Usya punllacunapimi Jehová Diosca Eliastaca, ‘Sarepta puebloman ri. Chaipimi shuj viuda micunata caranga’ nircami. Chai puebloman yaicuna pungupimi shuj huajcha huarmi yantata tandacujta ricurca. Chaipimi vasolla yacuta convidapai nirca. Yacuta apamugricujpimi Eliasca, ‘asha tandatapish apamupangui’ nirca. Viudaca, ‘tandataca mana charinichu. Nimata mana cui tucunichu. Ñucapaj, ñuca churipaj tandata rurangapajllami cutata, aceitetapish charini’ nirca. Eliasca, ‘Taita Diosca ñucapaj shuj uchilla tandata rurajpica tamyangacamami cutatapish aceitetapish charingui ninmi’ nircami.

Viudaca paipaj huasiman rishpami profeta Eliasman carangapaj tandata rurarca. Viudapish paipaj huahuapish tucui usya tiempopimi Jehová nishca shina micunata charirca. Puñupi tiyaj cutapish mangapi tiyaj aceitepish mana tucurircachu.

Qꞌuipaca shuj jatun llaquimi tiyarca. Viudapaj huahuami anchata ungushpa huañurca. Viudaca ayudahuai nishpami Eliasta rogarca. Eliasca huahuata paipaj mamapaj rigramanta marcashpami  jahua piso huasi ucuman aparca. Chaipica cama jahuapi sirichishpami, ‘Dioslla cai viudapaj huahuata causachihuai’ nishpa mañarca. ¿Imamantataj chai milagroca sumaj carca? Chai punllacamaca Diosca ni pita mana causachishcachu carca. Ashtahuanpish viudapish paipaj huahuapish mana israelitacunachu carca.

Huahuaca samaita aisashpami causarirca. Chaipimi Eliasca viudataca, ‘¡riqui, cambaj churica ñami causarin!’ nirca. Paica yallitaj cushicushpami Eliastaca, ‘Cunantajca canca Diospaj runataj cashcata yachanimi. Can nishcacunaca Jehovamantami shamun, chaimantami siempre pajtarin’ nircami.