Babiloniata shujtaj mandajca Media nishca llajtamanta Dariomi carca. Paica Daniel yachaisapa cashcata ricushpami shujtaj mandajcunata mandachun churarca. Pero chai mandajcunaca envidiamantami Danielta llaquichisha nircacuna. Paicunaca Daniel punllapi quimsa cutin Diosta mañaj cashcatami yacharcacuna. Chaimantami Dariotaca, ‘jatun mandajlla canllata gentecuna mañachunmi shuj leyta churana cangui. Mana cazujtaca leoncunapaj jutcupimi shitana cangui’ nircacuna. Alli ricurijpimi Darioca chai leyta firmarca.

Mushuj ley llujshishcata Daniel yachashpaca paipaj huasimanmi rirca. Chayashpaca ventanata pascashpami cungurishpa Diosta mañarca. Ñapishmi mandajcunaca Danielpaj huasiman yaicurcacuna. Chaipi pai Diosta mañacujtami japirca. Chaimantami Darioman huillanaman callpashpa rircacuna. Paipajman chayashpami, ‘Danielca cantaca mana cazunchu. Punllapi quimsa cutinmi paipaj Diosta mañacun’ nircacuna. Shina nijpica Darioca Danielta llaquishcamantami mana huañuchichun munarca. Tucui punllami ima shina quishpichinata yuyacurcalla. Pero leypi ña firmashca cashcamantami mana imata rurai tucurca. Chaimi Danieltaca pꞌiña leoncunapaj jutcupi shitachun mandarca.

 Chai tutaca Danielmanta sustarishpami Darioca mana dormi tucurca. Cayandij tutamanta jutcuman callpashpa rishpami, ‘¡Daniel cambaj Diosca ¿quishpichircachu?!’ nishpa caparirca.

Darío caparijta uyashpami Danielca, ‘Yaya Diospaj ángel leoncunapaj shimita huichcajpimi ñucataca mana imata rurarca’ nirca. Darioca achcata cushicushpami jutcumanta llujshichichun mandarca. Danieltaca leoncunaca mana aspishcallapishchu carca. Qꞌuipaca reyca, ‘¡Danielta juchachij mandajcunataca leoncunapaj jutcupi shitaichij!’ nircami. Shitajpica leoncunaca chai ratomi micurcacuna.

Darioca, ‘leoncunapaj shimimanta Danielta quishpichij Diostaca tucuicunami cazuna canguichij’ nircami.

¿Canpish Daniel shina Jehová Diosta cada punlla mañanguichu?