YACHAI 8
‘Huauqui panicunaca sumajtami causai callarircacuna’
Jesusta catijcunata catirashpa llaquichij Sauloca shungumantami predicai callarirca
Hechos 9:1-manta 43-cama japishcami can
1, 2. ¿Sauloca Damascopi imatataj ruranaman ricurca?
JESUSTA catijcunata llaquichisha nijcunaca Damasco llajtamanmi ricurcacuna. Paicunaca Jesusta catijcunapaj huasicunamanta llujchishpami paicunamanta burlarishpa, huatashpami Jerusalenpi mandaj juezcuna castigachun pushamusha nircacuna.
2 Jesusta catijcunata llaquichisha nijcunapaj ñaupajpimi Sauloca ricurca. a Paica paipaj compañerocuna Estebanta rumicunahuan shitashpa huañuchijtami ricurca (Hech. 7:57–8:1). Qꞌuipamanca Jerusalenpi causaj Jesusta catijcunataca sinchitami llaquichirca. Paipaj yuyaipica tucuicunatami libre tucuchisha nirca. Chai tiempopica Jesusta catijcunataca Diospaj “Ñanpi” puricujcuna nishpami rijsijcuna carca (Hech. 9:1, 2; “ ¿Damascopi Sauloca ima autoridadta charirca?” nishca recuadrota ricui).
3, 4. a) ¿Saulotaca imataj tucurca? b) ¿Cai yachaipica ima tapuicunatataj yachashun?
3 Damascoman Saulohuan ricuj runacunaca ‘ñapish jahua pachamanta luz shamushpa Saulopaj jahuapi achijyachishcata’ ricushpami imata mana ni pudishpa mancharishca saquirircacuna. Chaimi Sauloca pambaman urmashpa ciego saquirirca. Qꞌuipaca: “‘Saulo, Saulo ¿ima nishpataj ñucataca catirashpa llaquichicungui?’ nishpa rimashcata uyarca. Shina nijpimi Sauloca: ‘¿Amito, pitaj canguiyari?’ nishpa tapurca. Chaimi paica cashna nishpa cutichirca: ‘Ñucaca Jesusmi cani. Ñucatami catirashpa llaquichicungui’” nirca (Hech. 9:3-5; 22:9).
4 ¿Jesús Sauloman nishcamantaca imatataj yachanchij? ¿Saulopaj causai ima shina cambiashcata yachanaca imamantataj importante can? ¿Jesusta catijcuna alli tiempopi imallata rurashcamantaca imatataj yachanchij?
“¿Ima nishpataj ñucataca catirashpa llaquichicungui?” (Hechos 9:1-5)
5, 6. ¿Jesús Saulota ima nishcamanataca imatataj yachanchij?
5 Saulo Damascoman ricujpica, ¿ima nishpataj ñuca discipulocunata catirashpa llaquichicungui? nishpaca mana tapurcachu. Chaipaj randica, “¿ima nishpataj ñucataca catirashpa llaquichicungui?” nishpami tapurca (Hech. 9:4). Ima shinami ricunchij Jesuspajca paita catijcunapaj problemacunaca paipaj problemacuna shinami can (Mat. 25:34-40, 45).
6 Jesusta caticushcamanta problemacunahuan chꞌimbapuracujpica Jesuspish, paipaj Yayapish tucui problemacunata ricucushcatami seguros cai tucunchij (Mat. 10:22, 28-31). Shinapish Jehová Diosca problemacunata chai ratoca mana anchuchingachu. Por ejemplo, Saulo Estebanta huañuchichun apoyacujpi, Jerusalenpi Jesusta catijcunapaj huasiman yaicushpa paicunata sirijta aisashpa canllaman llujchicujpica Jesusca ricucurcami (Hech. 8:3). Chaita ricushpapish Jesusca chai ratoca mana imata rurarcachu. Shinapish Yaya Diosta tucuipi cazushpa catichunmi paicunamanca fuerzasta curca.
7. ¿Ñucanchijta catirashpa llaquichijpica imatataj rurana canchij?
7 Catirashpa llaquichijpica caitami rurana canchij: 1) Jehová Diosta tucuipi cazushpa catingapajca decididomi cana canchij. 2) Diospaj ayudatami mañana canchij (Fili. 4:6, 7). 3) Catirashpa llaquichijcunataca Diospaj maquipimi saquina canchij (Rom. 12:17-21). 4) Jehová Dios problemacunata tucuchingacama, ahuantashpa catingapajca ñucanchijta ayudanatami confiana canchij (Fili. 4:12, 13).
‘Ñuca huauqui Saulo, Amito Jesusmi cambajman cachashca’ (Hechos 9:6-17)
8, 9. ¿Saulota ricunaman richun Jesús mandajpica Ananiasca ima shinashi sintirishcanga?
8 Jesusca Sauloman pi cashcata huillashca qꞌuipami: “Cunanca jatarishpa chai llajtaman yaicui. Chaipimi can imata rurana cashcata huillangacuna” nirca (Hech. 9:6). Saulo ciego saquirishcamantami paitaca maquimanta japishpa Damascoman pusharcacuna. Chaipimi paica quimsa punllata ayunashpa Diosta mañarca. Shinallataj Jesusca Ananiasmanmi Saulomanta parlarca. Hechos 22:12-pi nishca shinaca Damascopi ‘causaj judiocunaca Ananiasmanta allitami parlajcuna’ carca.
9 Congregacionta Pushaj Jesusca Ananiasman Saulomanta parlashca qꞌuipami paita ricunaman richun mingarca. Chaimi Ananiasca: “Amito, cai runamantaca achcacuna parlashcatami uyashcani. Shinallataj Jerusalenpi canta catijcunata ima shina llaquichishcatapishmi uyashcani. Sacerdotecunata mandajcuna cachajpimi tucui canta catijcunata llaquichishpa prezupi churangapaj caimanpish shamushca” nirca (Hech. 9:13, 14). Ananiasca Saulomanta yachashpami chashna nishcanga. Jesús mandashcata mana intindishpapish Ananiasca chaita pajtachina shuj privilegio cashcatami intindirca.
10. ¿Jesús Ananiasta ima shina tratashcamantaca imatataj yachanchij?
10 Ananías ima shina sintirishcata parlajpica Jesusca mana rimarcachu. Chaipaj randica Saulopajman rishpa imata rurana cashcatami alli intindichirca. Jesusca: “Rilla, chai runataca Diosta mana rijsij gentecunaman, jatun mandajcunaman, israelitacunamanpish ñucamanta huillachunmi agllashcani. Ñuca shutimanta tucui laya llaquicunata apana cashcatami paimanca alli ricuchisha” nircami (Hech. 9:15, 16). Chaimi Ananiasca Saulota mashcanaman rirca. Paihuan tupashpaca: “Ñuca huauqui Saulo, can shamucushca ñanpi ricurij Amito Jesusmi cambaj ñahuicunapish cutin ricuchun, canpish espíritu santohuan junda saquirichun ñucataca cambajman cachashca” nircami (Hech. 9:17).
11, 12. ¿Jesusmanta, Ananiasmanta, Saulomantapish imatataj yachai tucunchij?
11 ¿Jesusmanta, Ananiasmanta, Saulomantapish imatataj yachai tucunchij? Jesús tucui punllacuna predicacionta pushacushcatami yachanchij (Mat. 28:20). Cunanpica Jesusca alli cazuj alli yuyaiyuj sirvij huauquicunahuanmi predicacionta pushacun. Paita sirvijcunata cuidachunmi cai huauquicunata agllashca (Mat. 24:45-47) Cuerpo Gobernantepi caj huauquicunaca Jesusmanta ashtahuan yachasha nij gentecunata ayudachunmi publicadorcunata, precursorcunata cachancuna. Yachai 7-pi ricushca shinaca achcacunami testigo de Jehovacunapaj ayudata chasquishcacuna. Chashnami Jehová Dios paicunapaj mañashcacunata cutichishcata ricushcacuna (Hech. 9:11).
12 Ananiasca Jesusta cazushpa, paiman mingashcata pajtachishcamantami Diospaj ñaupajpi alli ricurirca. ¿Ñucanchijpish mana manchashpachu huillana mingashcata pajtachicunchij? Huaquincunaca huasin huasin huillanata, mana rijsishca gentecunaman huillanatami manchancuna. Cutin shujtajcunapajca negociocunapi, callecunapi, telefonoman cayashpa, cartacunata quillcashpa huillanami sinchi ricurin. Ñucanchijpish chashna sintirishpaca Ananiaspaj ejemplotami catina canchij. Paica mana manchashcamantami Saulo apóstol cachun, espíritu santota chasquichun ayudarca. b Shinallataj Jesuspi confiashcamanta, Saulotapish huauquita shina ricushcamantami paiman mingashcata pajtachirca. Ñucanchijpish mana manchashpa huillangapajca Jesús pushacushcatami seguros canchij. Gentecuna ima yuyashcata intindingapaj, millai gentecunapish Diosta sirvi tucushcatami yuyaipi charinchij (Mat. 9:36).
‘Sauloca Jesusmantami huillai callarirca’ (Hechos 9:18-30)
13, 14. ¿Bibliata yachacushpa manaraj bautizarijcunaca Saulomanta imatataj yachai tucuncuna?
13 Chai ratomi Sauloca imata yachashcata rurai callarirca. Cutin ña ricui pudishpaca bautizarishpami Damasco llajtapi Jesusta catijcunahuan alli apanacui callarirca. Chai punllamantami Sauloca, “Jesusca Diospaj Churimi” nishpa sinagogacunapi huillai callarirca (Hech. 9:20).
14 ¿Bibliata yachacushpa manaraj bautizarijcunaca Saulomanta imatataj yachai tucuncuna? Ima yachashcata paicunapaj causaipi pajtachina importante cashcatami yachai tucuncuna. Sauloca Jesús shuj milagrota rurashcata ricushpami paipaj causaita cambiarca. Shinapish shujtajcunaca Jesuspaj milagrocunata ricushpapish Jesusta catinataca mana munarcacunachu. Por ejemplo, Jesús shuj runapaj chaquishca maquita jambijpi, Lazarotapish causachijpimi fariseocunapish, huaquin judiocunapish rumi shungu tucushpa paipi mana crircacuna (Mar. 3:1-6; Juan 12:9,10). Sauloca chai runacuna shina mana cashcamantami paipaj causaita cambiarca. ¿Huaquincuna Jesusta mana catijpipish imamantataj Sauloca Jesusta catirca? Paica runacunata yalli Yaya Diosta manchashcamanta, Jesús paita llaquishpa ayudashcamantami agradicisha nirca (Fili. 3:8). Ñucanchijpish Diosmanta huillanata, bautizarinata manaraj decidishpaca Saulopaj ejemplotami catina canchij. Ashtahuanpish ima jarcachunca mana saquinachu canchij.
15, 16. a) ¿Sauloca sinagogacunapi imatataj ruracurca? b) ¿Damascopi judiocunaca Saulohuanca imatataj rurasha nircacuna?
15 Sauloca Jesusta catijcunata catirashpami llaquichij carca. Pero cunanca sinagogacunapi Jesusmanta huillacushcata ricushpaca judiocunaca mancharinacushpami paicunapura: “¿Manachu cai runaca Jesusta catijcunataca Jerusalenpi catirashpa llaquichij carca?” nircacuna (Hech. 9:21). Sauloca imamanta Jesusta cati callarishcata intindichingapajca “Jesús Cristo cashcatami” alli intindichina carca (Hech. 9:22). Alli intindichijpipish paicunaca tradicioncunamanta, shujtajcunata yalli casha nishcamantami mana cambiasha nircacuna. Shinapish Sauloca huillashpami catirca.
16 Quimsa huatacuna qꞌuipapish Damascopi causaj judiocunaca Saulo cambiashcataca manaraj crircacunachu. Chaimi paicunapura Saulota huañuchinata yuyarircacuna (Hech. 9:23; 2 Cor. 11:32,33; Gál. 1:13-18). Paita huañuchisha nishcata yachaj chayashpami Sauloca chaimanta llujshishpa rirca. Lucasca: “Saulota catijcunaca paita japishpa shuj tutaca canastapi churashpa pircapi tiyaj ventanata uriyachircacuna” nircami (Hech 9:25). ‘Saulota catijcuna’ nishpaca Damascopi maijancuna paita uyashca qꞌuipa Jesusta catishcatami ricuchin.
17. a) ¿Bibliamantaca tucui gentecunachu uyasha ningacuna? b) ¿Imatataj rurashpa catina canchij? c) ¿Imamantataj chaita rurana canchij?
17 Cunan punllacunapipish Bibliapi ima yachashcatami ñucanchij familiacunaman, amigocunaman, shujtajcunamanpish huillasha ninchij. Ñucanchijca: “Bibliapi verdadta huillashcata ricushpami paicunaca de seguro ashtahuan yachasha ningacuna” nishpachari yuyanchij. Shinapish mana tucuicuna uyasha ningacunachu. Huaquinpicarin ñucanchij familiacunallatajmi enemigocuna shina tratai callaringacuna (Mat. 10:32-38). Ñucanchijcuna Bibliamanta alli yachachingapaj, alli comportaringapaj esforzarijpica paicunaca uyasha ningacunapishchari (Hech. 17:2; 1 Ped. 2:12; 3:1, 2, 7).
18, 19. a) ¿Bernabé Saulota ayudashcamantaca imataj tucurca? b) ¿Bernabemantapish Saulomantapish imatataj yachai tucunchij?
18 Saulo Jerusalenman tigrajpica discipulocunaca pai cambiashcata mana crisha nircacunachu. Chaimi Bernabeca Saulota ayudanaman rirca. Bernabé parlashca qꞌuipami apostolcunaca cushicuihuan paita chasquircacuna (Hech. 9:26-28). Jerusalenpi cashpaca Sauloca tucui ladocunapi cuidadohuan purishpapish huillanataca mana pingarcachu (Rom. 1:16). Ashtahuanpish maipimi Jesusta catijcunata llaquichirca, chaillapitajmi huillana carca. Chashnami mana manchaj cashcata ricuchirca. Shinapish judiocunaca paita huañuchinatami munarcacuna. Chaimi ‘Saulota huañuchisha nishcata yachaj chayashpaca huauquicunaca Cesareaman pushashpa Tarso llajtaman paitaca cacharcacuna’ (Hech. 9:30). Sauloca apostolcunata cazushcamantami paipish, shujtajcunapish bendicioncunata chasquircacuna.
19 Bernabemi Saulotaca ayudarca. Chashnami Saulohuanca alli amigo tucurca. ¿Ñucanchijpish Bernabé shina mushuj publicadorcunahuan huillanaman llujshinchijchu? ¿Paicunata espiritualmente ñaupajman catichun ayudacunchijchu? Caita rurashpaca Jehová Diospaj achca bendicioncunatami chasquishun. ¿Mushuj publicadorcuna cashpaca Saulo shina experienciata charij huauqui panicunapaj ayudata chasquishunchu? Chashna rurashpaca Bibliamanta alli yachachijcuna tucushpa cushillami sintirishun. Shujtajcunahuanpish alli amigocunami cashun.
‘Achcacunami Jesuspi crircacuna’ (Hechos 9:31-43)
20, 21. ¿Jarcaicuna mana tiyajpica discipulocunapish, cunan punllapi Diosta sirvijcunapish ima shinataj chai tiempota aprovechashcacuna?
20 ¿Saulo Jesusta cati callarishca qꞌuipaca imataj tucurca? “Chai punllacunapica Judea, Galilea, Samaria llajtacunapi tandanacushca huauqui panicunata pi mana llaquichijpimi sumajta causai callarircacuna” (Hech. 9:31). ¿Sumajta causai callarishca tiempotaca ima shinataj aprovecharcacuna? (2 Tim. 4:12). Hechos 9:31-pica: “Paicunapaj crishcacunapish ashtahuanmi sinchiyarishpa catirca. Jehová Diosta cazushpa causashcamanta, espíritu santopish sinchiyachijpimi Jesusta catijcunaca ashtahuan mirarishpa catircacuna” ninmi. Apostolcunapish, shujtaj huauquicunapish Jesusta catijcunapaj feta sinchiyachingapaj, congregación ñaupajman catichun ayudangapaj tiempota surcushcamantami Jesusta catijcunaca ashtahuan mirarishpa catircacuna. Por ejemplo, Pedroca Lidapi saquirij Sarón pugru pambapi causaj discipulocunatami animangapaj tiempota surcurca. Chaimi chai cꞌuchullapi causaj achca gentecunaca Jesusta catircacuna (Hech. 9:32-35). Shinapish discipulocunaca paicunallapi yuyanapaj randica shujtajcunahuanpish ayudanacushpami huillashpa catircacuna. Chashnami “ashtahuan mirarishpa catircacuna”.
21 Casi 1990 huatapica mana yuyashcapimi gobiernocuna churashca huaquin leycunata anchuchishpa Diosta sirvijcunata llaquichinata saquircacuna. Chaimi achca llajtacunapi testigo de Jehovacunaca apostolcunapaj tiempopi shina huillangapaj aprovecharcacuna. Chashna huillashcamantami achcacuna alli huillaicunata uyarcacuna.
22. ¿Jarcaicuna mana tiyajpica imatataj rurana canchij?
22 ¿Jarcaicuna mana tiyajpi tiempotaca allichu aprovechacunchij? Diabloca Diosta sirvinata saquishpa charijyana munaicunallapi ocuparichunmi munan (Mat. 13:22). Diablopaj munaita ruranapaj randica Diospaj Gobiernomanta tucui gentecunaman huillangapaj, ñucanchij huauqui panicunata animangapajpishmi chai tiempota aprovechana canchij. Shinapish ñucanchij llajtapi leycuna ñapish cambiai tucushcataca mana cungarinachu canchij.
23, 24. a) ¿Tabitamantaca imatataj yachanchij? b) ¿Alli tiempopipish, llaqui tiempopipish imatataj rurana canchij?
23 Jope llajtapi Jesusta catij Tabita o Dorcas shuti huarmihuan ima tucushcata ricushun. Jope llajtaca Lida llajtamanta mana carupichu carca. Tabitaca ‘allicunata ruraj, pobrecunatapish achcatami ayudaj carca. Shinapish chai punllacunapimi paica ungushpa ratomi huañurca’. Pai huañushcamantami Jope llajtapi Jesusta catijcunapish, ayudashca viudacunapish llaquilla carcacuna. c Pambangapaj allichicujpica Pedromi chayarca. Diosta mañashca qꞌuipami Tabitata causachirca. Chai punllacamaca apostolcunaca pitapish mana causachishca carcacunachu. Tabita causarishcata Jesuspaj catijcunapaj viudacunapaj ñaupajpi Pedro ricuchijpica, paicunaca achcatami cushicushcangacuna. Ashtahuanpish chaita ricushpami pruebacunata chꞌimbapurangapaj fuerzasta japishcangacuna. “Jope llajtapi causajcunaca tucuicunami chaitaca yachaj chayarcacuna. Chaimi achcacunaca Amito Jesuspi crircacuna” (Hech. 9:36-42).
¿Tabitapaj alli ejemplotaca ima shinataj cati tucunchij?
24 ¿Caimantaca imatataj yachanchij? 1) Mana yuyashcapimi huañui tucunchij. Chaimanta Diospaj ñaupajpi alli ricuringapajmi esforzarina canchij (Ecl. 7:1). 2) Causarina esperanzapi feta churana importante cashcatapishmi yachanchij. Tabita imalla rurashcataca Jehová Diosca mana cungarircachu. Chaimantami Yaya Diosca achcata bendiciarca. Armagedón manaraj chayajpi huañujpipish ñucanchij imalla rurashcataca manataj cungaringachu (Heb. 6:10). Shinaca “alli tiempopipish, llaqui tiempopipish” Jesusmanta tucui gentecunaman huillashpa catishunchij (2 Tim. 4:2).
a “ Sauloca fariseomi carca” nishca recuadrota ricui.
b Apostolcuna shujtajcunapaj jahuapi maquicunata churajllapimi Diospaj espíritu santota chasqui pudircacuna. Ananías apóstol mana cashpapish Jesuspaj autoridadhuanmi Saulotaca Diosmanta huillachun agllarca. Saulo mingashcata pajtachichunca Jesusmi poderta cushpa ayudarca. Chashnami apostolcunahuan mana cashpapish achca ruranata charishcanga.
c Página 67-pi, Tabitaca “allicunata rurajmi carca” nishca recuadrota ricui.
