1. ¿Cai librota estudiashca qꞌuipaca imatataj tapurishcangui?

CAI libropica Bibliamanta huaquin yuyaicunatami yachashcangui. Por ejemplo, huiñai causaita charinamanta, huañushca huasha ima tucunamanta, huañushcacuna causarinamantapishmi ña yachashcangui (Eclesiastés 9:5; Juan 5:28, 29; Apocalipsis 21:3, 4). Canca ñachari testigo de Jehovacunahuan tandanacucungui. Paicuna Jesusta alli catijcuna cashcatachari cringui (Juan 13:35). Shinallataj Dioshuan alli apanacungapaj, paita sirvingapajchari decidircangui.  Chaimantachari: “¿Diosta ashtahuan sirvingapajca imatataj rurasha?” nishpa tapuringui.

2. ¿Etiopía llajtamanta shuj runaca imamantataj bautizarisha nirca?

² Punta siglopipish Etiopía llajtamanta shuj runaca, “¿Diosta ashtahuan sirvingapajca imatataj rurasha?” nishpami tapurirca. Jesús causarishca asha tiempo huashallami, paita catij Felipeca Etiope runaman Jesús Mesías cashcata huillarca. Chaimi Etiope runaca achcata cushicurca. Chaimantami paica: “Caipica yacu tiyanmari. ¿Manachu ñucaca cunanllataj bautizari tucuni?” nirca (Hechos 8:26-36).

3. a) ¿Jesusca paita catijcunataca imatataj mandarca? b) ¿Ima shinataj bautizana can?

³ Bibliapica Jehová Diosta sirvisha nishpaca bautizarinami cangui ninmi. Jesuspish paita catijcunamanca: ‘Ñuca yachacujcunata rurashpa bautizaichij’ nishpami mandarca (Mateo 28:19). Jesuspish bautizarishpami shuj ejemplota saquirca. Jesusta bautizashpaca yacutaca umallapi mana tallircachu. Ashtahuanpish tucui cuerpotami yacupi pambarca (Mateo 3:16). Cunan punllacunapish maijan bautizarijpica shinallatajmi yacupi tucui cuerpota pambanchij.

4. ¿Bautizarishpaca imatataj ricuchingui?

⁴ Bautizarishpaca Diosta sirvisha nishcata, paipaj amigo tucusha nishcatami tucuicunapaj ñaupajpi ricuchingui (Salmo 40:7, 8). Canca: “¿Bautizaringapajca imatataj rurana cani?” nishpachari tapuringui.

5. a) ¿Manaraj bautizarishpaca imatataj rurana cangui? b) ¿Tandanacuicunaman rinataca imamantataj mana saquina cangui?

⁵ Manaraj bautizarishpaca Jehová Diosta, Jesustami alli rijsina cangui. Bibliata yachashpami caita ña  rurai callarishcangui (Juan 17:3-ta liyipai *). Pero Bibliapi nishca shinaca Diospaj munai maijan cashcatami alli yachana cangui (Colosenses 1:9). Jehovahuan ashtahuan alli apanacungapajca Testigo de Jehovacunapaj tandanacuicunamanmi rina cangui. Chaiman rinataca mana saquinachu cangui (Hebreos 10:24, 25).

6. ¿Bautizaringapajca mashnatataj Bibliamanta yachana cangui?

⁶ Jehová Diosca Bibliamanta tucuita yachashpa bautizarichunca mana shuyanchu. Etiope runatapish tucuita yachashpa bautizarichunca mana shuyarcachu (Hechos 8:30, 31). Jehová Diosmanta yachanataca manataj saquishunchu (Eclesiastés 3:11). Pero bautizaringapajca puntapica Bibliamanta minishtirishca yuyaicunatami alli intindishpa crina cangui (Hebreos 5:12).

7. ¿Bibliata estudiashpaca imatataj yachashcangui?

⁷ Bibliapica: “Mana crishpaca, Dios munashcataca ima shina mana rurai tucuipajmi” ninmi (Hebreos 11:6). Chaimantami canca bautizaringapajca Diospi crina cangui. Bibliapica Jesusta catijcuna yachachishcata uyashpaca Corinto llajtamantaca “achcacunami crishpa bautizarircacuna” ninmi (Hechos 18:8). Shinallataj Bibliata estudiashpaca Dios ima nishcata tucui pajtachinatami crishcangui. Juchacunamanta, huañuimanta Jesús quishpichij cashcatapishmi crishcangui (Josué 23:14; Hechos 4:12; 2 Timoteo 3:16, 17).

8. ¿Shujtajcunaman huillangapajca imatataj rurana cangui?

⁸ Bibliamanta ashtahuan yachashpa, causaipi cambiocunata rurashpaca cambaj crishcacunatami  sinchiyachingui. Chashnami imata yachashcatapish shujtajcunaman huillanata munangui (Jeremías 20:9; 2 Corintios 4:13). Pero ¿maijancunamantaj huillai tucungui?

9, 10. a) ¿Can yachacushcataca maijancunamantaj huillai tucungui? b) ¿Huauqui panicunahuan predicangapajca imatataj rurana cangui?

⁹ Yachacushcataca cambaj familiacunaman, amigocunaman, vecinocunaman, escuelapi o trabajopi compañerocunamanmi huillai tucungui. Pero huillacushpaca siempremi cꞌuyaihuan, respetohuan parlana cangui. Tal vez asha tiempo qꞌuipacunaca huauqui panicunahuanmi predicanaman llujshi tucungui. ¿Predicanaman llujshingapajca imatataj rurana cangui? Bibliapi imallata yachashcatami cambaj causaipica pajtachina cangui. Qꞌuipaca predicanaman llujshingapajca canta yachachijmanmi parlana cangui. Pai ña can listo cashcata ricushca qꞌuipaca ishqui ancianocunahuanmi parlana canguichij.

¹⁰ Ishqui ancianocuna canhuan tandanacushpaca Bibliamanta minishtirishca yuyaicunata alli intindishcata, Dios munashca shina causacushcatami ricungacuna. Shinallataj testigo de Jehová de verdad tucusha nishcatami ricungacuna. Huauqui ancianocunaca congregacionpi cajcunatami cuidan. Chaimantami paicunahuan mana manchashpa parlanalla cangui (Hechos 20:28; 1 Pedro 5:2, 3). Ancianocunaca canhuan parlashca qꞌuipami huauqui panicunahuan predicanaman llujshi tucushcata o mana llujshi tucushcata huillangacuna.

11. ¿Manaraj predicanaman llujshishpaca imamantataj huaquin cambiocunata rurana cangui?

¹¹ Manaraj predicanaman llujshijpica ancianocunaca  “cambaj causaipi huaquin cambiocunatami rurana cangui” ningacunachari. ¿Imamanta? Predicacushpaca Diosta sirvijcuna cashcatami ricuchinchij. Chaimantami Diosta jatunyachingapajca alli causacushcata ricuchina canchij (1 Corintios 6:9, 10; Gálatas 5:19-21).

12. ¿Imamantataj tucuicuna arrepintirina canchij?

¹² Manaraj bautizarishpaca caitapishmi yachana cangui. Apóstol Pedroca: “Cancunapaj juchacunata pꞌichachun, llaquirishpa o arrepintirishpa Diospajman tigrarichij” nircami (Hechos 3:19, NVI, 1999). Arrepintirina nishpaca ñaupa mana alli cosascunata rurashcamanta arrepintirishpa dimastij llaquilla sintirina nisha ninmi. Por ejemplo, huainayashca cashpaca chai juchamantami arrepintirina cangui. Mana cashpaca allita rurangapajchari siempre esforzarishcangui. Chashnapish arrepintirinami cangui. Tucuicuna juchayujcuna cashcamantami Yaya Dios ñucanchijta perdonachun minishtinchij (Eclesiastés 7:20; Romanos 5:12).

13. ¿Diospajman tigrarichij nishpaca imatataj nisha nin?

¹³ Apóstol Pedroca: “Llaquirishpa Diospajman tigrarichij” nircami. Paica mana alli ruraicunata saquishpa, mushuj causaita callarina cashcatami nicurca. Caipi yuyai, canca shuj mana rijsishca llajtamanchari viajacungui. Ña achcata rishpachari mana chai llajtaman ricushcata cuentata cungui. Chaita cuentata cushpaca ¿imatataj ruranguiman? Carrota can manejacushpaca chai ratomi chaipi shayarishpa maiman ricushca llajtaman cutin tigranguiman. Chashnallatajmi cambaj causaipi Bibliamanta yachashpaca huaquin mana alli  ruraicunata saquina cashcata cuentata cungui. Ña cuentata cushpaca cambaj causaipi cambiocunata rurai.

14. ¿Diosman mingaringapajca imatataj rurana cangui?

¹⁴ Manaraj bautizarishpaca Diosmanmi mingarina cangui. Jehová Diosman mingaringapajca paitami mañana cangui. Mañacushpaca “tucui ñuca causaipimi canllata adorasha” nishpami mañana cangui (Deuteronomio 6:15).

15, 16. ¿Imamantataj Diosman mingarinchij?

¹⁵ Caipi yuyashun, shuj joven cazarasha nishpaca shuj solteratami alli rijsina can. Cai solterata ashtahuan rijsishpaca paica ñami cꞌuyai callarin. Cai solterata cꞌuyashcamantami cai jovenca “canhuanmi tucui vida causasha” nishpa cazaran. Shinallatajmi Diosta cꞌuyashpaca “tucui vidami canllata sirvisha” nishpa Diosman mingarinchij.

¹⁶ Diosta alli rijsishpaca paitaca achcatami cꞌuyangui. Paita cꞌuyashcamantami paiman mingarinata agllangui. Jesusca paita catijcunataca: “Maijanpish ñucata catisha nijca, quiquin causaita ama llaquichun” nircami (Marcos 8:34). “Quiquin causaita ama llaquichun” nishpaca Jehová Diosta tucuimanta yalli cazuna cashcatami nicun. Paita cꞌuyashcamantami, can munashcacunata huashaman saquishpa Diostaraj cazuna cangui (1 Pedro 4:2-ta liyipai).

17. ¿Maijancunaca imamantataj Diosman mana mingarincuna?

¹⁷ Maijancunaca Diospaj munaita mana pajtachi pudishachu nishpami Diosman mana mingarincuna. Pandarishpaca  Diostami pingaipi saquisha nishpachari yuyancuna. Mana cashpaca Diosman mana mingarishpa, mana allita rurajpipish Diosca mana juzgangachu nishpachari yuyancuna.

18. ¿Diosta pingaipi saquinata ama manchangapajca imatataj rurana cangui?

¹⁸ Diosta pingaipi saquinata ama manchangapajca paitami cꞌuyana cangui. Diosta cꞌuyashpami paipaj munaita pajtachingui (Eclesiastés 5:4; Colosenses 1:10, NM). Apóstol Juanca: “Diosta cꞌuyacushcataca pai mandashcacunata cazushpami ricuchina. Pai mandashcacunata cazunaca mana sinchichu” can nircami (1 Juan 5:3).

19. ¿Diosman mingarinataca imamantataj mana manchana cangui?

¹⁹ Diosman mingaringapajca jucha illaj canaca mana minishtirinchu. Paica ñucanchij mana rurai tucushcataca mana mañanchu (Salmo 103:14). Ashtahuanpish can allita rurachunca Diosmi ayudanga (Isaías 41:10). Bibliapica: “Paimi cantaca alli ñanta pushanga” ninmi. Chaimantami tucui shunguhuan Jehová Diospi confiana cangui (Proverbios 3:5, 6).

20. ¿Diosman mingarishca qꞌuipaca imatataj rurana cangui?

²⁰ Canca Jehová Diosman mingaringapajca ¿ñachu listo cangui? Diosman mingarishca qꞌuipami bautizari tucungui.

21, 22. ¿Diospi crishcata shujtajcunapaj ñaupajpi ricuchingapajca imatataj rurana cangui?

²¹ ¿Diosman mingarishca qꞌuipa bautizaringapajca imatataj rurana cangui? Congregacionmanta shuj ancianohuanmi parlana cangui. Qꞌuipaca huaquin ancianocunami Bibliamanta minishtirishca yuyaicunata  repasangapaj canhuan tandanacungacuna. Ña bautizaringapaj listo cashcata ricushpaca catij jatun tandanacuipi bautizarichunmi huillangacuna. Chai jatun tandanacuipica shuj conferenciatami bautizarigrijcunaman cunga. Chai conferenciata cuj huauquica ishqui tapuitami ruranga. Cai tapuicunata contestashpaca shujtajcunapaj ñaupajpimi Diospi crishcata ricuchingui (Romanos 10:10).

 ²² Chai qꞌuipaca bautizari tucunguimi. Bautizangapajca yacupimi cantaca tucui cuerpota pambangacuna. Bautizarishpaca tucui gentecunapaj ñaupajpimi Diosman mingarishcata, testigo de Jehová tucushcata ricuchingui.

23. ¿“Yayapaj, Churipaj, jucha illaj espiritupaj shutipi” bautizarinaca imatataj nisha nin?

²³ Jesusca paita catijcunataca: ‘Yayapaj, Churipaj, jucha illaj espiritupaj shutipi bautizaichij’ nircami (Mateo 28:19-ta liyipai). Yayapaj shutipi bautizarishpaca Jehová Dioslla tucui mandana poderta charishcatami crinchij. Churipaj shutipi bautizarishpaca Jehová Dios paipaj munaita pajtachingapaj Jesusta agllashcatami crinchij. Cutin espíritu santopaj shutipi bautizarishpaca Jehová paipaj espíritu santohuan paipaj munaita pajtachinatapishmi crinchij (Salmo 83:18; Mateo 28:18; Gálatas 5:22, 23; 2 Pedro 1:21).

24, 25. a) ¿Yacupi tucui pambarishpaca imatataj ricuchingui? b) ¿Yacumanta llujshishpaca imatataj ricuchingui? c) ¿Capítulo 19-pica imatataj yachashun?

²⁴ Cambaj tucui cuerpota yacupi pambashpaca ñaupa causaita huashaman saquishcatami ricuchingui. Cutin yacumanta llujshishpaca Jehovapaj munaita rurangapaj mushuj causaita callarishcatami ricuchingui. Chai punllamantami testigo de Jehová cashcata ricuchingui. Yuyari, canca mana shuj genteman, mana shuj organizacionman mingarishcanguichu. Ashtahuanpish cambaj causaitaca Diosmanmi mingarishcangui.

²⁵ Diosman mingarishpa, bautizarishpaca Jehová Diospaj alli amigomi tucungui (Salmo 25:14). Pero bautizarishpallaca mana quishpiringuichu. Apóstol Pabloca: ‘Cancuna quishpiringapajca allita rurana yuyailla caichij’ nircami (Filipenses 2:12, QC, 1989). Bautizarishca qꞌuipaca Diostami sirvishpa catina cangui. Paimanta amataj caruyangapaj imata rurana cashcatami tucuri capitulopi yachashun.