Ima shinami cai folletopi yachashcangui, Bibliaca tucui familiapajmi achca ayudacunata charin. Diosca tucuicuna cushilla causachunmi munan. Shinallataj paita adoranata puntapi churajpica, Diosca ‘imalla illashcacunataca cancunamanca ashtahuanmi mirachinga’ (Mateo 6:​33). Diosca paipaj amigo cachunmi munan. Diospaj amigo canaca sumaj bendicionmi can. Chaimantami shujtaj ruraicunamanta tiempota surcuna cangui (Mateo 22:​37, 38).

BIBLIACA CAITAMI YACHACHIN: “ ‘Ñucaca, cancunapaj Yayami casha. Cancunaca ñuca churicuna, ushushicunami canguichij’ ninmi Tucuita Rurai Tucuj Jatun Diosca” (2 Corintios 6:​18). Diosca cambaj alli amigo cangapajmi munan. Diosta mañashpami paipajman cꞌuchuyai tucunchij. Bibliaca: “Taita Diosta mañanataca ama shaicunguichij” ninmi (1 Tesalonicenses 5:​17). Cambaj tucui llaquicunata, shungu ucupi tiyashca yuyaicunatapish paiman parlachunmi Diosca munan (Filipenses 4:​6). Cambaj familiahuan tandanacushpa Diosta mañajpica, paicunaca tucui shunguhuanmi Dios tiyashcata cringa.

Shinallataj Dios imata nishcatami uyana cangui. ¿Diosta uyangapajca imatataj rurana cangui? Bibliatapish, Bibliamanta yachachij publicacioncunatapishmi estudiana cangui (Salmo 1:​1, 2). Bibliapi imata yachashcatapish allimi yuyana cangui (Salmo 77:​11, 12). Tandanacuicunamanpish rinami cangui (Salmo 122:​1-4).

Shinallataj Diosmanta imata yachacushcatami shujtajcunaman parlana cangui. Chaita rurashpaca Diospaj alli amigomi tucungui. Diosmanta ashtahuan parlashpaca ashtahuanmi paipajman cꞌuchuyangui (Mateo 28:​19, 20).

CAITA RURAI:

• Diosta mañangapaj, Bibliata rezangapajpish tiempota surcui

• Shujtaj ruraicunata saquishpa Diosmanta yachanata puntapi churachun cambaj familiata ayudai

BIBLIACA CAITAMI YACHACHIN: “Diosman cꞌuchuyaichij, paipish cancunapajman cꞌuchuyangami” (Santiago 4:​8). Familiahuan Diosta adorangapajmi shuj punllata, shuj horasta agllana cangui a (Génesis 18:19). Tucuipimi Dios mandashcata yuyarina cangui. Cambaj familiapish Diospajman cꞌuchuyachunmi ayudana cangui. Bibliaca: “Cambaj huahuacunamanca punllanta cutin cutin yachachingui. Chai yachachishcacunataca huasipi cashpapish, ñanta puricushpapish, dormij siriricushpapish jataricushpapish yachachirangui” ninmi (Deuteronomio 6:​6, 7). Canpish Josué shinami: “Ñucapish, ñuca huasi familiapish Mandaj Diospajtami rurashun” nina cangui (Josué 24:15).

CAITA RURAI:

• Familiapi cada uno ima minishtishcata ricushpa alli yachachingapaj shuj programata rurai