LECCIÓN 6
¿Huañushpaca imashi tucunchij?
1. ¿Huañushcacunata cutin ricushunchu?
Betania llajtaman Jesús chayajpica, paipaj amigo Lazaroca ñami chuscu punllata huañushca carca. Jesusca Lazaropaj panicuna Marta, Mariahuanmi Lazarota pambashca jutcuman rirca. Achca gentecunami ñapish tandanacurca. Lazarota Jesús causachijpica Martapish Mariapish achcatami cushicushcanga. Juan 11:21-24, 38-44-ta rezapai.
Huañushcacuna causarina alli huillaitapishmi Bibliaca yachachin. Cai Allpapi causachun huañushcacunata Jehová Dios causachina cashcataca, Martaca allimi yacharca. Job 14:14, 15-ta rezapai.
2. ¿Huañushpaca imataj tucunchij?
Diosca Adantaca nircami: ‘Allpamantami rurashca cangui. Huañushpaca allpallatajmi tucungui’ nishpa (GÉNESIS 3:19).
Gentecunaca “ñutu allpamanta” rurashcami canchij (Génesis 2:7; 3:19). Aichayuj tulluyujmi canchij. Ñucanchij cuerpo huañushca qꞌuipa, causashpa catij almataca mana charinchijchu. Gentecuna huañushpaca mana yuyanchu, mana imata sintinchu, ima llaquitapish mana charinchu. Lázaro causarishpaca huañushca cashpa imata rurashcataca mana parlarcachu. Eclesiastés 9:5, 6, 10-ta rezapai.
Huaquincunaca ninmi, huañushca qꞌuipaca ucu pachapimi Diosca gentecunata llaquichin nishpa. Chaica llullami can. Jehová Diostapish pingaipimi churan. Ima shinami ricurcanchij huañushcacunaca mana imata yuyanchu. Gentecunata ninahuan llaquichinataca Jehová Diosca mana yuyashcallapishchu. Jeremías 7:31-ta rezapai.
Cai videota ricui: ¿Huañushpaca imashi tucunchij?
3. ¿Huañushcacunahuanca parlai tucunchijchu?
Huañushcacunaca mana parlai tucunchu, mana uyai tucunchu (Salmo 115:17). Shinapish millai angelcunami, huañushca gentecuna shina ricurishpa parlan (Judas 6). Chaimantami Jehová Diosca huañushcacunahuan ama parlaichij nishpa mandan. Deuteronomio 18:10, 11-ta rezapai.
4. ¿Picunataj causaringa?
Huaranga huaranga huañushca gentecunami Allpapi cutin causangacuna. Jehová Diosta mana rijsishcamanta mana allita ruraj huaquin gentecunapish causaringami. Hechos 24:15-ta rezapai.
Causarijcunaca Diosmantami alli yachai tucungacuna, Jesuspi feta churangacuna, Diosta cazushcatapish ricuchingacuna (Apocalipsis 20:11-13). Chashna rurashpaca huiñai huiñaitami Allpapi causangacuna. Juan 5:28, 29-ta rezapai.
5. Huañushcacunata causachishpaca ¿imatataj Jehová Diosca ricuchin?
Huañushcacunata causachishpaca Jehová Diosca cꞌuyaj, llaquij cashcatami ricuchin. Jehová Dios paipaj Churita ñucanchijmanta huañuchun cachashcamantami, huañushcacuna causarina cashcata crinchij. Huañushcacuna causarijpica ¿pitataj ricusha ningui? Juan 3:16; Romanos 6:23-ta rezapai.
