YACHAI 10
Tandanacuicunaman shamushpaca cushicunguimi
¿Cantaca testigo de Jehovacunapaj tandanacuiman shamuchun invitashcachu? Cai tandanacuicunaman manaraj rishca cashpaca rinata manchanguichari. Canca: “¿Cai tandanacuicunapica imatashi rurancuna? ¿Imamantataj rinaca importante can?” ninguichari. Cai yachaipica tandanacuicunaman rishpaca Diospaj amigo cana cambaj causaita ayudashcatami yachangui.
1. ¿Testigo de Jehovacunaca imamantataj tandanacunchij?
Bibliata quillcaj shuj runaca, tandanacuicunapica Mandaj Diostami alli nishpa alabani nircami (Salmo 26:12). Testigo de Jehovacunapish muyundij Allpapimi cada semana Diosta alabangapaj tandanacunchij. Shinallataj Diosta cantangapaj, paita mañangapajmi tandanacunchij. Cada huatami jatun tandanacuicunatapish ruranchij. Chashnami cushilla sintirinchij.
2. ¿Tandanacuicunapica imatataj yachangui?
Tandanacuicunapica Diospaj Shimitami yachangui. Chaipica Dios mandashcacunata ‘alli intindichunmi’ ayudan (Nehemías 8:8-ta liyipai). Tandanacuicunapica Jehová Dios cꞌuyaj, llaquij cashcatami yachangui. Yaya Dios canta cꞌuyashcata yachashpaca paipajmanmi ashtahuan cꞌuchuyangui. Shinallataj cushilla causangapaj imata rurana cashcatami yachangui (Isaías 48:17, 18).
3. ¿Shujtajcunahuan tandanacunaca imamantataj alli can?
Jehová Diosca tandanacuchunmi munan. Paica: ‘Caishujmanta chaishujmanta ayudanacushpa allicunata rurangapaj cꞌuyaihuan yuyachinacuichij’ ninmi (Hebreos 10:24, 25). Tandanacuicunapica caishujmanta chaishujmantami preocuparinchij. Chaipica can layallataj Diosmanta ashtahuan yachasha nijcunatami rijsingui. Maijan jovencuna, cazadocunaca problemacunata charishpapish cushillami causancuna. Tandanacuicunaman shamushpaca paicunahuanmi parlai tucungui. Bibliamanta cushichij yuyaicunatapishmi yachangui (Romanos 1:11, 12-ta liyipai).
ASHTAHUAN YACHAI
Testigo de Jehovacunapaj tandanacuicuna ima shina cashcata, cai tandanacuicuna canta ima shina ayudai tucushcatapish yachai.
4. Testigo de Jehovacunapaj tandanacuicuna
Jesuspaj apostolcunaca tandanacushpami Jehová Diosta adorajcuna carca (Romanos 16:3-5). Colosenses 3:16-ta liyipai, NWT. Qꞌuipaca cai catij tapuitami yachashun:
-
¿Jesusta catijcunaca ima shinataj Diosta adorajcuna carca?
Cunan punllacunapish Diosta sirvijcunaca Tandanacuna huasicunatami charincuna. ¿Chaipica imatashi rurancuna? VIDEOTA ricui. Qꞌuipaca janaj ladopi tiyaj fotota ricui. Y cai catij tapuicunatami yachashun.
-
¿Colosenses 3:16-pi nishca shinaca tandanacuicunapica Jesusta catijcunaca imatataj rurajcuna carca? ¿Cunanpish Diosta sirvijcunaca imatataj rurancuna?
-
¿Videopi o fotopi tandanacui ima shina cajta ricushpaca imatataj ashtahuan munangui?
2 Corintios 9:7-ta liyipai. Qꞌuipaca cai catij tapuitami yachashun:
-
¿Testigo de Jehovacunapaj tandanacuicunaca imamantataj gratis can?
Canta yachachijhuan cai semana tandanacuipi imata yachagrishcata parlanacuichij.
-
¿Tandanacuicuna ima laya cashcata ricushpaca imatataj ashtahuan munangui?
¿Caita yacharcanguichu?
JW.ORG paginapica maillapi tandanacuicuna tiyashcata, ima horaslla tandanacujcuna cashcata ricui.
-
Ñucanchij tandanacuicunapica conferenciacuna, videocunapishmi tiyan. Ima shina predicanatapishmi yachachin. Chaipica callaringapajpish tucuchingapajpish shuj cantotami cantanchij, shuj mañaitapishmi ruranchij.
-
Tandanacuicunapica maipica maquita alzashpami tapuicunata cutichinchij.
-
Familiacunapish mayorllacunapish jovencunapish huahuacunapish cai tandanacuicunamanmi shamui tucun.
-
Tandanacuicunapica cullquitaca mana mañanchijchu.
5. Tandanacuicunaman ringapajmi esfuerzota rurana canchij
Jesuspaj familiapi yuyai. Paicunaca cada huatami Jerusalenpi tiyaj Diospaj temploman rijcuna carca. Chaiman chayangapajca Nazaretmanta urcucunata rishpa 100 kilometrocunatami purina carcacuna. Lucas 2:39-42-ta liyipai. Qꞌuipaca cai catij tapuicunatami yachashun:
-
¿Jesuspaj familiapajca Jerusalenman rinaca sinchichu cashcanga?
-
¿Imamantataj tandanacuicunaman ringapaj esfuerzota rurana cangui?
-
¿Tandanacuicunaman ringapaj esfuerzota rurana cajpipish valishca cashcatachu yuyangui? ¿Imamantataj chashna yuyangui?
Bibliapica Jehová Diosta adorangapaj tandanacuicunaman rina importante cashcatami huillan. Hebreos 10:24, 25-ta liyipai. Qꞌuipaca cai catij tapuitami yachashun:
-
¿Tandanacuicunaman rinataca imamantataj mana saquina cangui?
HUAQUINCUNACA: “Tandanacuicunaman rinataca mana minishtinichu, huasillapi Bibliata estudianaca suficientemi can” nincunami.
-
¿Jehová Dios paipaj sirvijcuna tandanacuchun munashcataca ima versohuantaj o ima ejemplohuantaj ricuchinguiman?
YUYARISHUNCHIJ
Tandanacuicunaman rishpaca Jehová Diosmantami ashtahuan yachangui. Paihuan alli amigomi tucungui. Shujtajcunahuanpishmi Diosta adorangui.
Yuyaringapaj tapuicuna
-
¿Imamantataj Jehová Diosca tandanacuchun animan?
-
¿Testigo de Jehovacunapaj tandanacuicunaman rishpaca imatataj yachangui?
-
¿Tandanacuicunaman rina cambaj causaita ayudashcata cringuichu?
CAICUNATAPISH RICUI
¿Tandanacuicunaman rinata manchanguichu? Shuj runa manchashpapish tandanacuiman rinata mana saquishcata ricui.
Shuj joven tandanacuiman rinata imamanta munashcata, tandanacuiman rinata mana saquishcata ricui.
Shujtajcuna tandanacuicunaman rishpa ima shina sintirishcata yachai.
Shuj pandilleroca testigo de Jehovacunapaj tandanacuiman rishpa ima shina paipaj causaita cambiashcata yachai.
“Maiman rishpapish pistolata apashpami rij carcani” (Huillaj, 1 de julio de 2014)
Puede que también le interese
GENTECUNA RURASHCA TAPUICUNA
¿Testigo de Jehovacunaca ima shinataj Bibliamanta yachachincuna?
Testigo de Jehovacunahuan Bibliamanta gratis estudiacushpaca can charishca Bibliatami utilizai tucungui. Cambaj familiata o cambaj amigocunatapish canta compañachun invitai tucungui.
