CAPÍTULO 6
¿Ima laya diversioncunatataj agllana canchij?
“Imata rurashpapish, Diosta jatunyachingapaj ruraichij” (1 CORINTIOS 10:31).
1, 2. ¿Diversioncunata agllacushpaca imamantataj cuidadota charina canchij?
SHUJ manzanata micugrishpa shuj parte dañado cashcata ricushpaca ¿imatataj ruranguiman? ¿micunguimanchu? ¿shitanguimanchu? o ¿dañarishca parteta anchuchishpachu micunguiman?
2 Diversioncunapish cai manzana layami can. Huaquin diversioncunaca allimi can. Shinapish casi tucui diversioncunami huainayanahuan, macanacunahuan, Diablopaj ruraicunahuan chagrushca can. Shinaca, diversioncunata agllacushpaca: ¿“Ñuca ima munashcata agllanallami cani” ninguichu? o ¿“tucui diversioncunami mana alli can” ninguichu? Mana cashpaca ¿diversioncunataca alli yuyashpachu agllangui?
3. ¿Diversioncunata agllacushpaca imapitaj yuyana canchij?
3 Tucuicunami samana horasca sumajta pasanata munanchij. Chaipajca imapi pugllanata, imata ricunata imata uyanatami alli agllana canchij. Chaimanta ima diversionta agllagricushpaca ¿caita rurashpaca Diospaj ñaupajpi allichu ricurisha? nishpami yuyarina canchij.
“IMATA RURASHPAPISH DIOSTA JATUNYACHINGAPAJ RURAICHIJ”
4. ¿Eclesiastés 5:4-pi yachachishca shinaca diversioncunata alli agllangapajca imatataj yuyarina canchij?
4 Yaya Diosman mingaricushpaca, cantami tucui ñuca causaipi sirvisha nircanchijmi (Eclesiastés 5:4-ta leyipai). Chaimantami imata rurashpapish, Jehová Diosta jatunyachingapaj rurana canchij (1 Corintios 10:31). Huillanaman, tandanacuiman ricushca layallatajmi samaricushpapish Diosta jatunyachingapaj tucuita alli rurana canchij.
5. ¿Jehová Diostaca ima shinataj adorana canchij?
5 Imata rurashpapish Jehová Diosta adorangapajmi rurana canchij. Chaimantami apóstol Pabloca: ‘Cancunapaj cuerpocunataca, ima jucha illajllata, causaj sacrificiota cucuj laya Diosman cuichij’ nirca (Romanos 12:1). Shinallataj Jesuspish: “Taita Diostaca tucui shunguhuan, tucui almahuan, tucui yuyaihuan, tucui fuerzahuan cꞌuyangui” nircami (Marcos 12:30). Imata ruracushpapish Diospaj ruracushca layami tucui shunguhuan rurana canchij. Israelitacunaca Jehovaman sacrificiota rurangapajca shuj sano animaltami cuna carca. Paicuna mana sano animalta cujpica Yayitu Diosca mana chasquijchu carca (Levítico 22:18-20). Mana allicunata rurajpica Diosca ñucanchij adorashcatapish mana chasquingachu.
6, 7. ¿Diosta adorangapajca imamantataj ñucanchij diversioncunaca limpio, chuya cana can?
6 Diosca: “Ñucaca ima jucha illajmi cani, cancunapish ima jucha illajlla caichij” ninmi (1 Pedro 1:14-16; 2 Pedro 3:11). Jehová Diosca mapa cosascunata rurachun, shujtajcunata llaquichichun, Diablopaj cosascunata rurachunca mana munanchu. Caicunata rurashpaca Diospaj ñaupajpica mana alli ricurishunchu (Deuteronomio 15:21; Romanos 6:12-14; 8:13). Pero, chai juchacunata mana rurashpapish televisionpi, Internetpi, radiopi mapa cosascunata ricujpi o uyajpica Diosca mana cushicungachu. Paihuanpish mana apanacui tucushunchu. Paita adorangapaj imata rurajpipish yanga shinami ricuringa.
7 ¿Diversioncunata agllacushpaca imapitaj yuyana canchij? ¿Ima diversión alli cashcata o mana alli cashcata ricungapajca Bibliapaj maijan yuyaicunatataj ricui tucunchij?
MILLAITACA PꞌIÑASHUNCHIJ
8, 9. a) ¿Imacunatataj mana ricuna, mana uyana canchij? b) ¿Chai mapa cosascunataca imamantataj mana ricuna canchij?
8 Chꞌican chꞌican diversioncunami tiyan. Chai tucui diversioncunamantaca achcacunami ricunapaj, uyanapajca mana alli can. Chaimantami Diosta sirvijcunaca divertiringapajca huaquin cosascunallata ruranchij. ¿Ima diversioncunallataj mana alli can?
9 Achca peliculacunapi, musicacunapi, video juegocunapi, Internetpi, televisionpica mana alli ruraicunallami ricurin. Por ejemplo, huañuchijcunata, macanacuicunata, Diablopaj ruraicunata, mapa cosascunatami ricuchin. Caicuna alli laya o chistoso laya ricurishpapish mana alli canchu. Jehová Dios millashca cosascunata ama ricungapajmi achcata esforzarina canchij (Hechos 15:28, 29; 1 Corintios 6:9, 10). Chashnami Yayitu Diosmanca millai ruraicunata pꞌiñashcata ricuchishun (Salmo 34:14; Romanos 12:9).
10. ¿Mapa cosascunata ricushpa, uyashpaca imataj tucushun?
10 Huaquincunaca, “mapa cosascunata ricunaca ima malo mana canchu, chai ricushcataca nunca mana rurashachu” nincunami. Pero ñucanchijpish chashna yuyashpaca pandarishunmi. Jeremías 17:9-pica: “Runapaj shunguca tucui imatapish yalli, umajlla millai shungumi. Chaitaca pi mana yachai tucunchu” ninmi. Yayitu Dios millanachishca cosascunata ricushpa, uyashpaca ¿ima shinataj mana allicunataca pꞌiñanimi nishunri? Chai mapa cosascunata cutin cutin ricushpa, uyashpa catijpica ñucanchijpajca ima alli layami ricuri callaringa. Qꞌuipacarin ñucanchij conciencia mana alli cashcamantami alli decisioncunata mana agllai tucushun (Salmo 119:70; 1 Timoteo 4:1, 2).
11. ¿Gálatas 6:7-pica imatataj yachachin?
11 Bibliapica: ‘Maijan imata tarpujca, chaillatatajmi tandanga’ ninmi (Gálatas 6:7). Divertiringapaj mana alli cosascunallata agllashpaca mapa cosascunatami rurai callarishun. Por ejemplo, mapa cosascunata ricushcamantami huaquincunaca huainayana juchapi urmashcacuna. Chaimantami diversioncunata alli agllachun Yaya Diosca achca ayudacunata cushca.
IMATA DECIDICUSHPAPISH BIBLIAPI YACHASHCATA YUYARISHUNCHIJ
12. ¿Alli diversioncunata agllangapajca imatataj rurana canchij?
12 Huaquin diversioncunataca Diosca mana ricunachinchu. Chaimantami chaicunataca mana rurana canchij. Pero Yayitu Diosca ‘caitami ricuna, uyana o leyina cangui’ mana ninchu. Chaipaj randica ñucanchijllataj alli yuyashpa imatapish decidichunmi shuj concienciata cushca (Gálatas 6:5-ta leyipai). Jehová Diosca Bibliapimi imalla cosascunata pꞌiñashcata yachachin. Bibliata leyijpimi ñucanchij concienciaca ima alli cashcata ima mana alli cashcata ricunata yachanga. Shinallataj Diospaj munai maijan cashcata yachashpami alli decisioncunata agllashun (Romanos 12:2).
Bibliapi yachashcacunata yuyarishpami alli decisioncunata agllashun
13. a) ¿Imamantataj tucuicuna chꞌican chꞌican diversioncunata agllanchij? b) ¿Diosta sirvijcunaca ima shinataj diversioncunata agllana canchij?
13 Tucuicunami chꞌican chꞌican gustocunata charinchij. Chaimantami imata ricuna, imata uyanaca mana tucuicunapaj igual can. Ñucanchijpaj huaquin diversioncuna alli shina ricurijpipish shujtajcunapajca mana alli shinami ricuringa. Chaimantami Bibliapi yachashcacunata yuyarishpa diversioncunataca alli agllana canchij (Filipenses 1:9). Chashnami Dios munashca diversioncunallata agllashun (Salmo 119:11, 129; 1 Pedro 2:16).
14. a) ¿Ñucanchijpajca diversioncunallapi pasanapaj randica imataj ashtahuan importante can? b) ¿Apóstol Pabloca ima consejotataj curca?
14 Ñucanchijpajca diversioncunallapi pasanapaj randica Yayitu Diosta sirvinami ashtahuan importante can (Mateo 6:33-ta leyipai). Chaimantami, “¿yallitajchu diversioncunapi pasacuni?” nishpa yuyarina canchij. Diversioncunallapi pasashpaca tiempota perdicushcataca mana cuentata cushunchu. Apóstol Pabloca: “Cancuna ima shina causacushcata alli yuyarichij, ama upa shina caichijchu. Ashtahuanpish yachajcuna shinataj causaichij. Mana alli punllacunapimi canguichij, ama ima yangacunapi punllata tucuchichijchu” nircami (Efesios 5:15, 16, El Nuevo Testamento Quichua Nueva Versión Internacional, 1999). Chaimantami diversioncunapi mashna tiempota pasanata alli ricuna canchij. Yaya Diospajraj imatapish puntapica ruranatami mana cungarina canchij (Filipenses 1:10).
15. ¿Jehovamanta ama caruyangapajca diversioncunataca ima shinataj agllana canchij?
15 Dios millanachishca cosascunahuan divertirinataca mana yuyanallapishchu canchij. Pero, huaquin diversioncuna alli cashcata o mana alli cashcata mana seguro cashpaca ¿chaicunahuan divertirinallachu canchij? Caipi yuyashun. Can, shuj jatun urcupi cashpaca ¿chai urcu filoman cꞌuchuyanguimanchu? Llaquipi mana urmasha nishpami ashitullatapish mana cꞌuchuyanguiman ¿nachu? Diversioncunata mana alli agllashpaca chashnallatajmi llaquicunata apai tucunchij. Chaimantami Bibliapica: “Mana allimantaca cambaj chaquita anchuchi” nin (Proverbios 4:25-27). Shinaca shuj diversión alli cashcata o mana alli cashcata mana seguro cashpaca chaimantami caruyana canchij. Chashnami Diospaj ñaupajpi alli ricurishun.
JEHOVÁ DIOS SHINA YUYASHUNCHIJ
16. a) ¿Ima cosascunatataj Yaya Diosca pꞌiñan? b) ¿Millai cosascunata millashcata ricuchingapajca imatataj rurana canchij?
16 Salmo 97:10-pica: “Mandaj Diosta cꞌuyajcunaca, millaita ruranataca pꞌiñaichigari” ninmi. Bibliapica Yaya Dios imata yuyajta, ima shina sintirijtami ricuchin. Chaimantami Bibliata leyicushpaca, “¿cai versoca Jehovamantaca imatataj yachachin? ¿Pai shina yuyangapajca imatataj rurai tucuni?” nishpa tapurina canchij. Por ejemplo, Bibliapica: “Llulla cꞌallucunata, manapish ima millaita rurajpi yanga huañuchijta, millaita rurana yuyailla purijta, millaita ruranaman callpajta Taita Diosca pꞌiñanmi” ninmi (Proverbios 6:16-19). Shinallataj Gálatas 5:19-manta 21-camaca: ‘Huainayanamanta, rurashcalla dioscunata adoranamanta, brujianamanta, pꞌiñanacushcalla causanamanta, cꞌaminamanta, jahualla pꞌiñarinamanta, envidianamanta, maipish cachun fiestacunamanta caruyaichij’ ninmi. Cai versocunata ricushpami alli diversioncunata agllai tucushun. Ñucanchijlla cashpa, imata ruracushpapish Jehová Diosta jatunyachingapajmi tucuita rurana canchij (Salmo 11:4; 16:8; 2 Corintios 3:18, NM). Chashnami alli shunguta charishcata ricuchishun
17. ¿Imapi divertirinata manaraj agllashpaca imatataj yuyarina canchij?
17 Imapi divertirinata manaraj agllashpaca: “¿Caita rurashpaca Diospaj ñaupajpica allichu ricurisha? ¿Ñuca concienciaca ima shinataj sintiringa?” nishpami alli yuyarina canchij. Diversioncunata alli agllangapaj Bibliapi shujtaj consejocunata ricushun.
18, 19. a) ¿Apóstol Pabloca imatataj rurachun nirca? b) ¿Diversioncunata alli agllangapajca Bibliapaj maijan consejocunatataj yuyarina canchij?
18 Diversioncunata alli agllashpaca alli yuyaicunatami charishun. Chaimantami Apóstol Pabloca: ‘Tucui imapipish mana llulla canata, tucuipi alli canata, tucuipi cashcata ruraj canata, tucuipi chuya canata, tucuipi cꞌuyashca canata, tucuipi allimi nishca canata yuyaichij. Chashna cana yuyailla caichij’ nirca (Filipenses 4:8). Alli, limpio yuyaicunallata charishpaca salmista shinami Diosmanca: “Ñuca rimashca shimicunaca quiquin munanalla cachun. Ñuca shungupi yuyarishcacunapish quiquinpaj ñaupajpi munanalla cachun” nishun (Salmo 19:14).
19 Ñucanchijca: “¿Shuj peliculata o programata ricushca qꞌuipaca ima shinataj sintirini? ¿Alli yuyaicunatachu charini? ¿Ñuca concienciaca tranquilochu sintirin? (Filipenses 2:4; 1 Timoteo 1:5, 19). ¿Diosta mañangapajpish allichu sintirini o pingaihuanchu mañani? ¿Cai peliculata o programata ricushcamantaca mapa yuyaicunatachu charini? (Mateo 12:33; Marcos 7:20-23). ¿Diosta mana sirvijcuna shinachu diversioncunata agllacuni?” nishpami yuyarina canchij (Romanos 12:2). Cai tapuicunapi yuyashpaca diversioncunata mana alli agllacushcatachari cuentata cushun. Chashna cajpica Jehovamanta ama caruyangapaj imata ruranatami ricuna canchij. Ñucanchijpish salmista shinami Diostaca: “Yangacunallapi ñuca ñahuita churanamanta anchuchihuayari. Quiquinpaj ñanpi puringapaj causaita cuhuayari” nishpa mañana canchij * (Salmo 119:37).
SHUJTAJCUNATA AMA ÑITCACHISHUNCHIJCHU
20, 21. ¿Diversioncunata agllacushpaca imamantataj shujtajcuna yuyashcata respetana canchij?
20 1 Corintios 10:23, 24-pi ima nishcatapishmi yuyarina canchij. Chaipica: “Tucui imatapish rurai tucunimi, ashtahuanpish chaica mana tucui allichu. Tucui imatapish rurai tucunimi, ashtahuanpish chaica mana tucui sinchiyachinchu. Pipish quiquinpaj allipajllaca ama mashcachun, ashtahuanpish shujtajpaj allipaj mashcachun” ninmi. Imata decidi pudishpapish mana ñucanchijllapi yuyashpa decidinachu canchij. Ashtahuanpish huauqui panicunapi yuyashpami imatapish alli decidina canchij.
21 Mana tucuicunachu igual imatapish yuyanchij. Por ejemplo, ñucanchijpajca televisionpi shuj programata ricunaca allichari ricuringa. Pero chai programata ricushcata yachashpachari shujtajcunaca mana alli sintiringacuna. ¿Chaita yachashpaca imatataj ruranguiman? Chai programata ricuna cambaj alli cajpipish shujtajcunapaj concienciata respetashcamantachari mana ricunguiman. Chashnami ‘huauquicunapaj irqui yuyaita chugrichishpa mana juchallingui. Cristotapish pꞌiñashpa mana juchallinguichu’ (1 Corintios 8:12). Huauqui panicuna ñucanchij culpamanta ñitcarishpa Jehovamanta caruyachunca mana munanchijchu (Romanos 14:1; 15:1; 1 Corintios 10:32).
22. ¿Ima shinataj shujtajcunata respetashcata ricuchinchij?
22 Shujtajcuna can mana munashcacunata ricujpipish, uyajpipish, rurajpipish ¿imatataj ruranguiman? Huauqui panicunata cꞌuyashcamantami paicunataca “caitaca mana ruranachu canguichij” nishpa mana obligana canchij. Por ejemplo, carrotaca mana tucuicunachu igual manejancuna. Huaquincunaca gushtullata, cutin caishujcunaca ratomi manejancuna. Chashnallatajmi canpish, shujtajcunapish Diospaj mandashcacunata alli pajtachicushpapish, divertiringapajca chꞌican chꞌican gustocunata charinchij (Eclesiastés 7:16; Filipenses 2:4).
23. ¿Ima shinataj alli diversioncunata agllashun?
23 Ñucanchij conciencia alli cajpica alli diversioncunatami agllashun. Shinallataj huauqui panicunapi yuyashpami imapi divertirinataca alli agllana canchij. Yaya Diosta jatunyachingapaj imatapish rurashcamantami cushilla sintirishun.
^ Diversioncunata alli agllangapajca, Proverbios 3:31; 13:20; Efesios 5:3, 4; Colosenses 3:5, 8, 20-pi ima nishcatami yuyarina canchij.