LECCIÓN 8
Abrahampish Sarapish Diosta cazurcacunami
Babel llajtamanta asha carupimi Ur shuti llajta tiyarca. Chaipi causajcunaca Jehová Diosta adoranapaj randica achca yanga dioscunatami adorarcacuna. Pero Ur llajtapica Diosta adoraj Abraham (Abrahán) runami causarca.
Diosca Abrahamtaca, ‘cambaj llajtamanta llujshishpa, cambaj familiatapish saquishpa ri. Ñucami can maiman rinata ricuchisha’ nircami. Qꞌuipaca Diosca, ‘canmantami shuj jatun llajtata rurasha. Cai pachapi tucui causajcunapish canmantami bendicioncunata chasquingacuna’ nircami.
Abrahamca Dios maiman cachasha nishcata mana yachashpapish paipi crircami. Abrahampish paipaj huarmi Sarapish paipaj yaya Tarepish paipaj sobrino Lotpish Diostami cazurcacuna. Paicunaca caru llajtaman ringapajmi imalla apanata allichircacuna.
Jehová ricuchisha nishca llajtaman paipaj familiandij Abraham chayashpaca 75 huatacunatami charirca. Chai llajtaca Canaán shutimi carca. Chaipimi Diosca Abrahamtaca, ‘cambaj huahuacunamanca cai llajtatami cusha’ nirca. Pero Abrahampish Sarapish yuyajcuna cashcamantami huahuacunata mana charircacuna. Shinashpaca ¿ima shinataj Diosca pai nishcata pajtachina carca?
‘Crishcamantami Abrahampish Diosta cazushpa paiman cuna llajtata japinamanta, maiman ricushcata mana yachashpapish paipaj llajtamanta llujshishpa rircalla’ (Hebreos 11:8).
