YACHAI 15
¿Jesusca pitaj can?
Jesusca tucuicunamanta yalli rijsishcami can. Pero achca gentecunaca paipaj shutita yachashpapish pi cashcataca mana yachancunachu. Chaimantami Jesusmantaca chꞌican chꞌican yuyaicunata charincuna. ¿Bibliapica Jesusmantaca imatataj yachachin?
1. ¿Jesusca pitaj can?
Jesusca jahua pachapi achca poderta charij angelmi can. Jehová Diosca manaraj tucuita rurashpami Jesustaraj rurarca. Chaimantami Bibliapica paitaca: “Cai pachata manaraj rurajpi ña tiyajmi” nin (Colosenses 1:15). Shinallataj Yaya Diosllami Jesustaca rurarca. Chaimantami Juan 3:16-pica: ‘Diospaj shujlla Churimi can’ nin. Jesusca paipaj Yayataca tucuita rurashpami ayudarca (Proverbios 8:30-ta liyipai). Paica Jehová Dioshuanmi alli apanacun. Jesusca Diospaj huillashcacunata, mandashcacunata huillaj cashcamantami ‘Taita Diospaj Rimai’ can (Juan 1:14).
2. ¿Jesusca imamantataj cai Allpaman shamurca?
2.000 huatacuna huashamanca Jehová Diosca paipaj espíritu santohuanmi Jesuspaj causaita virgen Mariapaj huijsapi churarca. Chashnami Jesusca shuj llullu huahua shina huacharirca (Lucas 1:34, 35-ta liyipai). Paica Mesías o Cristo cashcata ricuchingapaj, ñucanchijta quishpichingapajmi shamurca. a Bibliapica Jesús shamuna cashcata, pai imalla rurana cashcatami huillarca. Chai huillashcacunaca tucuimi pajtarirca. Chaimantami gentecunaca: “Canca causaj Diospaj Churi, Cristomari cangui” nishpa rijsircacuna (Mateo 16:16).
3. ¿Cunanca Jesusca maipitaj can?
Jesús huañushca qꞌuipaca jahua pachamanmi tigrarca. Jehová Diosca shuj espíritu shina paita causachishpaca ‘tucui ima tiyajcunapaj jahuapimi jatunyachirca’ (Filipenses 2:9). Cunanca Jesusca podertami charin. Pero Diosllami paita yalli poderta charin.
ASHTAHUAN YACHAI
Cunanca Jesusmanta ashtahuan yachashun. Paimanta yachanaca imamanta valishca cashcatapishmi intindishun.
4. Jesusca Dios laya mana tucui poderta charinchu
Bibliapica Jesús jahua pachapi poderta charishpapish paipaj Yayatami cazun ninmi. ¿Imamantataj chaita ninchij? VIDEOTA ricui. Cai videopica Jesusca Jehová Dioshuan mana igual cashcatami intindichin.
Catij versocunapica Yaya Dioshuan, Jesushuan mana igual cashcatami intindichin. Versocunata liyishca qꞌuipaca cai catij tapuicunatami yachashun:
Lucas 1:30-32-ta liyipai.
-
¿Ángel nishca shinaca Jesusca ‘Jatun Diospajca’ imataj can?
Mateo 3:16, 17-ta liyipai.
-
¿Jesús bautizaricujpica jahua pachamantaca imataj uyarirca?
-
¿Jahua pachamanta rimajca pitaj carca?
Juan 14:28-ta liyipai.
-
¿Pitaj ashtahuan autoridadta charin shuj yaya o shuj churi?
-
¿Jesusca Jehová Diosta ñuca Yaya nishpaca imatataj ricuchirca?
Juan 12:49-ta liyipai.
-
¿Jesusca paipaj Yayahuan shujlla persona cashcatachu yuyangui? ¿Imamantataj chashna yuyangui?
5. Jesusca Mesiasmi carca
Mesías pi cashcata gentecuna rijsichunca Bibliapimi huillarca. Yaya Diosca paitami gentecunata quishpichichun agllarca. VIDEOTA ricui. Bibliapi Mesiasmanta huillashcacunaca Jesuspi ima shina pajtarishcata ricui.
Bibliapi Jesusmanta imata huillashcata liyi. Qꞌuipaca cai catij tapuicunatami yachashun:
¿Mesiasca maipitaj huacharina carca? b Miqueas 5:2-ta liyipai.
-
¿Miqueas 5:2 huillashcaca Jesús huacharijpi pajtarircachu? (Mateo 2:1).
¿Mesiasca ima shinataj huañuna carca? Salmo 34:20 y Zacarías 12:10-ta liyipai.
-
¿Bibliapi Jesusmanta huillashcacunaca pajtarircachu? (Juan 19:33-37).
-
¿Jesusca huañushca qꞌuipa paipaj cuerpohuan ima ruranata agllai tucurcachu?
-
Caita yachashpaca ¿Jesusca Dios agllashca cashcata cringuichu? ¿Imamantataj?
6. Jesusmanta yachanaca achcatami ayudan
Jesusmanta, pai imata ruragrishcatapish yachanaca valishcami can. Juan 14:6-ta liyipai; Juan 17:3-ta liyipai, NWT. Qꞌuipaca cai catij tapuitami yachashun:
-
¿Jesusta rijsinaca imamantataj minishtirishca can?
Jesusmantami Diospaj alli amigo cai tucunchij. Paica Diosmantami mana llullata yachachirca. Paimantapish huiñai causaitami chari tucunchij.
HUAQUINCUNACA: “Testigo de Jehovacunaca Jesuspi mana crincunachu” nincunami.
-
¿Canca imatataj yuyangui?
YUYARISHUNCHIJ
Jesusca achca poderta charij ángel, Diospaj Churi, Mesiasmi can.
Yuyaringapaj tapuicuna
-
¿Imamantataj Jesusca ‘cai pachata manaraj rurajpi ña tiyaj’ can?
-
¿Jesús cai Allpaman manaraj shamushpaca imatataj ruraj carca?
-
¿Jesús Mesías cashcataca ima shinataj yachanchij?
CAICUNATAPISH RICUI
Jesús Mesías cashcata, pai imata ruragrishcatapish ashtahuan yachai.
“¿Bibliapica Jesusca Mesías cashcatachu ricuchin?” (jw.org paginapi ricui)
Bibliapica Diosca Jesuspaj Yayami can ninmi. ¿Diosca runacuna laya huahuacunata charishcatachu nisha nin?
“¿Jesusca imamantataj Diospaj Churi can?” (jw.org paginapi ricui)
Yayapish, Churipish, espíritu santopish mana shujlla cashcata Bibliapi ricui.
Shuj huarmi Bibliapi Jesusmanta yachashpa ima shina paipaj causaita cambiashcata liyi.
“Shuj huarmica paipaj crishcacunata imamanta saquishcatami parlan” (Rijchari, mayo de 2013)
Caitapish yachai
GENTECUNA RURASHCA TAPUICUNA
¿Testigo de Jehovacunaca ima shinataj Bibliamanta yachachincuna?
Testigo de Jehovacunahuan Bibliamanta gratis estudiacushpaca can charishca Bibliatami utilizai tucungui. Cambaj familiata o cambaj amigocunatapish canta compañachun invitai tucungui.
