Dibujota ricui. Chaipica Mateo, Marcos, Lucas, Juan, Pedro, Jacobo [o Santiago], Judas, Pablomi ricurin. Paicunaca Jesuspaj punllacunapimi causarca. Jesusmanta parlashpami huaquin librocunata Bibliapi quillcarca. ¿Paicunamanta ashtahuan yachasha ninguichu?...

Mateo, Juan, Pedroca Jesuspaj alli amigocunami carca. Paicunaca Jesushuan huillashpa purij apostolcunami carca. ¿Paicunata dibujopi ricuchi tucunguichu?...  Mateo, Juanpish Jesusmantami cada uno shuj librota quillcarca. Ashtahuanpish Juanca Apocalipsis librota, Primera, Segunda, Tercera de Juan cartacunatapishmi quillcarca. Apóstol Pedropish Primera, Segunda de Pedro cartacunatami quillcarca. Shuj punllaca jahua pachamanta: “Caica ñuca cꞌuyashca Churimi, paipimi cushicuni” nishpa Jehová rimashcatami Pedroca uyarca. Chaitami paica Segunda de Pedro cartapi quillcarca.

Dibujopi ricurij shujtaj cꞌaricunapish Jesusmantami quillcarca. Shujca Marcosmi can. Paica Jesusta prezu apacujtami ricushca canga. Caishujca Lucasmi can. Paica doctormi carca. Jesús huañushca qꞌuipami paica Jesusta catij tucushca canga.

Jesuspaj ishqui qꞌuipa huauquicunapish Jesusmantami quillcarca. ¿Picuna cashcata yachanguichu?... Dibujopi ricui. Jacobo [o Santiago], Judasmi can. Puntapica paicunaca Jesús yachachishcata mana crircachu. Jesusca yuyai illajmi puricun nircacunami. Shinapish qꞌuipaca Jesusta catijcunami tucurca.

Cunanca dibujopi ricushpa Pablomanta parlashun. Jesusta manaraj catishpaca Saulo shutimi carca. Paica Jesusta catijcunata pꞌiñashpami llaquichij carca. ¿Pablo ima shina Jesusta catij tucushcata yachasha ninguichu?... Damasco llajtaman ricushpami Pabloca jahua pachamanta parlajta uyarca. ¿Pitaj parlacurca? Jesusmi parlacurca. Jesusca: “¿Ima nishpataj ñucata catijcunata pꞌiñashpa llaquichisha ningui?” nishpami tapurca. Caita uyashpami Pabloca paipaj causaita cambiana cashcata entendirca. Chashnami Jesusta catij tucurca. Qꞌuipaca paica Bibliapaj 14 librocunatami quillcarca. Romanosmanta callarishpami Hebreos cartacama quillcarca.

Tucui punllacunami Bibliata rezanchij. Chashnami Jesusmanta ashtahuan yachanchij. ¿Jesusmanta ashtahuan yachasha ninguichu?...