Cꞌuyashca huauqui panicuna:

Caipi yuyashun. Jesús manaraj jahua pachaman rishpa Olivos urcupi cashpaca ñucanchij ñaupajpimi ricurin. Paica ñucanchijtaca cashnami nin: “Espíritu santo cancunapaj jahuaman shamujpimi poderta chasquinguichij. Chashna cashpami Jerusalenpi, tucui Judeapi, Samariapi, cai allpapi tiyaj caru llajtacunapipish ñucamanta huillanguichij” (Hech. 1:8). ¿Jesús cashna ñucanchijta nijpica imatataj ruranchijman carcanchij?

Jesús ima nishcata uyashpaca: “Ashallacunami canchij, ¿ima shinataj ‘cai allpapi tiyaj caru llajtacunapipish’ huillai tucushun?” nishpachari tapurinchij. Pero chai rato Jesús ima nishcapimi yuyarinchij. Paica último tuta manaraj huañushpaca: “Sirvijca amota yallica mana canchu. Paicunaca ñucata catirashpa llaquichishca shinallatajmi cancunatapish catirashpa llaquichingacuna. Ashtahuanpish ñuca nishcacunata cazushpaca cancunapaj nishcacunatapishmi cazungacuna. Paicunaca ñucata cachajtaca mana rijsincunachu. Chaimantami cancunataca ñucata catijcuna cashcamanta tucui chaicunata rurangacuna” nircami (Juan 15:20, 21). Jesús ima nishcata yuyarishpaca: “¿Contracuna ñucanchijta catirashpa llaquichijpica ima shinataj huillashun?” nishpachari tapurinchij.

Cunanca ñucanchij punllacunapi yuyashun. Testigo de Jehovacuna cashcamantami apostolcuna causashca punllacunapi shina ‘caru llajtacunapi’ “tucui llajtacunapi causaj” gentecunaman predicana canchij (Mat. 28:19, 20). Bibliapi nishca shinaca gentecunaman huillangapajca jarcaicunatami charishun. Shinaca ¿ima shinataj huillana obrata pajtachi tucushun?

Hechos libropimi apostolcunapish, Jesusta punta catijcunapish Jehová Diospaj ayudahuan ima shina huillai tucushcata yachashun. Cai libroca Jesusta catijcuna Diosmanta huillangapaj imata rurashcata yachachunmi ayudanga. Shinallataj apostolcuna causashca punllacunapi, cunan punllacunapipish Jesusta catijcuna igual rurajcuna cashcata yachachunmi ayudanga. Por ejemplo, Jesusta catijcuna huillangapaj imata rurajcuna cashcata, ima shina organizashca cashcatami yachashun. Paicunamanta yachashpaca Jehová Dios tucui tiempopi paipaj organizacionta ayudacushcapimi confiashun.

Hechos libropica Jehová Dios espíritu santohuan paita sirvijcunata ayudacushcata, gentecunata ayudangapaj Diospaj Gobiernomanta huillashpa catichun ayudacushcatami yachashun. Hechos librota yachashpa Jehová Diospi ashtahuan confiachunmi mañacunchij (Hech. 28:23; 1 Tim. 4:16).