Jehová Dios pacienciata charishpapish ñallami tucui panda religioncunata tucuchinga. Qꞌuipaca millai gobiernocuna ñucanchijta llaquichisha nijpica Armagedón macanacuipimi millaicunatapish, gobiernocunatapish tucuchinga. Diosta sirvijcunaca Yayitu Dios ñucanchijta quishpichichunmi shuyacunchij.

Pero cai jatun llaqui punllacuna ima hora callarinataca mana yachanchijchu. Gobiernocunapish imata nishpa panda religioncunata tucuchinataca mana yachanchijchu. Gobiernocunapish ñucanchijta mashna tiempota, ima shina llaquichinataca mana yachanchijchu. Shinallataj Yayitu Dios Armagedón macanacuipi millaicunata ima shina tucuchinatapish mana yachanchijchu.

Shinapish Jehová Diosca ama manchachun, paipi confiachunmi huaquin cosascunata huillashca. Por ejemplo, pai huillashcamantami tucuri punllacuna quichquiyamucushcata yachanchij (2Ti 3:1). Gobiernocuna panda religioncunata tucuchicui horas Jehová Dios paipaj pueblota mana tucuchichun saquinatapish allimi yachanchij (Mt 24:22; 2Pe 2:9). Shinallataj Diosca millaicunata tucuchingapaj, allicunata quishpichingapajca Jesusta agllashcatapishmi yachanchij. Paica cashcata ruraj, poderosomi can (Ap 19:11, 15, 16).

Cai tucuita ricushpaca gentecunaca achcata mancharishpa, yallitaj sustarishpami chahuata huañungacuna (Lu 21:26). Pero ñucanchijca mana manchashunchu. Jehová Dios paipaj pueblota quishpichishcata yuyarishpa, ñucanchijtapish quishpichinata yachashpaca paipimi confiashun. Lucas 21:28-pica: “Tucui chaicuna ricuri callarijpica shayarishpa, cancunapaj umata jatarichichij. Cancunata quishpichina punllaca ñamari chayamucun” ninmi.