YACHAI 13
“Sinchitami rimanacurcacuna”
Apostolcunahuan, ancianocunahuan circuncisionmantami parlanacurcacuna
Hechos 15:1-manta 12-cama japishcami can
1-3. a) ¿Imamantataj punta congregacionca casi chꞌicanyarirca? b) ¿Caimantaca imatataj yachai tucunchij?
PABLOCA Bernabehuanmi paicunapaj punta viajemanta Antioquía de Siriaman tigrarcacuna. ‘Shujtaj llajtamanta gentecunapish’ Diospi crishpa, Jesusta cati callarishcamanta paicunaca cushillami carcacuna (Hech. 14:26, 27). Chai llajtapica chaitami yachaj chayarcacuna. Chaipica shujtaj llajtamanta gentecunapish Jesustami cati callarishcacuna carca (Hech. 11:20-26).
2 Mana judiocuna Jesusta caticushcata yachaj chayashpaca judiocunaca cicuncisionta rurashpa catina cashcatami yuyarcacuna. Chaimi judiocunapish mana judiocunapish sinchita rimanacurcacuna. Shinapish ¿sinchita rimanacunaca allichu carca? ¿Jesusta catij mana judiocunapish Moisesman cushca leyta cazunachu carca? Chashna rimanacushcamantami congregacionca casi chꞌicanyarirca.
3 Caimanta yachashpami ñucanchijpish congregacionpi sinchi problemacunata charishpapish ima shina allichinata yachashun.
“Circuncisionta cancuna mana rurajpica Diosca mana quishpichingachu” (Hechos 15:1)
4. a) ¿Huaquin judiocunaca imacunallatataj yachachi callarircacuna? b) ¿Ima tapuipitaj yuyana canchij?
4 Lucasca: “Judea llajtamantami huaquin runacunaca Antioquía llajtaman uriyamurcacuna. Paicunami huauquicunamanca: ‘Moisesman cushca leypi nishca shina circuncisionta cancuna mana rurajpica Diosca mana quishpichingachu’” nishpami escribirca (Hech. 15:1). Judea llajtamanta uriyamujcunaca Jesusta manaraj catijcuna tucushpa fariseocuna cashcataca mana yachanchijchu. Ima laya cashpapish paicunaca millai fariseocuna shina yuyashpami Leyta pajtachishpa catinata munarcacuna. Ashtahuanpish paicunaca Jerusalenmanta apostolcuna, ancianocunapish cachashca shinami parlarcacuna (Hech. 15:23, 24). 13 huatacuna huashamanmi Diosca Pedromanca circuncisionta mana rurachishcacunata congregacionpi chasquishcata ña huillarca. Shinapish ¿imamantataj judiocunaca circuncisionta rurachun obligacurcacuna? (Hech. 10:24-29, 44-48). a
5, 6. a) ¿Imamantataj judiocunaca circuncisionta rurachun obligacurcacuna? b) ¿Circuncisionca Abrahanpaj ari ninacushcahuanca imapitaj chꞌican can? (Notata ricui).
5 Judiocunaca Jehová Dios circuncisionta rurachun mandashcamantami chaita ruranataca mana saquisha nircacuna. Chaita rurashpami Dioshuan alli apanacushcata ricuchijcuna carca. Puntapica Jehová Diosca Abrahanta, paipaj familiatapishmi circuncisionta rurachun mandarca. Qꞌuipaca Moisesman cushca Leypipishmi israelitacuna chaita rurachun mandarca (Lev. 12:2, 3). b Leypica shujtaj llajtacunamanta gentecunaca circuncisionta rurashpallami judiocunapaj pascua fiestapi participai pudircacuna (Éx. 12:43, 44, 48, 49). Circuncisionta mana rurashcacunaca judiocunapajca mapa runacuna shinami carca. Diostapish mana sirvi tucurcacunachu (Is. 52:1).
6 Jesusta catij judiocunaca Moisesman cushca leyta cazushpa, judío shina huacharishpapish Diospaj pueblopi cashcata ricuchingapajca mushuj ari ninacuitami chasquina carca. Dios munashca shina cai mushuj entendimientota chasquingapajca achca feta, humildadtapishmi minishtircacuna. Por ejemplo, Judeapi causaj Jesusta catij judiocunaca Jesuspi crishcata ricuchingapaj, mana circuncisionta rurachishcacunahuan tandalla Diosta adorangapajca mana manchaj cashcatami ricuchina carca (Jer. 31:31-33; Luc. 22:20).
7. ¿Judeamanta uriyamujcunaca imatataj mana intindircacuna?
7 Jehová Diospaj mandashcacunaca mana cambiashcachu carca. Cai mushuj ari ninacuipipish Moisesman cushca huaquin mandashcacunatami caticurca (Mat. 22:36-40). Huaquin huatacuna qꞌuipa circuncisionmanta parlashpa Pabloca: “Judioca ucu shungumantami judío can. Circuncisiontapish shungupimi rurachin. Chaitaca mana Leyta catishpallachu ruran. Ashtahuanpish espíritu santomi chaita ruran” nircami (Rom. 2:29; Deut. 10:16). Judea llajtamanta uriyamujcunaca chaita mana intindishpami Jehová Diosca circuncisionta rurachun mandashcata yuyashpa catircacuna. ¿Cai mushuj mandashcata chasquingapajca listochu carcacuna?
“Sinchitami rimanacurcacuna” (Hechos 15:2)
8. ¿Circuncisionmanta problemata allichingapajca imamantataj apostolcunata, ancianocunata tapuna carcacuna?
8 Lucasca: “Pablopish, Bernabepish paicuna shina mana yuyashcamanta chai runacunahuanca sinchita rimanacurcacuna. Chai qꞌuipami Jesusta catijcunaca apostolcunaman, ancianocunamanpish chaicunamanta parlagrichun Pablota, Bernabeta, shujtaj huauquicunatapish Jerusalenman cachanata yuyarircacuna” nircami (Hech. 15:2). c Antioquiamanta huauquicunaca Judeamanta shamujcunahuan cada uno circuncisionmanta ima crishcata difindishpami “sinchita rimanacurcacuna”. Paicunahuan shuj yuyailla cangapajmi ancianocunaca Pablota, Bernabeta, shujtaj huauquicunatapish Jerusalenpi apostolcuna, ancianocuna ima yuyashcata tapunaman cacharcacuna. ¿Cai ancianocunamantaca imatataj yachanchij?
Huaquincunaca Moisespaj mandashcacunatami cazuna canchij nishpami obligajcuna carca.
9, 10. ¿Antioquiapi huauquicunamanta, Pablomanta, Bernabemantapish imatataj yachanchij?
9 Puntapica, Jehová Diospaj organizacionpimi confiana canchij. Antioquiamanta huauquicunaca cuerpo gobernantepi sirvijcuna, judiocuna cashcatami yacharcacuna. Shinapish circuncisionmanta Diospaj Shimipi ima nishcata ricushpa paicuna caita allichinataca segurosmi carcacuna. ¿Imamanta? Paicunaca Jehová Dios paipaj espíritu santohuan ayudanata, congregacionta pushaj Jesucristopish ñaupajman pushanataca segurosmi carcacuna (Mat. 28:18, 20; Efes. 1:22, 23). Cunan punllacunapipish problemacuna tiyajpica Antioquiamanta huauquicuna shinami Diospaj organizacionpi, Cuerpo Gobernantepipish confiashpa catina canchij.
10 Ishquipica humildadta pacienciata charinapish importantemi can. Pablopi, Bernabepi yuyashun. Paicunaca alli huillaicunata huillangapajca espíritu santohuan agllashca cashpapish circuncisionmanta problemataca mana allichircacunachu (Hech. 13:2, 3). Ashtahuanpish Pabloca: “Jahua pachamanta muscuipi shina Jerusalenman rina cashcata ricuchijpimi huichiyarcani” nircami. Chaita nishpami Dios ayudacushcata intindichirca (Gál. 2:2). Cunan punllacunapipish congregacionpi problemacuna ricurijpi ancianocunaca tucuicuna tandalla catichunmi pacienciata ricuchingapaj, humildes cangapaj esforzarincuna. Paicuna munashcata ruranapaj randica, Jehová Diospaj Shimipimi ayudata mashcancuna, Cuerpo Gobernante huauquicuna cushca instruccioncunatapishmi catincuna (Filip. 2:2, 3).
11, 12. ¿Imamantataj Jehová Diospi shuyanaca importante can?
11 Maipica imata alli intindingapajca Jehová Dios ayudachunmi shuyana canchij. Yuyarishun, Cornelioca Jesús huañushca qꞌuipa huata 36-pimi Diospaj espíritu santota chasquirca. Shinapish Jesús huacharishca qꞌuipa huata 49-pi mana judiocunaca circuncisionta ña mana rurana cashcata Jehová Dios intindichichunmi 13 huatacunata shuyana carcacuna. ¿Imamanta? Jehová Diosca 1900 huatacuna huashamanmi Abrahanhuan circuncisionmanta shuj ari ninacuita rurarca. Judiocunapajca chai costumbreta saquinaca sinchimi cashcanga. Chaimantami alli shungu judiocuna asha asha chai cambiota chasquichunca Jehová Diosca achca huatacunata shuyarca (Juan 16:12).
12 Yaya Diosca pacienciahuan, cꞌuyaihuanmi yachachin. Chaimantami achcata agradicinchij. Paica ñucanchij allipajmi yachachin (Is. 48:17, 18; 64:8). Chaimanta Diospaj organizacionpi cambiocuna, mushuj entendimientocuna tiyajpica jatun tucushpa ñuca yuyashcacunami ashtahuan alli can nishpaca mana yuyanachu canchij (Ecl. 7:8). Chashna yuyai callarishpaca Hechos capítulo 15-pi imata yachashcata pajtachingapaj Jehová Dios ayudachunmi mañana canchij. d
13. ¿Huillacushpaca ima shinataj Diospaj pacienciata ricuchi tucunchij?
13 Ashtahuanpish Bibliamanta yachacujcunapaj panda crishcacunata, costumbrecunata saquina sinchi ricurijpica Dios paipaj espíritu santohuan paicunapaj shunguman chayachunmi pacienciahuan ayudashpa catina canchij (1 Cor. 3:6, 7). Chaipajca Diostami ayudachun mañana canchij. Paimi imata rurana cashcata ricuchinga (1 Juan 5:14).
‘Tucui imallata rurashcatami parlashpa rircacuna’ (Hechos 15:3-5)
14, 15. a) ¿Antioquiamanta huauqui panicunaca Pablota, Bernabeta, paicunahuan viajajcunatapish, respetashcataca ima shinataj ricuchircacuna? b) ¿Pablopish, paita compañajcunapish Feniciapi, Samariapi huauqui panicunataca ima shinataj animarcacuna?
14 Lucasca: “Congregacionmanta huauqui panicunaca ashata paicunahuan rircacuna. Chai qꞌuipaca paicunaca Fenicia, Samaria llajtacunatami pasarcacuna. Shujtaj llajtamanta gentecunapish Diosman tigrarishcata callarishpa parlajta uyashpami tucui huauquicunaca achcata cushicurcacuna” ninmi (Hech. 15:3). Pablota, Bernabeta, paicunahuan viajajcunatapish, compañashpaca paicunata cꞌuyashcata, respetashcata, Jehová Dios bendiciachun munashcatapishmi ricuchircacuna. Antioquiamanta huauqui panicunaca ñucanchijpaj shuj alli ejemplotami saquircacuna. Chaimantami cashna nishpa tapurina canchij: “¿Tucui huauqui panicunata, ‘Diospaj Shimimanta yachachingapaj sinchita trabajaj’ ancianocunatapish respetashcata ricuchinichu?” (1 Tim. 5:17).
15 Pablopish, paipaj compañerocunapish Jerusalenman ricushpaca Feniciamanta, Samariamanta huauqui panicunata mana judiocunaman ima shina huillashcatami parlarcacuna. Chaimi huauquicunaca achcata cushicurcacuna. Paicunapurapica Esteban huañushca qꞌuipa chai llajtacunapi miticushpa rishca judiocunami cashcanga. Cunan punllacunapipish huillangapaj jarcaicuna tiyajpica Jehová Dios bendiciashpa caticushcamantami achcata animarinchij. Cashna laya experienciacunataca tandanacuicunapi, publicacioncunapi jw.org paginapimi ricui tucunchij. ¿Caicunataca aprovechacunchijchu?.
16. ¿Circuncisionmantaca tucuicunachu de acuerdo carcacuna?
16 Antioquiamanta 550 kilometrocunata viajashpami cai huauquicunaca Jerusalenman chayarcacuna. Lucasca: “Congregacionmanta huauqui panicunapish, apostolcunapish, ancianocunapish paicunataca allimi chasquircacuna. Chaimi Pablopish, Bernabepish Dios ayudajpi tucui imallata rurashcata parlarcacuna” nircami (Hech. 15:4). Shinapish “fariseocuna yachachishcata catijcunapishmi maijancunaca Jesusta catijcuna tucushca carca. Chai runacunami tiyacushcamanta shayarishpaca: ‘Jesusta catij mana judiocunapish circuncisiontaca ruranatajmi can. Moisesman cushca Leytapish cazuchunmi paicunataca mandana canchij’” nircacuna (Hech. 15:5). Chaimi circuncisionmanta problemata allichina carca.
‘Apostolcunapish, ancianocunapishmi tandanacurcacuna’ (Hechos 15:6-12)
17. a) ¿Cuerpo Gobernantepica picunataj cajcuna carca? b) ¿Imamantataj Jerusalenmanta ancianocunapish chaipi carcacuna?
17 Proverbios 13:10-pi: “Cunashcata chasquijcunaca, alli yachajcunami tucun” ninmi. Cai consejota catishpami “apostolcunapish, ancianocunapish chaimanta parlanacungapaj tandanacurcacuna” (Hechos 15:6). Cuerpo Gobernantepi sirvij “apostolcuna, ancianocunapish” tucui congregacionmantami decisioncunata agllajcuna carca. Cunan punllacunapipish Cuerpo Gobernantepi huauquicunaca chashnallatajmi rurancuna. ¿Imamantataj “Jerusalenmanta ancianocunapish, apostolcunapish” cuerpo gobernantepi sirvircacuna? Yuyarishunchij, apóstol Santiagota huañuchircacuna, apóstol Pedrotapish prezupimi churarcacuna. Caishuj apostolcunahuanpish chashnallataj tucujpica ancianocunami congregacionta ñaupajman pushangapaj ña allichirishca carcacuna.
18, 19. a) ¿Pedroca imacunatataj nirca? b) ¿Chaita uyajcunaca imatataj yuyashcangacuna?
18 Lucasca: “Chashna tandanacushpa ña achcata parlanacushca qꞌuipami Pedro shayarishpaca cashna nirca: ‘Huauquicuna, Diosca callarimantami shujtaj llajtamanta gentecunapish alli huillaicunata ñuca shimimanta uyashpa crichun, cancunapuramanta ñucata agllarca. Chaitaca cancunaca yachanguichijmi. Runacunapaj shunguta rijsij Diosca ñucanchijman cushca shinallatajmi paicunamanpish espíritu santota cushpa paicunata chasquishcata ricuchishca. Paicuna feta churashcamantami Diosca paicunapaj shunguta chuyayachishca. Chashnami paicunapish, ñucanchijpish chashnallataj cashcata ricuchishca’” ninmi (Hech. 15:7-9). Shuj rijsishca diccionariopi nishca shinaca “achcata parlanacushca” griego shimica (verso 7) chai ancianocuna “investigacushcata, mashcacushcata, paicunapura parlanacushcatami” nisha nin. Chꞌican yuyaicunata charishpapish paicunapura tucuitami parlanacujcuna carca.
19 Pedroca Cornelio, paipaj familiapish huata 36-pi Diospaj espíritu santo chasquishcatami yuyachirca. Shinami judiotapish, mana judiotapish Jehová Dios chasquishcata ricuchirca. Chaimanta huauqui panicunapish shinallatajmi yuyana carca. Cashcata rurajcuna cangapajca Moisesman cushca leyta pajtachinapaj randica Cristopi feta charishcatami ricuchina carcacuna (Gál. 2:16).
20. ¿Circuncisionta ruranata munajcunaca imamantataj Diosta pꞌiñachircacuna?
20 Pedroca Diospaj espíritu santopaj ayudahuan cashna nishpami tucuchirca: “Shinaca ¿imamantataj Jesusta catijcunapaj jahuapi llashaj quipita churashpa Diosta pꞌiñachicunguichijyari? Chai quipitaca ñucanchij ñaupa yayacunapish, ñucanchijpish mana apari tucurcanchijchu. Ashtahuanpish Amito Jesús yallitaj llaquij cashcamanta ñucanchijta quishpichinatami crinchij. Jesusta catij shujtaj llajtamanta gentecunapish chaillatatajmi crincuna” nircami (Hech. 15:10, 11). Circuncisionta ruranata munajcunaca mana judiocunamanca leyta pajtachichunmi obligasha nircacuna. Shinapish chaitaca paicunallataj mana pajtachi pudircacunachu. Chaimantami paicunaca paicunapaj juchacunamanta mana quishpichishca cai tucurcacuna (Gál. 3:10). Ashtahuanpish Leyta difindishpa purinapaj randica paicunapish Jesús huañushcamanta Jehová Dios quishpichishcata agradicina carcacuna.
21. ¿Cuerpo Gobernante shuj alli decisionta japichunca Bernabepish, Pablopish ima shinataj ayudarcacuna?
21 Pedro nishcacunaca gentecunapaj shungumanmi chayarca. Chaimantami “tucui chaipi cajcunaca upalla saquirircacuna”. Chai huashaca Pablopish Bernabepish “Dios ayudajpi shujtaj llajta gentecunapaj ñaupajpi milagrocunata, jatun mancharinacunata rurashcatami tucuita parlarcacuna” (Hech. 15:12). Chaicunata uyashca qꞌuipami apostolcunapish, ancianocunapish circuncisionmanta Dios munashca shina shuj alli decisionta japingapaj listosmi carcacuna.
22-24. a) ¿Cunan punllacunapi Cuerpo Gobernanteca ima shinataj punta siglopi rurashcata catincuna? b) ¿Tucui ancianocuna mana de acuerdo cashpaca imatataj rurancuna?
22 Cunan punllacunapish Cuerpo Gobernanteca Diospaj Shimita liyishpami espíritu santopaj ayudahuan alli decidincuna (Sal. 119:105; Mat. 7:7-11). Manaraj tandanacushpami imacunallamanta parlagrishca listata tiempohuan chasquincuna. Chashnami alli yuyashpa Diosta mañai tucuncuna (Prov. 15:28). Cai tandanacuicunapica Cuerpo Gobernantemanta huauquicunaca imata decidingapajpish Biblia ima nishcata ricushpa paicuna yuyashcata respetohuanmi parlanacuncuna.
23 Congregacionmanta ancianocunaca Cuerpo Gobernantemanta ejemplota catishpaca allitami rurancuna. ¿Mana tucuicuna de acuerdo cashpaca imatataj rurana cancuna? Testigo de Jehovacunapaj sucursalman mana cashpaca superintendente huauquimanmi escribi tucuncuna. Minishtirijpica Testigo de Jehovacunapaj sucursalca Cuerpo Gobernante huauquicunamanmi escribingacuna.
24 Jehová Dios nishcacunata humildadhuan, shungumanta, pacienciahuan pajtachijpica achcatami bendicianga. Shamuj capitulopi ricugrishca shinaca alli causaita cushpa, espiritualmente ñaupajman catichun ayudashpa, tandalla cachunmi bendicianga.
a “ Judaizantespaj yachachishcacuna” nishca recuadrota ricui.
b Abrahanhuan ari ninacushcaca cunancamami valishca can (1943 J.m.h.). Chaipica 75 huatacunatami charirca. Chai ari ninacushcaca circuncisionhuanca chꞌicanmi can Eufratesta pasashpa Canaanman chayajpimi Abrahanpaj ari ninacushcaca callarirca (1919 J.m.h.). Paica 99 huatacunata charishpami circuncisionta rurarca. Chai punllacunamantami judiocunaca circuncisionta rurana carca (Gén. 12:1-8; 17:1, 9-14; Gál. 3:17).
c Jerusalenman rijcunapurapica Titopishmi carca. Paica Jesuspaj catij griegomi carca. Tiempohuanca Pablopaj compañero, mensajeta apajmi tucurca (Gál. 2:1; Tito 1:4). Titoca circuncisionta mana rurashca cashpapish espíritu santo agllashcamantami shuj alli ejemplomi carca (Gál. 2:3).
d “ Testigo de Jehovacunaca Bibliapi nishcatami crincuna” nishca recuadrota ricui.
