Jesús huañushcata yuyarina tandanacuipica, Jesusmanta sumaj bendicioncunata charishcapimi yuyai tucunchij. Jesús huañushcamantami huañushcacunata cutin ricuna bendiciontapish charinchij. Jehová Diosca ñucanchij huañuchunca mana munarcachu. Chaimantami familiacuna huañujpica ñucanchij shungupi nanarishpa achcata llaquirinchij (1Co 15:26). Lázaro huañujpica Jesusta catijcuna huacacujta ricushpami Jesuspish achcata llaquirirca (Jn 11:33-35). Jesusca paipaj Yaya layami can. Chaimantami familiacuna huañujpica shungupi nanarishpa huacajta ricushpaca, Jehová Diospish achcata llaquirin (Jn 14:7). Jehová Diosca paita servijcunata causachina punlla chayamuchunmi munan, ñucanchijpish chaitami munanchij (Job 14:14, 15).

Jehová Diosca imata rurashpaca mana maipishcachun ruranchu (1Co 14:33, 40). Chaimantami huañushcacunata causachishpaca asha asha causachishpa catinga. Huañushca familiacunamanta huacanapaj randica cushicushpami causarishcacunata chasquishun. Chaimanta familia ucupi pi huañujpi o mana huañujpipish ¿huañushcacunata Jehová causachinapi yuyangapaj tiempota surcunguichu? (2Co 4:17, 18). ¿Huañushca familiacunata cutin ricunamanta Jehová Diosta pagui ninguichu? ¿Huañushcacuna causarinata Bibliapi yachachishcamantapish pagui ninguichu? (Col 3:15).

• ¿Pi familiata, pi amigotataj cutin ricusha ningui?

• ¿Ñaupa Diosta servijcunamantaca pitataj rijsisha ningui? ¿Imatataj tapusha ningui?