TAPUI 7
¿Bibliapaj profeciacunaca ima shinataj pajtaricun?
‘Mama llajtaca caishuj mama llajtahuan macanacungacunami, shinallataj jatun mandajcunapurapish macanacungacunami. Cai tucui llaquicunaca, nanai callaricuj shinallami canga.’
“Llulla profetacunapish achcacuna shamushpami, achcacunata umangacuna. Millai yallitaj mirajpica, achcacunapaj cꞌuyaimi chiriyanga.”
“Mai llajtacunapica, jatun macanacui huañunacuimi tiyan ninacujta uyanguichijmi. Chaita uyashpapish, ama mancharinguichijchu. Chashna jatun llaquicunaca tucunallatajmi. Chashna tucujpipish, cai pachaca manaraj tucuringachu.”
(Marcos 13:7, QC, 1989)
“Chꞌican chꞌican llajtacunapi pamba chujchushpa allpa tꞌimburicunami tiyanga. Achca yaricai, millai ungüicunapishmi tiyanga. Jahua pachapica jatun mancharinacuna, mana ricushca señalcunapishmi ricuringa.”
“Caitapishmi yachana cangui, cai punllacuna tucuringapajca llaqui punllacunami shamunga. Chai punllacunapica quiquinlla alli canata munajcuna, quiquinpajlla charinata munajcuna, jatun tucushcacuna, valishca tucujcuna, Taita Diosta cꞌamijcuna, yaya mamata mana cazujcuna, mana pagui nijcuna, Taita Diosta mana rijsijcuna, rumi shungucuna, pꞌiñarishpapish manataj cungarijcuna, yangamanta juchachijcuna, mana jarcari tucujcuna, pꞌiña millaicuna, allita pꞌiñajcuna, quiquin purallataj llaquipi churajcuna, jahualla pꞌiñarijcuna, imapish mana caipajta yuyajcuna, Taita Diosta mashcanapaj randica aicha munaipi cushicunallatami cꞌuyangacuna. Ricuipica Dios yuyailla caj shinami cangacuna. Ashtahuanpish paicuna rurashcahuanca Diosca mana tiyashca cashcatami ricuchingacuna.”