Moisés Sinaí urcupi cajpimi Diosca shuj jatun carpa huasita rurachun mandarca. Chai carpa huasica mana shujtaj huasicuna layachu cana carca. Ashtahuanpish israelitacuna Jehová Diosta adorana huasimi cana carca. Chaitaca maimanpish apashpa rinallami carca.

Diosca Moisestaca, ‘jatun carpa huasita rurangapaj, israelitacunataca imalla charishcacunata apamuchun mañai’ nircami. Paicunaca curita, cullquita, cobreta, achij nicuj rumicunatami apamurcacuna. Chashnallataj millmata, linota, animalcunapaj carata, shujtaj cosascunatapishmi apamurcacuna. Shungumantami achcata curcacuna. Chaimantami Moisesca, ‘chailla ama ashtahuan apamuichijchu’ nirca.

Alli yachaj achca cꞌaricuna, huarmicunami carpa huasita rurashpa ayudarcacuna. Trabajo alli llujshichunca Diosmi alli yuyaita paicunaman curca. Huaquincunaca puchcarcacuna, ahuarcacuna, bordarcacuna. Shujtajcunaca orohuan, rumihuanmi trabajarcacuna. Caishujcunaca tablacunata rurajcunami carca.

Dios mandashca shinami carpa huasitaca rurarcacuna. Chai carpa huasi ishqui ucuta charichunmi shuj alhaja cortinata rurarcacuna. Shujca Diospaj ucumi carca. Caishujca Diospajlla ashtahuan chꞌicanyachishca ucumi carca. Cai ucupica acacia caspihuan, orohuan rurashca shuj cajami tiyarca. Chaitami Dioshuan ari ninacushca arca nijcuna carca. Cutin Diospaj ucupica orohuan rurashca candelabro, shuj mesa, inciensota rupachina shuj altarmi tiyarca. Patiopica cobrehuan rurashca batea, sacrificiocunata cunapaj shuj jatun altarmi tiyarca. ¿Dioshuan ari ninacushca arcata  israelitacuna ricushpaca imatataj yuyarijcuna carca? Jehová Diosllata cazusha nishcatami yuyarijcuna carca.

Diosca Aaronta paipaj churicunatapish carpa huasipi sacerdotecuna cachunmi agllarca. Paicunami chai carpa huasitaca cuidashpa Diosman sacrificiocunatapish cuna carca. Diospajlla ashtahuan chꞌicanyachishca ucumanca sacerdoteta mandajllami yaicuna carca. Huatapica shuj cutinllami, paipaj juchamanta, paipaj familiapaj juchamanta, tucui israelitacunapaj juchacunamantapish sacrificiocunata Diosman cungapaj yaicuna carca.

Israelitacunaca Egiptomanta llujshishca shuj huata qꞌuipami Diospaj carpa huasitaca rurashpa tucuchircacuna. Diosta adorangapajca ñami shuj huasita charircacuna.

Diosca shuj pꞌuyutami chai carpa huasi jahuapi churarca. Chashnami carpa huasita rurashcamanta cushilla cashcata ricuchirca. Chai pꞌuyu carpa huasi jahuapi saquirijpica israelitacunaca chaipimi saquirina carca. Pero chai pꞌuyu shujtaj ladoman rijpica paicunapishmi rina carca. Diospaj carpa huasita apashpami pꞌuyuta catijcuna carca.