Jehová Diosta can cꞌuyashcamantami caita nisha ninchij:

Achca gentecunaca panda yuyaicunatami Diosmanta yachachincuna. Shinapish Jesusca: ‘Mana llullataca rijsinguichijmi. Chai mana llullami huatashca shinamanta cacharichinga’ nircami (Juan 8:32). Bibliapi Diosmanta verdadta yachashpaca ¿manachu cushilla sintirircangui? (2 Timoteo 3:1).

Diosca Bibliamanta alli yachachunmi munan. Ñucanchijpish gentecunata cꞌuyashcamantami Bibliamanta yachachinchij. Pero mana chaillatachu rurana canchij. Diosta cꞌuyashcamantami tucui pai mandashcacunata cazushpa causana canchij. Jesusca Diosta cꞌuyashcata ima shina ricuchinatami nirca. Paica: “Ima shinami ñucaca ñuca Yaya mandashcacunata cazushpa pai cꞌuyashca cani, chashnallatajmi cancunapish ñuca mandashcacunata cazushpaca, ñuca cꞌuyashca canguichij” nircami (Juan 15:10, QC, 1989).

Jesusca paipaj Yayata cꞌuyashcamantami tucuipi cazun. Ñucanchijpish Jehová Diosta tucuipi cazujpica paica cꞌuyangami. Jesusca: ‘Cai nishcacunata alli intindishpa chaitataj rurashpaca cushichishcami canguichij’ nircami (Juan 13:17).

Cai librohuan Diosmanta alli yachashpa paipaj amigo tucuchunmi munanchij. Shinallataj Diosta cada punlla ashtahuan cꞌuyashpa catichun, huiñai causaitapish charichunmi Yayitu Diosta mañanchij (Judas 21).