YACHAI 32
Diospaj Gobiernoca ñami mandacun
Diospaj Gobiernoca 1914 huatamantami ña jahua pachapi mandai callarirca. Chai huatamantami cai Allpapi tiyaj gobiernocunapajca tucuri punllacuna callarirca. ¿Ima shinataj chaita yachanchij? Catij parrafocunapica caimanta Biblia ima nishcata, 1914 huatamanta gentecuna ima shina comportarishcatami ricushun.
1. ¿Bibliaca imatataj huillarca?
Bibliapi Daniel librota liyishpaca Diospaj Gobierno ña mandai callarishcatami yachanchij. Chaipica Diospaj Gobierno mandai callarichunca ‘canchis huatacunatami’ pasana can ninmi (Daniel 4:16, 17). Achca huatacuna qꞌuipaca canchis huatacunamanta parlashpaca Jesusca: ‘Shujtaj llajtamanta gentecunapaj agllashca tiempomi’ nircami. Shinallataj chai tiempo manaraj tucurishcatami nirca (Lucas 21:24, NWT). Cai canchis huatacuna 1914 huatapi tucurishcatami ricushun.
2. ¿1914 huatamantaca imataj ashtahuan tiyai callarishca? ¿Gentecunapish ima shinataj can?
Jesusta catijcunaca Jesustaca: “¿Can tigramuna punllacunatapish, cai pachapaj ruraicuna tucurinatapish ima señalta ricushpataj yachashunyari?” nishpami tapurcacuna (Mateo 24:3, NWT). Chaimi Jesusca guerracuna, yaricaicuna, terremotocunami tiyanga nirca. Tucui caicunaca pai mandai callarishca qꞌuipami tiyana carca (Mateo 24:7-ta liyipai). Shinallataj Bibliapica ‘tucuri punllacunapi’ gentecuna ima shina cana cashcatami huillarca. Chai laya gentecuna tiyashcamantami ‘llaqui punllacuna’ tiyan (2 Timoteo 3:1-5). 1914 huatamantami cashna laya gentecunaca ashtahuan mirashca.
3. ¿Diospaj Gobierno mandai callarishcamantaca imamantataj ashtahuan llaquicuna tiyan?
Jesús Diospaj Gobiernopi mandai callarishca qꞌuipaca jahua pachapimi shuj jatun macanacui tiyarca. Jesusca Diablohuan, paipaj demoniocunahuanmi macanacurca. Chaipica Jesusca Diablotami misharca. Bibliapica: ‘Diablotami tucui paipaj millai angelcunandijta allpaman shitarca’ ninmi (Apocalipsis 12:9, 10, 12). Diabloca paita ñalla tucuchina cashcata yachashcamantami yallitaj pꞌiñarishca can. Chaimantami cai Allpapica llaquicuna, nanaicuna tiyan. Pero Diospaj Gobiernoca ñallami tucui llaquicunata tucuchinga.
ASHTAHUAN YACHAI
Diospaj Gobierno 1914 huatapi ña mandai callarishcata, chaita yachana ima shina ñucanchijta ayudashcatami ricushun.
4. Bibliapica Diospaj Gobierno 1914-pi mandai callarishcatami ricuchin
Ñaupa Babilonia llajtata mandaj Nabucodonosormanmi Yaya Diosca shamuj punllacunapi ima tucuna cashcata muscuchirca. Chai muscuimanta Daniel ima nishcaca puntapica Nabucodonosorpaj gobiernopimi pajtarirca. Qꞌuipapish Diospaj Gobiernopimi pajtarina carca (Daniel 4:17-ta liyipai). a
Daniel 4:20-26-ta liyipai. Qꞌuipaca cai catij tapuicunata cutichingapaj página 133-ta ricui:
-
A) ¿Nabucodonosorca paipaj muscuipica imatataj ricurca? (Daniel 4:20 y 21-ta ricui).
-
B) ¿Nabucodonosor muscushca yurahuanca imataj tucurca? (Daniel 4:23-ta ricui).
-
C) ¿“Canchis huatacuna” tucurishca qꞌuipaca imataj tucuna carca? (Daniel 4:26-ta ricui).
Nabucodonosor muscushca yuraca Diospaj Gobiernotapishmi ricuchin
Daniel 4:20 al 36-pica CAITAMI HUILLAN
Mandacui punllacunapi
A) Shuj jatun yura
Mandana punllacunami tucurirca
B) “Yurata pꞌitishpa, canchis huatacama cashna cachun saquichij”
Cutinmi mandai callarirca
C) ‘Can mandacushcataca canllatajmi japingui’
Punta pajtarishca:
-
D) ¿Chai yuraca pitataj ricuchin? (Daniel 4:22-ta ricui).
-
E) ¿Ima horastaj mandanataca saquirca? (Daniel 4:29-33-ta liyipai).
-
F) ¿“Canchis huatacuna” tucurijpica mandaj Nabucodonosorhuanca imataj tucurca? (Daniel 4:34-36-ta liyipai).
PUNTA PAJTARISHCA
Mandacui punllacunapi
D) Babilonia llajtata mandaj Nabucodonosor
Mandana punllacunami tucurirca
E) 606 J.m.h. b huata qꞌuipami Nabucodonosorca yuyai illaj saquirishpa canchis huatacunata mandanata saquirca
Cutinmi mandai callarirca
F) Nabucodonosorca cutin yuyaita japishpami mandai callarirca
Qꞌuipa pajtarishca:
-
G) ¿Yuraca picunatataj ricuchin? (1 Crónicas 29:23-ta liyipai).
-
H) ¿Ima horastaj mandanataca saquircacuna? ¿Jesús cai Allpapi cajpi chai mandajcuna cai Allpapi mana mandacushcataca ima shinataj yachanchij? (Lucas 21:24-ta liyipai).
-
I) ¿Dios agllashca Gobiernoca maipitaj, ima horastaj mandai callarirca?
QꞌUIPA PAJTARISHCA
Mandacui punllacunapi
G) Israel llajtata mandajcunaca Diospaj Gobiernotami ricuchirca
Mandana punllacunami tucurirca
H) 607 J.m.h. huatapimi Jerusalenca tucuchishca carca. Chaimantami 2.520 huatacunataca israelitacunaca mana mandajcunata charirca
Cutinmi mandai callarirca
I) 1914 huatapimi Jesusca jahua pachapi mandai callarirca
¿Canchis huatacunaca mashna tiempotataj ricuchin?
Daniel parlashca canchis huatacunaca 2.520 huatacunatami ricuchin. ¿Imamantataj chashna ninchij? Bibliapica huaquin versocunaca shujtaj versocunata alli intindingapajmi ayudan. Por ejemplo, Apocalipsis libropica quimsa huata chaupica 1.260 punllacunami can ninmi (Apocalipsis 12:6, 14). Canchis huatacuna mashna cashcata yachangapajca 1.260 punllacunatami ishqui cutin sumana canchij. Chashnami canchis huatacunaca 2.520 punllacuna cashcata intindinchij. Bibliapica huaquinpi shuj punllataca shuj huatami can ninmi (Ezequiel 4:6).
5. 1914 huatamantami ashtahuan llaquicunaca tiyai callarirca
Jesús pai mandai callarijpica cai mundo ima laya cana cashcatami huillarca. Lucas 21:9-11-ta liyipai. Qꞌuipaca cai catij tapuitami yachashun:
-
Lucas 21:9-11-pi nishca shinaca ¿maijan pajtaricushcatataj ricushcangui o uyashcangui?
Cai Allpapi tiyaj gobiernocunapaj tucuri punllacuna ima laya cana cashcatami apóstol Pabloca huillarca. 2 Timoteo 3:1-5-ta liyipai. Qꞌuipaca cai catij tapuitami yachashun:
-
Cai versocunapi parlashca gentecunamantaca, ¿maijantataj ricushcangui?
6. Diospaj Gobierno ña mandacushcata yachashcamantami shujtajcunaman huillana canchij
Mateo 24:3, 14-ta liyipai. Qꞌuipaca cai catij tapuicunatami yachashun:
-
¿Diospaj Gobierno ña mandacushcataca ima shinataj yachanchij?
-
Alli huillaicunata huillangapajca, ¿imatataj rurai tucungui?
Diospaj Gobiernoca jahua pachapica ñami mandacun. Cai Allpatapish ñallami mandanga. Hebreos 10:24, 25-ta liyipai, NWT. Qꞌuipaca cai catij tapuitami yachashun:
-
¿‘Diospaj punlla cꞌuchuyamucushcata’ yachashpaca imatataj rurana canchij?
Shujtajcuna quishpirichun imata rurana cashcata yachashpaca, ¿imatataj ruranguiman?
HUAQUINCUNACA: “¿Imamantataj testigo de Jehovacunaca 1914 huatamanta yachachincuna?” nishpami tapuncuna.
-
¿Quiquinca imatataj ninguiman?
YUYARISHUNCHIJ
Bibliapi huillashcacunata yachashpa, cai Allpapi ashtahuan llaquicuna tiyashcata ricushpami Diospaj Gobierno ña mandacushcata yachanchij. Chaimantami Diospaj Gobiernomanta huillanchij, tandanacuicunamanpish rinchij.
Yuyaringapaj tapuicuna
-
¿Bibliapi parlashca canchis huatacuna tucurishca qꞌuipaca imataj tucurca?
-
¿Jesús 1914 huatapi mandai callarishcataca imamantataj cringui?
-
¿Diospaj Gobierno ña mandacushcataca ima shinataj ricuchinguiman?
CAICUNATAPISH RICUI
Huaquin yachaj gentecunaca 1914 huatamanta gentecunapaj yuyaicuna, munaicuna ima shina cambiarishcatami parlancuna. Paicuna ima nishcata liyi.
“Gentecunapaj yuyaica tucuimi cambiarirca” (Rijchari, abril de 2007)
Mateo 24:14-pi ima nishcata yachashpa shuj runapaj causai ima shina cambiashcata ricui.
“Beisbolta pugllanatami achcata munarcani” (Huillaj, Núm. 3 2017)
¿Daniel capítulo 4-pi ima nishcata liyishpaca Diospaj Gobiernomanta parlacushcataca ima shinataj yachanchij?
“¿Diospaj Gobiernoca ima horastaj mandai callarirca? (Parte 1)” (Huillaj, 1 de octubre de 2014)
¿Daniel capítulo 4-pi parlashca “canchis huatacuna” 1914 huatapi tucurishcataca ima shinataj yachanchij?
“¿Diospaj Gobiernoca ima horastaj mandai callarirca? (Parte 2)” (Huillaj, 1 de noviembre de 2014)
a “Caicunatapish ricui” nishca partepi tiyaj ishqui último temacunata liyi.
b J.m.h. letracunataca Jesús manaraj huacharishcata ningapajmi churashcanchij. Cutin J.h.q. letracunataca Jesús huacharishca qꞌuipa ningapajmi churashcanchij.
Caitapish yachai
GENTECUNA RURASHCA TAPUICUNA
¿Testigo de Jehovacunaca ima shinataj Bibliamanta yachachincuna?
Testigo de Jehovacunahuan Bibliamanta gratis estudiacushpaca can charishca Bibliatami utilizai tucungui. Cambaj familiata o cambaj amigocunatapish canta compañachun invitai tucungui.
