huauqui panicunaca imamantataj Diospaj organizacionmanta caruyarcacuna? ¿Paicuna cutin Diospaj organizacionman tigrachunca imataj ayudarca?

• ¿Cai videoca ima shinataj sinchi feta charichun ayudan?