1, 2. a) ¿Mana rijsishca pambapi cashpaca imatataj minishtinguiman? b) ¿Causaipi ama chingarishca laya puringapajca Jehová Diosca imatataj cushca?

 SHUJ chaquishca pambapi puricushcata yuyai. Achca polvo, huaira tiyajpimi maita rinata mana yachanguiman. Ama chingaringapajca ¿imatataj minishtinguiman? Pi pushachunmi minishtinguiman. O mana cashpaca Intita, luzerocunata ricushpami mai ñanta rinata yachanguiman. Mana cashpacarin shuj aparatomi maita rinata ricuchichun minishtinguiman. Chashna  ayudacunahuan mai ñanta rinata yachashpami llaquipi mana urmangui.

² Cai pambapi shina ñucanchij causaipi ama chingarishpa puringapajmi Yaya Diosca ñucanchijman concienciata cushca (Santiago 1:17). Cunanca cai tapuicunatami cutichishun: ¿Concienciaca imataj can? ¿Alli concienciata charingapajca imatataj rurana canchij? ¿Shujtajcunapaj concienciataca imamantataj respetana canchij? ¿Alli concienciata charishpaca ima shinataj causashun?

3. ¿Concienciaca imataj can?

³ Yaya Jehová Diosca ñucanchijtaca sumajtami rurashca. Por ejemplo, ñucanchij shungupi ima alli cashcata ima mana alli cashcata yachachunmi rurashca. Chaitaca conciencia nishpami rijsinchij. Griego shimipi conciencia nishpaca ñucanchijllataj ima shina cashcata yachanatami nisha nin. Conciencia alli cajpica ñucanchij yuyaicuna, munaicuna alli cashcata o mana alli cashcatami cuentata cushun. Shinallataj mana alli ruraicunamanta caruyashpami alli ruraicunata rurashun. Ashtahuancarin imata ruragrishpa alli agllashpaca ñucanchij shungupimi tranquilo, cushilla sintirishun. Pero mana allita agllajpica ñucanchij shunguca mana tranquilo sintiringachu. Nota 5-ta ricui.

4, 5. a) ¿Adanpish Evapish mana alli yuyashpa decidishcamantaca imataj tucurca? b) ¿Job runaca alli yuyashpa decidishcamantaca ima shinataj sintirirca? c) ¿Rey David pandarishpaca ima shinataj sintirirca?

⁴ Tucuicunami alli yuyashpa imatapish rurana canchij. Adán Evaca alli yuyaiyuj cashpapish mana allita ruranatami agllarcacuna. Juchata rurashca qꞌuipami mana alli sintirircacuna. Shinapish chashna sintirinaca imapaj  ña mana valircachu (Génesis 3:7, 8). Adán Evaca ima alli cashcata ima mana alli cashcata yachashca jahuami Diosta mana cazunata agllarcacuna.

⁵ Achca gentecunaca juchayujcuna cashpapish alli yuyashpami imatapish rurashcacuna. Por ejemplo, Jobca ima alli cashcata ima mana alli cashcata yachashpami alli decisioncunata agllai tucurca. Chaimantami: ‘Ñuca causashcacamaca ñuca shunguca imata mana juchachingachu’ nirca (Job 27:6). Jobca shungu nishpaca paipaj concienciamantami parlacurca. Cutin, Davidca alli yuyaiyuj cashpapish huaquinpica pandarircami. Por ejemplo, shuj cutinca rey Saulpaj churanata pꞌitishpami paita mana respetashcata ricuchirca. Pero chaita rurashcamantami qꞌuipaca ‘paipaj shungupi achcata llaquirirca’ (1 Samuel 24:5). David ama cutin chaillapitaj pandaringapajmi alli yuyashpa imatapish rurana carca.

6. ¿Jehová Diosca ima shinataj ñucanchijtaca rurashca?

⁶ Jehová Diosca tucuicunatami alli yuyaiyuj cachun rurarca. Chaimantami Diosta mana rijsij gentecunapish ima alli cashcata ima mana alli cashcata yachancuna. Bibliapi nishca shinaca ‘paicunapaj yuyaillatajmi juchachin, mana cashpaca alli nin’ (Romanos 2:14, 15). Huaquincunaca mana cuentata cushpapish Dios mandashcacunatami pajtachincuna. Por ejemplo, achcacunaca shuhuana, huañuchina mana alli cashcata yachashpami chaicunataca mana rurancuna. Cutin shujtajcunaca imata rurangapajpish puntapica allimi yuyarinraj.

7. ¿Imamantataj huaquinpica ñucanchij concienciaca pandachi tucun?

⁷ Juchayujcuna cashcamantami, ñucanchij yuyaicunaca huaquinpica pandachi tucun. Ama chashna pandaringapajca ñucanchij concienciatami ima alli cashcata  ima mana alli cashcata yachachina canchij (Génesis 39: 1, 2, 7-12). Alli concienciata charingapajca Yaya Diosmi espíritu santota cushpa ayudan. Shinallataj Bibliapimi ima alli cashcata ima mana alli cashcata ricuchin (Romanos 9:1). Cunanca alli concienciata charingapaj imata rurana cashcata ricushun.

8. a) ¿Allitami ruracuni yuyashpapish huaquinpica imamantataj pandari tucunchij? b) ¿Manaraj imata rurashpaca imatataj yuyarina canchij?

⁸ Huaquincunaca, “alli sintiringapajca imatapish ruranallami canchij” nincunami. Pero juchayujcuna cashcamantami allitami ruracuni yuyashpapish huaquinpica pandari tucunchij. Jeremías 17:9-pica: “Runapaj shunguca tucui imatapish yalli, umajlla millai shungumi. Chaitaca pi mana yachai tucunchu” ninmi. Cashna umajlla shunguta charishcamantami “allitami ruracuni” nishpapish huaquinpica mana allita ruranchij. Chaimantami imatapish manaraj rurashpaca “¿caitaca Diosca munangachu?” nishpa yuyarina canchij. Por ejemplo, apóstol Pabloca manaraj Jesusta catij tucushpaca allita ruracushcata yuyashpami Diosta sirvijcunata llaquichij carca. Pero Yaya Diosmanta yachai callarishpaca mana allita ruracushcatami cuentata curca. Caita intindishpami paipaj yuyaita cambiarca. Chaimantami, “ñucaca cunan punllacamaca Taita Diospaj ñaupajpica alli yuyaihuan, alli shunguhuanmi causacuni” nirca (Hechos 23:1, 2; 2 Timoteo 1:3).

9. ¿Diosta manchashcata ricuchingapajca imatataj rurana cangui?

⁹ Pita cꞌuyashpaca, pai munashca cosascunallatami rurangui ¿nachu? Shinallataj Jehová Diosta cꞌuyashcamantami pai munashcallata rurana cangui. Mana allita rurajpica Yayitu Diosca llaquiringami. Chaimantami  imatapish alli rurangapaj esforzarina canchij. Nehemías runamanta parlashun. Paica mandaj tucushpaca charijyanataca mana munarcachu. ¿Imamantataj charijyanata mana munarca? Paica: “Taita Diosta manchaj cashcamanta mana chashna rurarcanichu” nircami (Nehemías 5:15). Ñucanchijpish Nehemías shinami Yaya Diosta manchaj cashcamanta tucuipi imatapish alli rurana canchij. Jehová Dios imalla cosascunata mana munaj cashcata yachangapajca Bibliatami leyina canchij. Nota 6-ta ricui.

10, 11. ¿Tragota ubyanata o mana ubyanata decidingapajca Bibliapaj maijan consejocunatataj yuyarina cangui?

¹⁰ Tragota ubyanata o mana ubyanata decidicushpaca ¿Bibliapaj maijan consejocunatataj yuyarina canchij? Por ejemplo, Bibliaca tragota ubyana jucha cashcataca mana ninchu. Chaita ninapaj randica ‘vinoca Yaya Diosmantami tiyan’ ninmi (Salmo 104:14, 15, QC, 1989). Pero, Proverbios 23:20-pi nishca shinaca Diosta sirvijcunaca yallitaj ubyanamantami jarcarina canchij. Apóstol Pablopish ‘maipish cachun fiestacunamanta, machanamantapish jarcarichun’ nircami (Romanos 13:13, NM). Shinallataj 1 Corintios 6:9, 10-pica: ‘Machajcunaca Dios Mandanapica imata mana japingacunachu’ ninmi.

¹¹ Tragota ubyanata o mana ubyanata decidingapajca cashna nishpami tapuri tucungui: “¿Imapajtaj tragota ubyasha nini? ¿Ama dimastij ubyangapajca controlari valishachu? * ¿Ubyanata agllashpaca punllantachu ubyanata munasha? ¿Amigocunahuan alhajata pasasha nishpaca tragotachu minishtini?” Alli yuyarishpa decidingapajca Yayitu Jehová Diostami ayudata mañana  cangui (Salmo 139: 23, 24-ta leyipai). Dios mandashcacunata yuyaipi charishpa alli decisioncunata agllashpaca tranquilomi sintiringui. Pero ¿imallatataj ashtahuan rurana cangui?

12, 13. a) ¿Imamantataj mana tucuicuna shujlla yuyaita charinchij? b) ¿Shujtajcunapaj concienciata respetashcataca ima shinataj ricuchina canchij?

¹² Quiquinpaj ñahuipi ima ruraicuna alli shina ricurijpipish shujtajcunapaj ñahuipica mana alli shinami ricuringa. Por ejemplo, quizás canca asha tragota ubyai tucunguichari, pero shujtajcunaca manachari ni shuj copallatapish ubyanata munanga. ¿Imamantataj gentecunaca chꞌican chꞌican yuyaicunata charinchij?

¹³ Chꞌican chꞌican llajtacunamanta cashcamantami diferente yuyaicunata charinchij. Shinallataj familiapi ima laya huiñachishcamantachari mana tucuicuna igual yuyanchij. O, tal vez huaquincunaca manaraj Yaya Diosta rijsishpaca pai mana munashcatachari rurashpa causarcacuna. Por ejemplo, maijancunaca yallitaj tragota ubyajcunami carca. Chaimantami chai viciopi ama cutin urmangapajca cunanca shuj copallatapish mana ubyanata munancuna (1 Reyes 8:38, 39). Tragota ofrecijpi mana ubyasha nijpica ¿ima shinataj sintiringuiman? ¿coleranguimanchu? ¿ubyanatajmi cangui ninguimanchu? o ¿imamantataj mana ubyasha ningui ninguimanchu? Shujtajcunapaj concienciata respetashpaca paicuna mana munashcata rurachunca mana obliganachu canchij.

14, 15. a) ¿Corinto llajta crijcunaca imamantataj mana tucuicuna igual yuyajcuna carca? b) ¿Pabloca ima consejotataj curca?

¹⁴ Corinto llajtapi causaj huauqui panicunaca mana  tucuicunachu igual yuyajcuna carca. Por ejemplo, mercadocunapi huaquin gentecunaca yanga dioscunaman sacrificiota rurashca aichacunatami cꞌatujcuna carca (1 Corintios 10:25). Pabloca, ‘Dios carashca micuna cashcamantami cai aichata randishpa micunaca mana juchachu’ nirca. Shinapish huaquin huauqui panicunaca, Diospaj Shimita manaraj yachashpaca rurashcalla dioscunatami adorajcuna carca. Chaimantami chai aichata randishpa micunataca mana munarcacuna. Paicunaca, chaita ruranaca Diospaj ñaupajpica mana allichu can nircacunami. ¿Apóstol Pabloca chai huauqui panicuna yuyashcata mana valichishpa, “ñucaca allimi sintirini, micushalla” nishcachu canga?

¹⁵ Mana. Huauqui panicunapaj concienciata respetashpami Pabloca chai aichataca mana micushachu nirca. Shinami mana paillapi yuyacushcata ricuchirca. Pabloca: “Mana ñucanchijpajlla alli canata yuyanachu canchij. Cristopish paipaj allipajllaca mana rurarcachu” nircami (Romanos 15:1, 3). Jesús shinallatajmi apóstol Pablopish mana paillapi yuyashpa shujtajcunamanta sustarishpa achcata ayudarca (1 Corintios 8:13; 10:23, 24, 31-33-ta leyipai).

16. ¿Shujtajcunapaj concienciataca imamantataj mana juzgana canchij?

¹⁶ Shujtajcunapaj rurashcacuna ñucanchij ñahuipi mana alli shina ricurijpica mana huashalla rimanachu canchij. Shinallataj ñuca concienciami paicunapaj concienciatapish ashtahuan alli nishpaca mana yuyanachu canchij (Romanos 14:12, 13-ta leyipai). Yaya Diosca ñucanchijllataj allita ruracushcata o mana allita ruracushcata ricuchunmi shuj concienciata curca. Chaimantami shujtajcunapaj concienciata mana juzgana canchij (Mateo 7:1). Ñucanchij ima decisionta agllashcamanta  congregacionpi llaquirinacui tiyachunca mana munanchijchu. Ashtahuanpish tandalla Yaya Diosta sirvishpa catingapajmi achcata esforzarina canchij (Romanos 14:19).

17. ¿Huaquincunapaj concienciahuanca imataj tucushca?

¹⁷ Apóstol Pedropish “alli yuyaiyuj caichij” nircami (1 Pedro 3:16). Achca gentecunaca Dios mandashcacunata mana cazushcamantami ima alli cashcata ima mana alli cashcata ña mana sintin. Cashna shina gentecunamanta parlashpami apóstol Pabloca: “Pingarina  yuyaillatapish mana charishpami, ima mana allitapish cushicushpa ruranllacuna” nirca (Efesios 4:19, El Nuevo Testamento Quichua, Nueva Versión Internacional, 1999). Ñucanchij aicha chꞌahuanyajpica imata ña mana sintinchijchu ¿nachu? Chashnallatajmi juchata rurashpa catijpica ñucanchij concienciaca chꞌahuanyashca shina imata mana sintinga. Ñucanchij conciencia chashna tucujpimi juchata rurashpapish ima pingaita charishcata mana sintishun.

18, 19. a) ¿Cambaj conciencia ‘mana allitami rurashcangui’ nicuj laya mana alli sintichijpica imatataj rurana cangui? b) ¿Arrepintirishca jahua llaquilla sintiricushpaca imatataj rurai tucungui?

¹⁸ Huaquinpica ñucanchij concienciami mana allitami rurashcangui nicuj laya mana alli sintichin. Ñucanchij conciencia cashna sintichijpimi imapi pandaricushcata  ricuna canchij. Chai qꞌuipaca mana allita ruranata saquishpami ama chaillapitaj pandaringapaj esforzarina canchij. Rey Davidmanta cutin parlashun. Pai pandarijpipish Jehová Diosca llaquishpa perdonaj cashcatami intindirca (Salmo 51:1-19; 86:5). Juchapi urmashca qꞌuipaca Davidca shungu ucupimi achcata llaquirirca. Cashna sintirishpami Jehová Diosta perdonta mañarca. Shinallataj pai rurashca juchata millanayachishpami ama cutin chaillapitaj urmangapaj esforzarirca. Nota 7-ta ricui.

¹⁹ Maijancunaca pandarishcacunamanta arrepintirishca cashpapish huaquinpica chaicunata yuyarishpami yallitaj llaquirincuna. Achca huatacuna pasajpipish pandarishcata yuyarishpami imapajpish mana valishca laya sintirincuna. Canpish Diospaj ñaupajpi ima alli cashcata mana yachashcamantachari ñaupaca pandarircangui.  O, ña yachashca jahuachari pandarircangui. Yuyari, can arrepintirishcamantami Jehová Diosca cantaca cꞌuyaihuan perdonarca. Diosca can pandarishcacunataca mana paipaj yuyaipichu tucuita charicun. Allita ruracushcamantami cunanca Jehová Diospaj ñaupajpi alli ricuringui (1 Juan 3:19, 20-ta leyipai). Huaquinpica pandarishcamantachari shungu ucupica llaquilla sintiringui. Maipicarin achca pingaitami charingui. Cashna sintiricushpaca Yaya Dios cambaj shungutapish yalli tucuita yachaj cashcatami mana cungarina cangui. Jehová Dios perdonashcata yachashpaca cambaj concienciaca tranquilo, allimi sintiringa (1 Corintios 6:11; Hebreos 10:22).

20, 21. a) ¿Cai libroca ima shinataj canta ayudai tucun? b) ¿Yaya Diosta cꞌuyashcamantaca imata ruranatataj agllana canchij?

²⁰ Tucurimui punllacunapi causacushcamantami shuj alli concienciata charingapaj esforzarina canchij. Shinami mana llaquipi urmashun. Cai librota yachashpami ima alli cashcata ima mana alli cashcata alli intindi tucungui. Shinapish cai libropica: “Causaipaj caitami rurana cangui, caitaca mana ruranachu cangui” nishpaca mana tucuita ningachu. Bibliapi nishca shinaca ñucanchijca “Cristopaj mandashcata” catijcunami canchij (Gálatas 6:2). Chaimanta, “Bibliapica shuj mandashca o leyca mana tiyanchu” nishpaca juchataca mana ruranallachu canchij (2 Corintios 4:1, 2; Hebreos 4:13; 1 Pedro 2:16). Chaipaj randica Diosta cꞌuyashcamantami allita ruranata agllana canchij.

²¹ Dios mandashcacunata alli pajtachinata yachashpaca ñucanchij concienciatami alli decisioncunata agllachun yachachicunchij. Chashnami Yaya Dios yuyashca shina yuyashun (Hebreos 5:14). Alli concienciata charishpaca Yaya Jehová Diostami cꞌuyashpa catirashun.