1-3. a) ¿Jesús manaraj jahua pachaman rishpaca apostolcunahuanca imatataj rurarca? b) ¿Ima tapuicunamantataj yachanata minishtinchij?

 APOSTOLCUNACA Jesús huañushcamantaca llaquillami carcacuna. Pero Jesús causarijpica yallitajmi cushicurcacuna. Paita catijcunaca Jesushuanca siempre canatami munarcacuna. 40 punllacunata Jesús cai Allpapi cashpaca paicunata animashpa, yachachishpami pasarca. Shinapish Jesusca paicunahuanca mana saquirigrircachu.

² Jesús Olivos urcupi yachachicujpimi apostolcunaca alli uyacurcacuna. Parlanata tucuchishca huashami maquita alzashpa, paicunata bendiciashpa jahua pachaman huichiyai callarirca. Pꞌuyu tapajpimi paicunaca Jesustaca ña mana ricui tucurcacuna. Paita ña mana ricui tucushpapish jahuata ricushpami saquirircacuna (Luc. 24:50; Hech. 1:9, 10).

³ Apostolcunapaj causaipica shuj cambiomi tiyarca. ¿Jesús jahua pachaman  rijpica imatataj rurana carca? Jesús callarichishca obrataca huillashpami catina carcacuna. Pero ¿huillangapajca preparadochu carcacuna? ¿Paicunaca ima shinataj sintirircacuna? ¿Paicunamantaca imatataj yachanchij? Hechos capítulo 1-manta repasashpami sumaj, animachij yuyaicunata yachashun.

4. ¿Lucasca Hechos libropica piman quillcashpataj callarirca?

⁴ Lucasca Hechos libropica Teofiloman quillcashpami callarirca. Shinapish Lucas librollapitajmi Teofilomanca ña quillcashca carca. a Paica Lucas libropi quillcashcata catingapajmi Hechos libropica chaillamantataj quillcashpa callarirca. Shinallataj Hechos libropica mushuj informacioncunatami utilizarca.

5, 6. a) ¿Jesusca paipaj catijcunapaj feta sinchiyachingapajca imatataj rurarca? b) ¿Ñucanchij feta ashtahuan sinchiyachingapajca imatataj rurana canchij?

⁵ ¿Jesusca paita catijcunapaj feta sinchiyachingapajca imatataj rurarca? Hechos 1:3-pica: “Jesusca huañungacama llaquita apashca qꞌuipami achca cutin paicunapaj ñaupajpi ricurirca. Pai ciertota causacushcata yachachunmi chashnaca ricurirca. Paicunaca 40 punllacunatami paita ricurcacuna” ninmi. Jesusca huaquinpica shuj o ishqui catijcunapaj ñaupajpimi ricurirca. Cutin shujtaj cutincunaca tucui apostolcunapaj ñaupajpi, 500 catijcunapaj ñaupajpipishmi ricurirca (1 Cor. 15:3-6). Achca cutin chashna ricurishpami Jesusca paita catijcunapaj fetaca ashtahuan sinchiyachirca.

⁶ Jesús cai Allpapi causacushcata, ñucanchij juchacunamanta huañushpa causarishcataca achca gentecunami ricurcacuna. Chai pruebacunaca Bibliapimi can. Caicunamanta alli yachangapajca Jehová Diostami mañana canchij. Chashnami ñucanchij feta sinchiyachishun. Pero sinchi feta charingapajca mana crina cashcallamantachu crina canchij. Chaipaj randica Bibliapi huillashca pruebacunata alli estudiashpami cierto cashcata crishun. Chashna sinchi feta charishpami huiñai causaita charishun (Juan 3:16).

7. a) ¿Jesuspajca imata huillanataj ashtahuan importante carca? b) ¿Jesusmantaca imatataj yachanchij?

⁷ Hechos libroca Jesús paita catijcunaman Diospaj Gobiernomanta parlashcatami ricuchin. Por ejemplo, profetacunaca Jesús llaquita apashpa huañuna cashcatami huillarcacuna. Jesusca chai profetacuna ima nishcatami ashtahuan alli intindichirca (Luc. 24:13-32, 46, 47). Shinallataj Jesusca Diospaj Gobiernopi pai mandagrishcata, cai Gobiernomanta huillana ashtahuan importante cashcatami intindichirca. Ñucanchijpajpish cai Gobiernomanta huillanami ashtahuan importante cana can (Mat. 24:14; Luc. 4:43).

8, 9. a) ¿Apostolcunaca imatataj crishpa pandarircacuna? b) ¿Apostolcuna pandarishcata cuentata cuchunca Jesusca imatataj nirca? c) ¿Tucuri punlla ima hora, ima punlla cagrishcata yachanata minishtinchijchu?

⁸ Olivos urcupica Jesusca último cutinmi paipaj apostolcunahuan tandanacurca. Paicunaca: “Amito ¿cunan tiempollatajchu Israel llajtapaj gobiernotaca cutin churagringui?” nishpami Jesusta tapurcacuna (Hech. 1:6). Paicunaca pandata yuyashpami Yaya Dios Israel llajtapaj cutin gobiernota churashpa Jesús mandagrishcata yuyarcacuna. Shinallataj ‘cunan tiempollapitaj’ nishpaca chai punllacunallapitaj Jesús mandagrishcatami yuyarcacuna. Chai yuyaicunata alli intindichunca, ¿Jesusca ima shinataj ayudarca?

⁹ Israel llajta Dios agllashca pueblo ña mana cagrishcataca Jesusca allimi yacharca. Cutin apostolcunaca chaitaca mana yachashcamantami pandarircacuna. Shinapish cancunaca pandarishcami canguichij nishpaca mana nircachu. Chaipaj randica paicunallataj cuentata cuchunmi saquirca. Paicunaca diez punllacuna qꞌuipallami Dios shuj espiritual llajtata agllashcata cuentata curcacuna. Shinallataj Jesusca pai ima horas mandai callarigrishcata intindichingapajca cꞌuyaihuanmi cashna nirca: “Jahua pacha Yayallami ima hora, ima punlla caicuna pajtarina cashcata ricuchingapajca autoridadta charin. Cancunaca chai tiempomantaca mana yachanata minishtinguichijchu” (Hech. 1:7). Jehová Diosca paipaj nishcacunata pajtachingapajca shuj horariotami charin. Chai horariotaca paillami churai tucun. Jesusca manaraj huañushpaca “ima punlla, ima hora” pai shamunataca ni pi mana yachanchu. Churipish mana yachanchu. Chaitaca “Yayallami yachan” nircami (Mat. 24:36). Cunan punllacunacamami Jesusta catijcunaca caicuna ima hora pajtarinataca mana yallitaj preocuparinchij. Chaita ‘yachanatapish mana minishtinchijchu’.

10. ¿Imamantataj apostolcuna shina cana canchij?

¹⁰ Apostolcuna pandarishcamantaca mana juzganachu canchij. Paicunaca mana yachashcamantami Jesustaca chashna tapurcacuna. Apostolcunaca humilde cashcamantami Jesús corregijpica chasquircacuna. Shinallataj Jesusca cutin cutinmi paicunataca “chaparacuichij” nishpa advertirca (Mat. 24:42; 25:13; 26:41). Apostolcunaca rijcharishca cashcamantami Jehová Dios paipaj nishcacunata pajtachingapaj ima señalcuna ricurina cashcata yachasha nircacuna. Ñucanchijpish ‘tucuri punllacunapi’ causacushcamantami espiritualmente rijcharishca cana canchij (2 Tim. 3:1-5).

11, 12. a) ¿Jesusca paita catijcunataca imata rurachuntaj mandarca? b) Manaraj huillanaman cachashpaca, ¿Jesusca imamantataj espíritu santohuan ayudanata yuyachirca?

¹¹ Jesusca apostolcuna punta lugarpi imata rurana cashcatami yuyachirca. Paica: “Espíritu santo cancunapaj jahuaman shamujpimi poderta chasquinguichij. Chashna cashpami Jerusalenpi, tucui Judeapi, Samariapi, cai allpapi tiyaj caru llajtacunapipish ñucamanta huillanguichij” nircami (Hech. 1:8). Jesusta huañuchishca llajta Jerusalenpimi pai cutin causarishcata apostolcunaca huillana  carca. Chai huashaca Judea, Samaria, ashtahuan caru llajtacunapipishmi huillana carcacuna.

¹² Jesusca paita catijcuna huillachunca espíritu santohuan ayudanatami yuyachirca. Hechos libropica “espíritu santo” shimica 40 yallimi ricurin. Cai libropica Diospaj munaita pajtachingapajca paipaj espíritu santota minishtishcatami achca cutin parlan (Luc. 11:13). Chaimantami cada punlla Yaya Dios paipaj espíritu santohuan ñucanchijta ayudachun mañana canchij.

13. a) ¿Maicamantaj huillana canchij? b) ¿Cai obrapi participashpaca ima shinataj sintirishun?

¹³ “Cai allpapi tiyaj caru llajtacunapipish ñucamanta huillanguichij” nishcata liyishpaca cunan punllapica Jesusta punta catijcuna huillashcata yalli llajtacunapi predicana cashcatami intindinchij. Cai libropaj capítulo 1-pi ricushca shinami Diospaj munaita pajtachishpa tucui shunguhuan paipaj Gobiernomanta alli huillaicunata tucui laya gentecunaman huillacunchij (1 Tim. 2:3, 4). ¿Diospaj Gobiernomantaca cushicushpachu huillacunchij? Cai obrapi participashpaca cushillami sintirishun. Shinallataj huillashpa catingapajca Jehová Diosmi fuerzasta cunga. Hechos librota estudiashpaca alli huillajcuna canatami yachashun.

14, 15. a) ¿Angelcunaca Jesús cutin ima shina shamuna cashcatataj nircacuna? b) ¿Chashna nishpaca imatataj nisha nircacuna? (Notata ricui). c) ¿Jesús ima shinami rirca, chashnallatajmi shamunga nishpaca imatataj nisha nicurca?

¹⁴ Callaripica Jesús jahua pachaman rijpi chingaringacama 11 apostolcuna jahua pachata ricushpa shayacushcatami yacharcanchij. Chaimi ishqui angelcuna ricurishpa paicunataca cashna nircacuna: “Galileamanta runacuna, ¿imamantataj jahua pachata ricurashpa shayacunguichij? Cancunahuan caj Jesusca jahua pachamanmi rirca. Ima shinami jahua pachaman rijta ricurcanguichij chashnallatajmi paica shamunga” (Hech. 1:11). Huaquin religioncunaca Jesús jahua pachaman rishca cuerpollahuantaj cai Allpaman cutin shamuna cashcatami yachachincuna. ¿Angelcunaca Jesús chashna shamunatachu yachachisha nircacuna? Mana chashna cutin shamunatachu nisha nirca. ¿Chaitaca ima shinataj yachanchij?

¹⁵ Angelcunaca ima shinami Jesús rirca. Chashnallatajmi shamunga nircacunami. b Shinapish ¿Jesusca ima shinataj jahua pachaman rirca? Angelcuna chashna nicujpica Jesusca ña mana ricurircachu. Chai ratoca apostolcunallami Jesús jahua pachaman rishpa Yayapaj ladopi cashcata intindircacuna. Shinaca ima shinami Jesús rishcata mana tucuicuna ricurca, chashnallatajmi pai shamujpica mana tucuicuna shamushcata cuentata cuna carcacuna. Bibliata estudiajcunallami Jesucristo rey shina ña shamushcata intindincuna (Luc. 17:20). Cunan punllacunapica ñucanchijpish Jesús jahua pachapi ña mandacushcatami alli intindina canchij. Gentecuna Yaya Diosta sirvichunpishmi ayudana canchij.

16-18. a) ¿Hechos 1:13, 14-pica tandanacunamantaca imatataj yachachin? b) ¿Jesuspaj mama Mariapaj ejemplomantaca imatataj yachanchij? c) ¿Tandanacunaca imamantataj importante can?

¹⁶ Jesusta jahua pachaman rishcata ricushca huashaca apostolcunaca “achcata cushicushpami” Jerusalenman tigrarcacuna. Jesuspaj yachachishcacunataca allimi uyarcacuna (Luc. 24:52). Shinapish ¿chai yachachishcacunataca pajtachishcangacunachu? Hechos 1:13, 14-pica apostolcuna shuj huasi ‘jahua cuartopi’ tandanacushcatami parlan. Chai tiempopica Palestina llajtapi causajcunami cashna huasita charijcuna carca. Jahua cuartoman huichiyangapajca shuj escalerami tiyarca. Hechos 12:12-pi nishca shinaca apostolcuna tandanacushca jahua cuartoca Marcospaj mamapaj huasimi cashcanga. Chai huasica tandanacungapaj alli huasimi carca. Chai cuartopica, ¿picunataj tandanacurcacuna?, ¿chaipica imatataj rurarcacuna?

¹⁷ Cai tandanacuipica apostolcuna, discipulocuna, ‘huarmicunapishmi’ carca. Chai tandanacuipica Jesuspaj mama Mariapishmi carca. Bibliapica paipaj shutica caipimi último cutin ricurin. Mariaca Jesuspaj mama cashpapish humilde cashcamantami discipulocunahuan tandanacushpa Diosta sirvij carca. Shinallataj paipaj chuscu churicuna chai tandanacuipi cashcata ricushpami cushilla sintirishcanga. Jesús cai Allpapi cajpica paipaj huauquicunaca mana catisha nircacunachu. Shinapish Jesús causarishca huashaca paitami cati callarircacuna (Mat. 13:55; Juan 7:5; 1 Cor. 15:7).

¹⁸ Chai tandanacuipica ‘tucuicunami shuj yuyailla tucushpa Diosta mañarashpa catircacuna’ (Hech. 1:14). Cunan punllacunapipish Diosta adorangapajca tandanacunami canchij. Tandanacuicunapica caishujmanta chaishujmantami animarinacunchij. Sumaj consejocunatapishmi chasquinchij. Shinallataj Diosta mañashpa, cantocunahuan alabashpami Diostaca alli adoranchij. Ñucanchij fetapishmi sinchiyachinchij. Tandanacuiman rinataca manataj saquinachu canchij (Heb. 10:24, 25).

19-21. a) ¿Jehová Dios congregacionpi ayudachun Pedrota saquishcamantaca imatataj yachanchij? b) ¿Judaspaj randica imamantataj shujtajta agllana carca? c) ¿Matiasta agllangapaj apostolcuna imata rurashcamantaca imatataj yachanchij?

¹⁹ Chai tiempopica Jesusta catijcunaca shuj importante decisiontami agllana carcacuna. Chaipajca Pedromi parlashpa callarirca (Hech. 1:15-26). Pedroca huaquin semanacuna huashamanmi Jesustaca mana rijsinichu nishpa negarca. Pero Pedroca paipaj yuyaita, paipaj causaitapishmi cambiashca carca (Mar. 14:72). Tucuicunami juchayuj canchij. Shinapish ñucanchij juchacunamanta tucui shunguhuan arrepintirijpica Jehová Dios ñucanchijta perdonaj cashcatami yuyarina canchij (Sal. 86:5).

²⁰ Judas Jesusta traicionashcamantami paipaj randij shujtajta agllana cashcata Pedroca intindirca. Pero ¿pitataj agllana carca? Mushuj apostolca tucui tiempopi Diosmanta Jesushuan huillashpa purijmi cana carca, Jesús causarishcata huillaj runapishmi cana carca (Hech. 1:21, 22). Jesús nishca shinapishmi  cana carca. Paica: “Cancunaca ñucata catij cashcamanta 12 jatun tiyarinacunapi tiyarishpa, Israel llajtapaj 12 familiacunata juzganguichij” nircami (Mat. 19:28). Caipi ricushca shinaca Jehová Diosca mushuj Jerusalén llajtapaj ‘12 callari rumicunaca’ cai allpapi Jesushuan purij 12 apostolcuna cachunmi munarca (Apo. 21:2, 14). Jehová Diosca salmopi huillashca profeciamanta intindichunmi Pedrota ayudarca. Chai profeciapica: “Pai imata ruranataca shujtaj runa japishca cachun” nircami (Sal. 109:8).

²¹ ¿Mushuj apostolta agllangapajca imatataj rurarcacuna? Suertetami rurarcacuna (Pro. 16:33). Chai tiempopi suerteta ruranaca shuj costumbremi carca. Pero espíritu santota chasquishca huashaca cutin chaita ruranataca ña mana parlanchu. Pero ¿imamantataj apostolcunaca mushuj apostolta agllangapaj suerteta rurarcacuna? Paicunaca Yaya Diosta mañashpami cashna nircacuna: “Ñucanchij Jehová Dioslla, canca tucuicunapaj shungupi ima tiyashcatami yachangui. Cai ishqui runacunamanta maijanta can agllashcata ricuchihuai” (Hech. 1:23, 24). Paicunaca manaraj suerteta rurashpami Diosta mañarcacuna. Chashnami Dios agllachun saquircacuna. Apóstol cachunca Matiastami agllarcacuna. Huillanaman richun Jesús cachashca 70 discipulocunamantaca shujca Matiasmi cashcanga (Hech. 6:2). c

22, 23. ¿Congregacionta pushaj ancianocunapaj autoridadtaca imamantataj cazuna canchij?

²² Matiasta agllangapajca apostolcuna alli organizashcami carca. Cunan punllacunapipish Diospaj puebloca alli organizashca cana can. Chaimantami congregacioncunata pushachun ashtahuan huauquicunata minishtinchij. Pero shuj huauquita manaraj agllashpami congregacionta pushaj ancianocunaca Yaya Diosta paipaj espíritu santohuan ayudachun mañancuna. Biblia nishcacunata paipaj causaipi pajtachicushcatapish allimi ricuncuna. Congregacionpi anciano cachun agllashca huauquicunami Diospaj espíritu santohuan nombrashca can. Chaimantami ancianocunata tucui shunguhuan cazunchij. Chashnami congregacionpi tucuicuna tandalla Diosta sirvichun ayudanchij (Heb. 13:17).

²³ Jesús causarishcata, apostolcunapish alli decisioncunata agllashcata ricushpami discipulocunaca achcata animarircacuna. Chashnami paicunaca alli allichirishca carcacuna. Caimantaca catij capitulopimi ricushun.