Cusandij huarmindij, familiandij alli causangapaj tucuita alli rurajpipish, huaquinpica llaquicunaca mana yuyashcapimi ricurin. Chaimantami llaquilla causanchij (Eclesiastés 9:​11). Llaquicunata chꞌimbapurangapajca Diosca achca ayudacunatami cun. Biblia yachachishcata cazushpaca, canpish cambaj familiapish jatun llaquicuna japijpipish mishanguichijmi.

BIBLIACA CAITAMI YACHACHIN: ‘Diosmi cancunataca cuidacun. Chaimanta ima llaquicunata paiman mingaichij’ (1 Pedro 5:​7). Yuyari: llaquicunataca mana Dioschu cachan (Job 34:10). Diosman cꞌuchuyajpica, paica achcatami ayudanga (Isaías 41:10). Bibliaca: “Tucui shunguhuan paipaj ñaupajpi mañaichigari” ninmi (Salmo 62:​8.)

Tucui punllacuna Bibliata rezana, estudianapish achcatami ayudanga. Chashna rurajpica Diosmi ‘tucui ñucanchij llaquicunapipish cushichinga’ (2 Corintios 1:​3, 4; Romanos 15:​4). Shinallataj ‘Diospaj sumaj causaica, cancunapaj shungucunata, cancunapaj yuyaicunatapish Cristo Jesuspi huaquichingami’ (Filipenses 4:​6, 7, 13).

CAITA RURAI:

• Ama manchangapaj, alli yuyangapajpish Jehová Diospaj ayudata mañai

• Imata ruranata yachangapajca alli yuyashpa agllai

BIBLIACA CAITAMI YACHACHIN: “Yuyaisapa runaca alli yachaitaca, ashtahuanmi yachashpa catin. Yachaisapacunaca yachanataca, ashtahuanmi uyanachin” (Proverbios 18:15). Familiacuna ima minishtishcata tapushpa, paicuna imata parlashcata alli uyai (Proverbios 20:​5).

¿Shuj familia huañujpica imatataj rurai tucungui? Llaquilla cashcataca mana pingai tucushpa ricuchinallami cangui. Jesuspish mana pingai tucushpami ‘huacarca’ (Juan 11:35; Eclesiastés 3:​4). Alli samana, alli dorminapish minishtirishcami can (Eclesiastés 4:​6). Chashna ruranaca llaquicunata chꞌimbapurachunmi ayudanga.

CAITA RURAI:

• Llaquicuna manaraj chayajpimi familiapura alli parlanacuna cangui. Shinami llaquicuna chayajpica mana manchashpa canhuan parlangacuna

• Huaquin familiacunaca can charishca llaquicunataca ñami chꞌimbapurashca. Paicunahuan parlai

BIBLIACA CAITAMI YACHACHIN: “Alli apanacuj runaca paihuan apanacujtaca, tucui causaipimi cꞌuyan. Ima llaqui japijpipish, quiquin huauqui shinami llaquin” (Proverbios 17:17). Cambaj amigocunaca ayudanata munangami. Shinapish ima shina ayudanataca manachari yachanga. Chaimantami canta ima shina ayudachun munashcata parlana cangui (Proverbios 12:25). Shinallataj Biblia mandashcacunata pajtachingapaj Bibliamanta yachajcunata ayudachun mañai. Chashnami ñaupajman catingui (Santiago 5:​14).

Tucui shunguhuan Diospi crijcunahuan, Dios imata rurasha nishcata crijcunahuan tandanacushpaca, minishtishca ayudatami charingui. Shinallataj llaquilla cajcunata ayudashpapish achcatami cushicungui. Jehová Diospi crishcata, pai imata rurasha nishcatami shujtajcunaman parlana cangui. Shujtajcunata ayudashpa cati. Canta cꞌuyajcunamantapish amataj caruyaichu (Proverbios 18:1; 1 Corintios 15:58).

CAITA RURAI:

• Cambaj alli amigohuan parlai, pai ayudachun saqui

• Ima shina ayudachun munashcataca ama pingai tucushpa tucuita parlai