1, 2. ¿Bibliaca imamantataj shuj valishca regalo can?

SHUJ amigo ñucanchijman alaja regalota cujpica pagui nishpami chasquinchij. Sumaj regalo cashcata ricushpami chai rato utilizanata munanchij ¿nachu?

² Bibliaca Dios cushca sumaj regalomi can. Chaipi tiyaj yuyaicunaca shujtaj librocunapica mana tiyanchu. Por ejemplo, Bibliapica Diosmi jahua pachata, cai pachata, punta cꞌarita, punta huarmita rurarca ninmi. Shinallataj ñucanchij problemacunata ima shina allichinatami Bibliapica yachachin. Ashtahuancarin Bibliapica, Diosmi cai Allpataca mushujta ruranga ninmi.

3. ¿Imamantataj Bibliata yachana cangui?

³ Yayitu Diosca paipaj amigo tucuchun munashpami Bibliata cushca. Chaimantami Bibliata estudiana cangui. Chashnami Diostaca cꞌuyai callaringui.

4. a) ¿Bibliaca mashna shimicunapitaj tiyan? b) ¿Cada semana mashna gentecunataj Bibliata chasquincuna?

⁴ Biblia laya shujtaj libroca mana tiyanchu. Bibliaca 3.200 yalli shimicunapimi tiyan. Chaimantami casi tucui gentecuna Bibliataca paicunapaj propio shimipi liyi tucuncuna. Shinallataj cada semanami más de un millón yalli gentecunaca Bibliata chasquincuna.

5. ¿Diosca Bibliataca ima shinataj quillcachirca?

⁵ Diosmi Bibliataca quillcachirca (2 Timoteo 3:16-ta liyipai). Maijancunaca ‘Bibliataca gentecunami  quillcashca, maitataj Diosmantaca shamungari’ nincunami. Pero Bibliapi nishca shinaca, Diosmi huaquin cꞌaricunaman espíritu santota cushpa Bibliataca quillcachirca (2 Pedro 1:21). Yuyashun. Shuj abogadoca paipaj yuyaicunatami shuj cartapi escribichun paipaj secretariota mañan. ¿Cai cartapaj yuyaicunaca pipajtaj canga? Secretario quillcashca cajpipish yuyaicunaca abogadopajmi can. Shinallatajmi Diosca Bibliata quillcachunca huaquin runacunata agllarca. Cai runacunaca mana paicunapaj yuyaicunatachu Bibliapica quillcarcacuna. Paicunaca Diospaj yuyaicunatami quillcarcacuna. Chaimantami Bibliaca Diospaj Shimitajmi can ninchij (1 Tesalonicenses 2:13; nota 2-ta ricui).

6, 7. ¿Imamantataj Bibliaca imapi mana pandarin ninchij?

⁶ Bibliata quillcajcunaca campopi trabajajcuna, pescadota japijcuna, michijcuna, profetacuna, juezcuna, mandajcunami carca. Shujcarin doctormi carca. Paicunaca chꞌican chꞌican huatacunapimi causarcacuna. Chaimantami Bibliataca 1.600 huatacunapi tucui quillcarcacuna. Chꞌican chꞌican runacuna escribishca cajpipish Bibliaca imapi mana pandarinchu, callarimanta tucuringacamami shuj yuyaillata charin. *

⁷ Bibliaca callarimanta gentecuna ima shina causashcata, Yaya Dios paipaj nishcacunata pajtachij cashcatami huillan. Génesis libropimi cai Allpapi llaquicuna ima shina tiyai callarishcata ricuchin. Cutin, Apocalipsis libropica Jehová Dios llaquicunata tucuchishpa cai Allpapi sumaj paraisota ruranatami huillan.

8. a) ¿Diosca ungüicunamantaca imatataj israelitacunamanca nirca? b) ¿Bibliaca Allpamantaca imatataj nin?

⁸ Bibliaca escuelacunapi Allpamanta, animalitocunamanta mana yachachingapajchu can. Shinapish chaicunamanta parlashpaca Bibliaca mana pandarishpami tucuita yachachin. Por ejemplo, ñaupa tiempo gentecunaca ungüicuna ima shina contagiarij cashcataca mana yacharcacunachu. Pero Jehová Diosca Israel gentecunamanmi ungüicuna ama mirashpa catichun imata ruranata huillarca. Chaitaca Levítico libropimi liyi tucunchij. Shinallataj achca gentecunami  cai Allpaca planomi can nijcuna carca. Pero Bibliapica Allpaca redondomi can ninmi (Isaías 40:22). Ashtahuanpish Bibliapica, cai Allpaca ‘imapi mana huarcushcachu can’ ninmi (Job 26:7).

9. ¿Bibliata quillcajcunaca imallatataj mana pacashpa escribircacuna?

⁹ Ñaupa tiempo gentecunamanta parlashpaca Bibliaca mana llullashpami cabalta huillan. Huaquincunaca paicunapaj llajtacunamanta quillcashpaca mana tucuita huillancunachu. Por ejemplo, paicunapaj llajtapi macanacuita pirdishcataca mana tucuita quillcancunachu. Pero Bibliata quillcajcunaca Israel llajta macanacuipi pirdishcataca mana pacashpami quillcarcacuna. Shinallataj Bibliata quillcajcunaca paicunapaj pandarishcacunataca mana pacarcacunachu. Por ejemplo, Salmo 51-pica rey Davidca jatun juchata ima shina rurashcatami mana pacashpa escribirca. Chai runacuna imatapish mana pacashpa quillcashcamantami Bibliaca Diospaj Shimitaj cashcata crinchij.

10. ¿Bibliapaj consejocunaca imamantataj cunancama valishca can?

¹⁰ ‘Diospaj Shimica, paillataj quillcachishca cashcamantami yachachingapaj, cashcata rimangapaj, cunangapaj, yachachingapajpish alli’ (2 Timoteo 3:16). Chaimantami Bibliapaj consejocunaca cunancama valishca can. Diosca ñucanchijcuna cushilla causachunmi munan. Paica ñucanchijcuna imata yuyajta, ima shina sintirijtapish allimi intindin. Yaya Dios ñucanchijta rurashcamantami ñucanchijpaj ima alli cashcata yachan.

11, 12. ¿Bibliapica ima alli consejocunatataj yachai tucunchij?

¹¹ Jesusca cushilla causangapaj, tucuicunahuan alli apanacungapajca imata ruranatami yachachirca. Shinallataj  Yaya Diosta ima shina mañanata, cullquillapi mana yuyana cashcatapishmi yachachirca. Chaitaca Mateo capítulo 5, 6, 7-pimi liyi tucunchij. 2.000 huatacuna huashaman Jesús cai consejocunata cushca cajpipish cunancamami valishca can.

¹² Bibliapica familiahuan alli causangapaj, alli trabajador cangapajmi sumaj consejocuna tiyan. Maipi causashpapish, ima llaquicunata apacushpapish Biblia yachachishcacunata cazushpaca contentomi causashun (Isaías 48:17-ta liyipai; nota 3-ta ricui).

13. ¿Isaiasca Babilonia llajta ima tucunatataj huillarca?

¹³ Bibliapi tiyaj profeciacunaca siempremi pajtarishca. Por ejemplo, Diosca profeta Isaiasmanmi Babilonia llajta ima shina tucuchishca canata huillarca (Isaías 13:19). Babiloniata ama llaquichichunca jatun pungucunahuanmi huichcashpa charijcuna carca. Cai llajtapaj muyundijtaca shuj jatun yacupishmi pasaj carca. Pero Isaiasca, ‘chai yacucunaca chaquiringami, pungucunapish pascashcami saquiringa. Contracunaca cai llajtata tucuchingapajca mana macanacunata minishtingachu. Ciro shuti mandajmi Babiloniataca tucuchinga’ nircami (Isaías 44:27, 28; 45:1, 2-ta liyipai; nota 4-ta ricui).

14, 15. ¿Isaías nishcacunaca ima shinataj pajtarirca?

¹⁴ 200 huatacuna qꞌuipami Isaías nishca profeciacunaca pajtarirca. Babiloniata tucuchingapajca Persia llajtamanta soldadocunami shamurca. Cai soldadocunata pushajca ¿pitaj carca? Isaías huillashca shinaca Persia llajtata mandaj Ciromi carca. ¿Imataj ashtahuan pajtarina carca?

 ¹⁵ Persia soldadocuna llaquichi tutaca, babiloniocunaca jatun fiestatami ruracurcacuna. Paicunaca, ‘ñucanchij llajtaca jatun pircacunayuj, yacupish muyundijtamari, mana pi llaquichingachu’ nishpami yuyashcangacuna. Pero Babilonia canlla ladomanca, Ciroca paipaj soldadocunahuanmi chai yacuta chaquichingapaj shuj larcata rurarca. Yacu ashata chaquirijpimi  paicunaca Babilonia punguman chayarcacuna. Isaías nishca shinami chai pungucunaca pascashca saquirishca carca. Chaimi Persia soldadocunaca mana macanacushpa Babiloniaman yaicurcacuna.

16. a) ¿Isaiasca Babilonia llajtamantaca imatataj huillarca? b) ¿Babilonia tiyashca pushtuca cunanca ima shinataj can?

¹⁶ Isaiasca ‘Babiloniapica ni pi ña manataj causangachu’ nircami (Isaías 13:20). ¿Isaías nishca shimicunaca pajtarircachu? Ari. Babilonia tiyashca pushtuca cunanca shitashca rumicuna jundami can, pi mana causanchu. Chai pushtuca Bagdad pueblo cꞌuchullapimi saquirin. Chaica Irak llajtapimi can. Bibliapi nishca shinaca Jehová Diosmi shuj escobahuan pꞌichacushca shina tucuita chingachirca (Isaías 14:22, 23).

17. ¿Jehová Dios nishcacunapica imamantataj crinchij?

¹⁷ Bibliapi nishca shimicunaca siempremi pajtarishca. Chaimantami shamuj punllacunapi Biblia ima nishcacuna pajtarinatapish crinchij. Yayitu Diosca ñucanchijcuna huiñaita causachunmi munan. Paica  ‘mana llullaj Diosmi can’ (Tito 1:2). Chaimantami Jehová Dios cai Allpata sumaj paraisota ruranataca crinchij (Números 23:19-ta liyipai). *

18. ¿Apóstol Pabloca Diospaj Shimimantaca imatataj nirca?

¹⁸ Bibliaca shujtaj librocuna shina mana pandarinchu. Cai Allpamanta, ñaupa tiempo gentecunamanta parlashpaca verdadtami huillan. Bibliapi tiyaj consejocunaca ñucanchij allipajllatajmi can. Shinallataj achca profeciacunapish ñami pajtarishca. Chaimantami apóstol Pabloca: “Diospaj Shimica causajmi, tucuita rurai tucujmi” nirca (Hebreos 4:12-ta liyipai).

19, 20. a) ¿Imamantataj Bibliataca estudiana canchij? b) ¿Dios cushca sumaj regalomantaca ima shinataj pagui ni tucunchij?

¹⁹ ¿Imamantataj Bibliataca estudiana canchij? Bibliata yachashpaca cushillami causashun. Shinallataj ñucanchij yuyaicuna, munaicuna ima shina cajtapishmi yachashun. Diostami cꞌuyanchij ninchijchari. Pero Diosta cꞌuyashcata ricuchingapajca Bibliapi tiyaj mandashcacunatami cazuna canchij.

²⁰ Bibliaca Diospaj yuyaicunatami charin. Chai sumaj librota cushcamanta Jehová Diosta pagui nishunchij. Paica Bibliata estudiachun, chaipi tiyaj yuyaicunata valichichunmi munan. Diospaj Shimita estudiashpami Diospaj munai maijan cashcata alli intindishun. ¿Diospaj munaica maijantaj can? Caitaca catij temapimi yachashun.