Apostolcunapaj ñaupajpi Jesús ricurishca asha punllacuna qꞌuipaca Galilea cuchapi pescadocunata japinamanmi Pedroca rirca. Tomás, Santiago, Juan, shujtaj discipulocunapishmi paihuan rircacuna. Tucui tuta linchita yacuman shitashpapish imata mana japircacunachu.

Ña pacaricujpimi shuj runa mama cucha uripi shayacujta ricurcacuna. Chai runa, ‘¿pescadota japircanguichijchu?’ nijpimi paicunaca, ‘imata mana japinchijchu’ nircacuna. Chai runaca, ‘barcopaj alli ladoman linchita shitaichij’ nircami. Linchita shitajpica pescadocuna jundajpimi Barcoman mana llujshichi tucurcacuna. Juanca Jesús cashcata cuentata cushpami, ‘¡paica Jesusmari!’ nirca. Chaita uyashpami Pedroca saltashcahuan nadashpa rirca. Caishujcunaca barcopi catishpami rircacuna.

Cucha uriman chayashpaca nina jahuapi pescado cusaricujta, tandapish tiyacujtami ricurcacuna. Jesusca, ‘cunan cancuna  japimushca asha pescadocunata apamuichij, cusangapaj’ nircami. Qꞌuipaca, ‘shamuichij, micunguichij’ nircami.

Micushca qꞌuipaca Jesusca, ‘¿cai pescadocunata yallichu ñucata cꞌuyangui?’ nishpami Pedrota tapurca. Paica, ‘ari amito, canta cꞌuyashcataca yachanguimi’ nircami. Shina nijpimi Jesusca, ‘ñuca ovejacunata cuidangui’ nirca. Qꞌuipaca cutinmi, ‘¿ñucataca cꞌuyanguichu?’ nijpi Pedroca, ‘ari amito, canta cꞌuyashcataca yachanguimi’ nirca. Chashna nijpimi, ‘ñuca ovejacunata michingui’ nirca. Quimsa cutinmi Jesusca chaillatataj tapurca. Chaimi Pedroca llaquirishpa, ‘amito canca tucuitami yachangui. Canta cꞌuyashcatapish yachanguimi’ nirca. Jesusca, ‘ñuca ovejacunata cuidangui’ nishpaca ‘ñucata catinatapish ama saquingui’ nircami.