CAPÍTULO 16
Diablo pandachichunca amataj saquishunchijchu
“Diablotaca ama ricunachichijchu. Chashna rurajpica paica miticungallami” (SANTIAGO 4:7).
1, 2. ¿Diablo ama pandachichunca imatataj yachana canchij?
DIOSCA callaripica gentecuna cushilla causachunmi munarca. Paraíso Allpapimi chashna causashun. Pero Diablopish demoniocunapish cai pachata mandacushcamantami manaraj Dios munashca shina causai tucunchij (2 Corintios 4:4). Chai millai angelcunataca mana ricui tucunchijchu. Pero paicunaca achca podertami charin.
2 Cai temapica Diablopaj trampacunapi ama urmangapaj, Diosmanta ama caruyangapaj imata ruranatami yachashun. Jehová Diosmi ayudasha nin. Pero Diablo ama pandachichunca paipaj trampacuna maijan cashcatami yachana canchij.
DIABLOCA PꞌIÑA LEÓN SHINAMI CAN
3. ¿Diabloca imatataj munan?
3 Diabloca Diosmantami caruyachisha nin (Salmo 7:1, 2; 2 Timoteo 3:12). Paica, ‘gentecunaca mana cꞌuyaimanta Diosta sirvinchu, ima llaquicuna japijpica Diosta sirvinata saquingami’ ninmi (Job 2:4, 5-ta leyipai). Diosmanta yachasha nijpica Diablopish demoniocunapish jarcaicunatami churan. Diosman mingarishpa bautizarijpicarin ashtahuan jarcaicunatami churancuna. Bibliapica, Diabloca: “León huacaricuj shinami, maijanta millpungapaj muyundijta mashcashpa puricun” ninmi (1 Pedro 5:8).
Diospajta ruracushcamantami Diabloca pꞌiña can
4, 5. a) ¿Diabloca imatataj mana rurai tucun? b) ¿Diosmanta Diablo ama caruyachichunca imatataj rurana canchij?
4 Diablopish demoniocunapish paicuna munashca shina ñucanchijta llaquichichunca Diosca mana saquinchu. Chaimantami paicunataca mana manchana canchij. Diosca paita sirvijcunataca cuidacunmi. Paica, achcacunami jatun llaqui punllamanta quishpichishca canga nircami (Apocalipsis 7:9, 14). Jehová nishcacuna pajtarichunca Diabloca mana jarcai tucungachu.
5 Diosta cazujpica Diabloca Diosmanta mana caruyachi tucungachu. Bibliapica: ‘Cancuna Diosmanta mana anchurijpica, paipish cancunahuanmi canga’ ninmi (2 Crónicas 15:2; 1 Corintios 10:13-ta leyipai). Abel, Enoc, Noé, Sara, Moisés, shujtajcunapish Diosmantaca mana caruyarcacunachu (Hebreos 11:4-40). Ñucanchijpish paicuna shinallatajmi cana canchij. Santiago 4:7-pica: “Diablotaca ama ricunachichijchu. Chashna rurajpica paica miticungallami” ninmi.
DIABLOHUAN MACANACUCUJ SHINAMI CANCHIJ
6. ¿Ima shinataj Diabloca Diosmanta caruyachisha nin?
6 Jehová Dios mana saquijpimi Diabloca tucui pai munashcata mana rurai tucun. Pero Diabloca ima layapish pandachisha ningami. Ñaupa punllacunamantami Diabloca tucui laya trampacunata churashpa gentecunata pandachishca. ¿Cunan punllacunapica ima shinataj gentecunata pandachicun?
7. ¿Imamantataj Diabloca ñucanchijta llaquichisha nin?
7 Apóstol Juanca: “Cai pachapi millaita rurajcunaca Diablopaj ucupimi” nircami (1 Juan 5:19). Diabloca gentecuna pai munashcata rurachunmi yuyaita cucun. Diosta sirvijcunapish paita cazushpa mana allita rurachunmi munan (Miqueas 4:1; Juan 15:19; Apocalipsis 12:12, 17). Shinallataj Diabloca pai munashcata rurana punllacuna ashalla cashcatami yachan. Chaimantami huaquinpica ima llaquita churashpa urmachin. Huaquinpicarin manaraj cuentata cujpimi pandachin.
8. ¿Efesios 6:12-pica imatataj yachachin?
8 Efesios 6:12-pica: “Ashtahuanpish jahua huairapi purishpa mandacuj millai supaicunahuanmi macanacucunchij” ninmi. Ñucanchijca Diosman mingarishca horasmantami Diablohuan, demoniocunahuanpish macanacucuj shina causacunchij. Chaimantami apóstol Pabloca sinchi cachun animarca (Efesios 6:11, 13, 14).
9. ¿Ñucanchijta pandachisha nishpaca Diabloca imatataj ruran?
9 Diablopish demoniocunapish ima laya tucushpapish pandachisha ninmi. Diablopaj maijan trampapi manachari urmarcanchij. Pero shujtaj trampata churashpa urmachingapajmi Diabloca ima debilidadcunata charishcata ricucun. Chai trampacunapi ama urmangapajca Diablo ima shina pandachijtami Bibliapi yachana canchij (2 Corintios 2:11). Nota 31-ta ricui.
DEMONIOCUNAMANTA CARUYASHUNCHIJ
10. a) ¿Diablopish demoniocunapish ima shinataj pandachin? b) ¿Diablopajta rurashpaca Diospaj ñaupajpica ima shinataj ricurishun?
10 Diablopish demoniocunapish ñucanchijta urmachisha ninmi. Por ejemplo, adivinajcuna, brujocunapish paicunapaj ayudahuanmi imatapish rurancuna. Paicunaca huañushcacunahuan parlai tucunchijmi nishpami crichincuna. Diosca chaicunapajman richun o ñucanchijllataj chaicunata practicachunca manataj munanchu. Diablopajta rurashpaca Diostaca mana adorai tucushunchu (Deuteronomio 18:10-12; Apocalipsis 21:8). Chaimantami Diablopajta ama rurangapajca cuidadota charina canchij (Romanos 12:9).
11. ¿Brujeriata o adivinacionta mana practicashpapish imamantataj cuidarina canchij?
11 Diablopajta rurashpaca Diosmantami caruyashun. Adivinacionta o brujeriata manachari practicanchij. Pero chaicunamanta parlanata o yachanata munajpica Diabloca jahuallami urmachinga.
DIABLOCA PANDACHISHA NINMI
12. ¿Diabloca imatataj yuyachun munan?
12 Diabloca, ‘mana allitaca alli nichun, allitaca mana alli nichunmi’ asha asha gentecunapaj yuyaita pandachin (Isaías 5:20). Paica Bibliapi nishcacuna mana valishcata yuyachunmi munan. Shinallataj Diosta mana cazushpa cushilla causai tucushcata crichunmi munan.
13. ¿Diabloca ima shinataj gentecunatapish angelcunatapish dudachisha nishca?
13 Diabloca gentecunapaj shungupi dudacunata churashpami Diosmanta caruyachisha nin. Yuyashun, Evataca: “¿Cancunataca Taita Diostajchu, cai huertapi tiyaj yuracunamantaca ama micunguichij nirca?” nishpami dudachirca (Génesis 3:1). Job causashca punllacunapipish chashnallatajmi rurasha nirca. Chaimi angelcunapaj ñaupajpi Diostaca: ‘Jobca, cantaca mana yangamanta manchanchu’ nirca (Job 1:9). Shinallataj Jesús bautizarishca qꞌuipaca: “Taita Diospaj Churitaj cashpaca, cai rumicunata tanda tucuchun niyari” nircami (Mateo 4:3).
14. ¿Ñucanchijta pandachingapajca Diabloca imatataj ruran?
14 Cunan punllacunapish dudacunata churashpami Diabloca pandachisha nin. Por ejemplo, huaquin ruraicuna, diversioncuna alli laya ricurishpapish brujeriahuan, adivinacionhuanmi chagrushca can. Chai ruraicunapi participashcamantami maijan huauqui panicunapish pandarishcacuna (2 Corintios 11:3). ¿Ñucanchijpish ama pandaringapajca imatataj rurana canchij? ¿Diablo pandachicushcataca ima shinataj yachai tucunchij? Cunanca Diablopaj ishqui trampacunamantami parlashun.
DIABLOCA ÑUCANCHIJ IMATA MUNASHCATAMI YACHAN
15. a) ¿Peliculacunapi, televisionpi, Internetpica imallatataj ricuchincuna? b) ¿Shamuj punllacunapi ima tucunata yachasha nishpaca maijancunaca imatataj rurancuna?
15 Mana cuidadota charijpica Diablopish demoniocunapish ñucanchijta llaquichi tucunmi. Paicunaca alli yuyashpami trampacunata churan. Por ejemplo, cunan punllacunapica peliculacunapi, televisionpi, Internetpimi magiata, brujeriata, demoniocunata ricuchincuna. Shinallataj maijancunaca horóscopo nishcata leyishpa, maquita leyichishpa, cuyipi, velapi ricuchishpami shamuj punllacunapi ima tucunata yachasha nincuna. Paicunaca, “chai cosascunata ricuna o ruranaca mana ima dañuchu” nincunami. Pero, ¿imamantataj chai cosascunataca mana ricunallapish canchij? (1 Corintios 10:12).
16. ¿Demoniocunamanta parlaj cosascunataca imamantataj mana uyana mana ricuna canchij?
16 Diablopish demoniocunapish ñucanchij imata yuyacushcataca mana yachai tucunchu. Pero paicunaca imata rurajta ricushpami ñucanchij imata munashcata yachai tucun. Por ejemplo, achca peliculacunapi, librocunapi, musicacunapica magiata rurajcunamanta, demoniocunamantami parlancuna. Chaicunata ricujpi, uyajpica chaicunata munashcatami Diabloca ricunga. Chaita cuenta cushpaca chaicunata rurachunmi ashtahuan trampacunata Diabloca churanga (Gálatas 6:7-ta leyipai).
17. ¿Diabloca ima shujtaj trampacunatataj churan?
17 Tucuicunami alli saludta charinata munanchij. Diabloca chaita yachashpami trampacunata churan. Por ejemplo, maijancunaca ungüi japijpica chꞌican chꞌican doctorcunapajmanmi rincuna. Pero mana jambirishcacunachu (Marcos 5:25, 26). Chaimantami ungüimanta sustarishpa brujocunapajman rishcacuna. Pero Diosta sirvijcunaca magiahuan, brujeriahuan chagrushca jambicunata o tratamientocunataca mana chasquinachu canchij (Levítico 19:31).
Ungushca cashpaca Diospi shunguta churai
18. ¿Ima tratamientocunatataj mana chasquina canchij?
18 Ñaupa Israelpica maijancunaca brujocuna, adivinajcunami carca. Chaimantami Diosca: ‘Cancuna achcata mañacujpipish, manataj uyanichu. Ñucaman maquicunata chutajpipish ñuca ñahuitaca shujmanmi churani’ nircami (Isaías 1:15). Ñucanchijcunapish chai millai cosascunata rurajpica ungushca cajpipish Diosca mana ayudangachu (Salmo 41:3). Ima jambita mashcacushpa o tratamientota rurasha nicushpaca brujeriahuan ama chagrurishca cachunmi alli ricuna canchij (Mateo 6:13). Brujeriahuan chagrurishca cajpica mana chasquinachu canchij. Nota 32-ta ricui.
DEMONIOCUNAMANTA PARLOCUNA
19. ¿Imamantataj maijan gentecunaca Diablota demoniocunatapish manchancuna?
19 Maijancunaca Diablopish demoniocunapish mana tiyanchu nincunami. Pero demoniocunaca achcacunataca llaquichishcami. Huaquin gentecunaca demoniocuna ama llaquichichun nishpami panda costumbrecunata rurancuna. Cutin shujtajcunaca, “demoniocunami caita o chaita rurashpa llaquichirca” nishpami purincuna. Chaita uyashpami shujtajcunapish Diablota manchancuna.
20. ¿Imamantataj Diablomanta parlocunata mana nina canchij?
20 Diabloca gentecuna paita manchachunmi munan (2 Tesalonicenses 2:9, 10). Paica gentecuna brujeriapi, adivinacioncunapi crichunmi munan. Chaimantami llullacunata crichishpa pandachin. Maijan gentecunaca “ñucatajmi demoniocunata ricurcani o paicunahuanmi parlarcani” nincunami. Chai parlocunaca manachari cierto can. Pero shujtajcunaman parlajpica mirachishpami parlashpa catincuna. Ñucanchijcunaca chai parlocunata nishpa shujtajcunata mana manchachinachu canchij. Chashna rurashpaca Diablopaj parte tucushcatami ricuchishun (Juan 8:44; 2 Timoteo 2:16).
21. ¿Demoniocunamanta parlanacunapaj randica imamantataj parlana canchij?
21 Demoniocunaca maipi ricurircachari o llaquichircachari. Pero mana shujtajcunaman chaita parlashpa purinachu canchij. Diosta sirvijcunaca Diablo llaquichinataca mana manchanachu canchij. Chaipaj randica Jesusmanta, pai imalla rurai tucushcatami parlana canchij (Hebreos 12:2). Jesusca demoniocunamantaca mana parlashpa pasajchu carca. Jehová Diosmantami parlaj carca (Hechos 2:11; Lucas 8:1; Romanos 1:11, 12).
22. ¿Diablo ama pandachichunca imatataj rurasha ningui?
22 Diabloca Jehová Diosmanta caruyachingapajca imatapish rurasha ningami. Pero ima shina pandachisha nishcataca allimi yachanchij. Chaimantami brujeriapi, adivinacionpi o chashna cosascunapi ama urmangapaj cuidarina canchij. Diablo ñucanchijta pandachichunca mana saquinachu canchij (Efesios 4:27-ta leyipai). Diablomanta cuidarishpaca mana paipaj trampacunapi urmashunchu. Diosmi ñucanchijtaca tucuipi cuidanga (Efesios 6:11).