Jehová Diosca Samueltaca, ‘Isaipajman (Jesé) ri. Paipaj churicunamantaca shujtami Israelta mandachun agllarcani’ nircami. Chaimi Samuelca Isaipaj huasiman rirca. Paipaj punta churita ricushpaca paimi agllashca canga nishpami yuyarca. Pero Diosca Samueltaca, ‘mana paichu can. Runaca ñahui ricushcallatami ricun. Ñucaca shungutami ricuni’ nircami.

Isaica caishuj 6 churicunatami Samuelpajman pushamurca. Samuelca, ‘caicunataca Diosca pita mana agllashcachu. ¿Caicunallachu cambaj churicunaca?’ nirca. Isaica, ‘tucuicunapaj qꞌuipa uchilla churi Davidllami ovejacunata michicun’ nircami. David chayajpimi Diosca, ‘paitami agllarcani’ nirca. Chaimi Samuelca Davidpaj umapi aceiteta churarca. Chashnami Davidta Israel llajtapi catij mandaj cachun agllashcata ricuchirca.

Asha tiempo qꞌuipaca israelitacunaca filisteocunahuanmi macanacucurcacuna. Filisteocunamantaca Goliat shuti jatun macanacuj runami tiyarca. Paica punllantami israelitacunataca chanzata rurashpa, ‘ñucahuan macanacuchun shuj runata cachaichij. Pai mishajpica ñucanchijmi cancunata sirvishun. Pero, ñuca paita mishajpica, cancunami ñucanchijta sirvinguichij’ nishpa caparij carca.

Davidpaj huauquicunaca soldadocunami carca. Chaimantami Davidca soldadocunapaj carpa huasicunaman micunata apashpa rirca. Chaipimi Goliat caparicujta uyashpaca, ‘ñucami paihuan macanacugrisha’ nirca.  Saulca, ‘huambrarajmi cangui’ nircami. Davidca, ‘Jehovami ayudanga’ nircami.

Chaimantami Saulca paipaj macanacuna churanacunata curca. Pero Davidca, ‘cai churanahuanca mana macanacui tucunichu’ nircami. Davidca paipaj huaracata japishcahuan yacuman rishpami 5 llambujlla rumicunata agllashpa muchilapi churarca. Qꞌuipaca Goliatpajman callpashpami rirca. Goliatca caparishpami, ‘huambra cꞌuchuyailla, cambaj aichataca pajarocunaman, sacha animalcunamanmi carasha’ nirca. Davidca mana manchashpami, ‘canca ñucapajmanca espadahuan, lanzahuanmi shamungui. Ñucaca Jehovapaj shutipimi shamuni. Mana ñucanchijhuanchu macanacucungui. Dioshuanmi macanacucungui. Caipi tucui cajcunami Jehová Diosca espadatapish lanzatapish yalli poderta charishcata yachangacuna. Paimi cancunataca ñucanchij maquipi churanga’ nirca.

Qꞌuipaca Davidca paipaj huaracapi rumita churashpami tucui fuerzahuan shitarca. Jehovapaj ayudahuanca Goliatpaj frentepimi rumica yaicurca. Chashnami Goliatca huañurca. Caishuj filisteocunaca ama huañuchichunmi callpashpa rircacuna. ¿Canpish David layachu Jehová ayudanata tucui shunguhuan cringui?