YACHAI 37
¿Trabajomantapish cullquimantapish Bibliaca imatataj nin?
Huaquinpica cullquimanta, trabajomantachari dimastij sustarishcangui. Chaimantami Jehová Diosta adoranapish, ñucanchij minishtishcacunata charingapaj trabajanapish mana fácil can. Pero chaicunata pajtachingapajca Bibliapaj consejocunami ayudan.
1. ¿Trabajomantaca Bibliapica imatataj nin?
Yaya Diosca ñucanchij trabajohuanmi cushicuchun munan. Bibliapica: ‘Runapajca paipaj sinchi trabajomanta cushicunamari alli can’ ninmi (Eclesiastés 2:24). Jehová Diosca sinchitami trabajan. Ñucanchijpish sinchita trabajashpaca Diostami cushichishun. Ñucanchijpish cushillami sintirishun.
Trabajanaca importantemi can. Shinapish Jehová Diosta adoranami ashtahuan importante can (Juan 6:27). Diosta sirvinata punta lugarpi churajpica paica ñucanchij ima minishtishcatami cunga.
2. ¿Bibliaca cullquimantaca imatataj nin?
Bibliapica cullquica ‘escudo shinami ñucanchij causaitaca huaquichin’ ninmi. Shinapish cullquica mana cushi causaita cui tucunchu (Eclesiastés 7:12). Bibliapica cullquita ama cꞌuyangapajmi cai consejota cun: “Imata charishcacunallahuan cushi caichij” nin (Hebreos 13:5-ta liyipai). Charishcallahuan cushilla causashpaca mana ashtahuan charinapi yuyashunchu. Yangamantapish mana dibi tucushunchu (Proverbios 22:7). Shinallataj apostashpa pugllaicunapi, cullquita jahualla charina trampacunapica mana urmashunchu.
3. ¿Ñucanchij cullquihuanca ima shinataj shujtajcunata ayudai tucunchij?
Jehová Diosca shungumanta cuj Diosmi can. Pai shina cangapajca ñucanchij imalla charishcatami ‘mana mitsashpa cunalla’ canchij (1 Timoteo 6:18). Ñucanchijca congregacionpi tiyaj gastocunata pagangapaj, huauqui panicunata, shujtaj gentecunata ayudangapajmi cullquita cui tucunchij. Jehová Diosca mashna cullquita cushcataca mana ricunchu. Ashtahuanpish imamanta cushcatami ricun. Mana mitsashpa shungumanta cushpaca cushillami causashun. Jehová Diostapishmi cushichishun (Hechos 20:35-ta liyipai).
ASHTAHUAN YACHAI
Imamanta trabajashpalla mana causana cashcata, imalla charishcacunahuan cushilla cana cashcatami ricushun.
4. Alli trabajashpa Jehová Diosta jatunyachi
Jehová Dioshuan alli apanacushpaca trabajotaca mana punta lugarpi churashunchu. VIDEOTA ricui. Qꞌuipaca cai catij tapuicunatami yachashun:
-
¿Jasonca paipaj trabajopica ima layataj comportarij carca?
-
¿Trabajota mana punta lugarpi churangapajca imatataj rurarca?
Colosenses 3:23, 24-ta liyipai, NWT. Qꞌuipaca cai catij tapuitami yachashun:
-
¿Imamantataj “Jehová Diospaj ruracushca shina” trabajana canchij?
Trabajanaca importantemi can. Shinapish trabajanamanta Jehová Diosta adoranataca mana saquinachu canchij.
5. Charishcacunallahuan cushilla causashun
Achca gentecunaca cullquita charinallapimi yuyancuna. Pero Bibliapica mana chaita yachachinchu. 1 Timoteo 6:6-8-ta liyipai. Qꞌuipaca cai catij tapuitami yachashun:
-
¿Achcata charinamantaca Bibliaca imatataj nin?
Ashallata charishpapish cushillami causai tucunchij. VIDEOTA ricui. Qꞌuipaca cai catij tapuitami yachashun:
-
¿Cai familiacunaca ashallata charishpapish imamantataj cushilla causan?
Achcata charishpapish ashtahuan charina munaita charinaca jatun llaquimanmi apan. Caita intindichingapajmi Jesusca shuj chꞌimbapuraita churarca. Lucas 12:15-21-ta liyipai. Qꞌuipaca cai catij tapuitami yachashun:
-
¿Cai chꞌimbapuraihuanca Jesusca imatataj yachachirca? (Lucas 12:15-ta ricui).
Proverbios 10:22-ta liyishpa 1 Timoteo 6:10-huan comparai. Qꞌuipaca cai catij tapuicunatami yachashun:
-
¿Imataj ashtahuan alli can: Jehová Diospaj amigo cana o achca cullquita charina? ¿Imamantataj chashna ningui?
-
¿Cullquillapi yuyashpaca ima llaquicunapitaj urmashun?
6. Ñucanchij minishtishcacunataca Jehová Diosmi cunga
Trabajota mana charishpa, ashalla cullquita charishpaca Jehová Diospi mashna feta charishcatami ricuchi tucunchij. Chai llaquicunata ahuantangapajca imata rurana cashcata ricushun. VIDEOTA ricui. Qꞌuipaca cai catij tapuicunatami yachashun.
-
¿Videopi ricurij huauquica ima llaquicunatataj charirca?
-
¿Ñaupajman catingapajca imatataj rurarca?
Mateo 6:25-34-ta liyipai. Qꞌuipaca cai catij tapuitami yachashun:
-
¿Jehová Diosta sirvinata punta lugarpi churajpica paica imatataj cunga?
HUAQUINCUNACA: “Familiata mantiningapajmi achcata trabajana cani. Chaimantami tucui semanacunaca tandanacuicunamanca mana ri tucuni” nincunami.
-
¿Jehová Diosta sirvinata punta lugarpi churangapajca maijan versocunataj ayudanga?
YUYARISHUNCHIJ
Trabajotapish, cullquitapishmi minishtinchij. Pero Jehová Diosta sirvinataca manataj saquinachu canchij.
Yuyaringapaj tapuicuna
-
¿Trabajollapi ama yuyangapajca imataj ayudanga?
-
¿Charishcacunallahuan cushilla causashpaca ima bendicioncunatataj charishun?
-
Jehová Diosca paita sirvijcunamanca ima minishtishcatami cusha nin. ¿Cai shimicunapi confiashcataca ima shinataj ricuchinguiman?
CAICUNATAPISH RICUI
¿Cullqui mana alli cashcatachu Bibliaca yachachin?
“¿Cullquichu tucui laya mana alli ruraicunamantaca culpata charin?” (jw.org paginapi ricui)
Diosta cushichingapaj ima laya munaihuan cuna cashcata yachai.
“¿Shujtajcunaman cunamantaca Bibliaca imatataj yachachin?” (jw.org paginapi ricui)
¿Cullquimanta pugllanaca allichu can?
“¿Bibliaca imatataj yachachin? Cullquimanta pugllaicuna” (Rijchari, marzo de 2015)
Cullquimanta pugllaj, shuhuashpa causaj runa imamanta cambiashcata liyi.
“Caballocunapaj carreracunata achcatami munarcani” (Huillaj, 1 de noviembre de 2011)
Caitapish yachai
GENTECUNA RURASHCA TAPUICUNA
¿Testigo de Jehovacunaca ima shinataj Bibliamanta yachachincuna?
Testigo de Jehovacunahuan Bibliamanta gratis estudiacushpaca can charishca Bibliatami utilizai tucungui. Cambaj familiata o cambaj amigocunatapish canta compañachun invitai tucungui.
