YACHAI 44
¿Diosca tucui fiestacunatachu chasquin?
Jehová Diosca cushilla causachunmi munan. Chaimantami huaquinpica fiestacunata rurachun munan. Shinapish ¿Jehová Diosca tucui fiestacunatachu chasquin? ¿Paita cꞌuyashcata, pai ima shina sintirishcata ñucanchijpaj importante cashcataca ima shinataj ricuchinchij?
1. ¿Jehová Diosca imamantataj mana tucui fiestacunata chasquin?
Huaquin fiestacunaca panda religioncunahuanmi chagrurishca can. Shinallataj cai fiestacunaca brujeriahuan, almaca mana huañunchu nishcahuan, gentecunapaj crishcacunahuan, suertehuan chagrurishcami can (Isaías 65:11). Chaimantami Jehová Diosca paita sirvijcunataca: ‘Chaicunamanta chꞌicanyarichij. Ima mapata ama japirichijchu’ nishpa advirtin (2 Corintios 6:17). a
2. ¿Gentecunata jatunyachingapaj fiestacunamantaca Jehová Diosca imatataj yuyan?
Jehová Diosca: ‘Runacunallapi shunguta churajcuna shinaca ama caichijchu’ nishpami advirtin. Chaita ruranaca shuj trampami can (Jeremías 17:5-ta liyipai). Huaquin fiestacunaca mandajcunata, militarcunata, banderata, escudota, llajtacunapaj importante fechacunata yuyaringapajmi can (1 Juan 5:21). Shinallataj huaquin fiestacunaca politicocunata o shuj organizacionta apoyangapajmi can. Cai fiestacunaca Jehová Diospaj contrami can. ¿Caicunata apoyajpica Diosca ima shinashi sintiringa?
3. ¿Imamantataj huaquin fiestacunaca mana alli can?
Bibliapica: ‘Yallitaj machana, maipishcachun fiestacunata rurana, ubyangapajlla fiestacunata ruranaca mana allichu can’ ninmi (1 Pedro 4:3, NWT). Huaquin fiestacunapica gentecunaca yuyaita chingachishpami pinganayai ruraicunata rurashpa cushicuncuna. Ñucanchijca Jehová Diospaj amigo cashpa catingapajca tucui chai mapa ruraicunamantami caruyana canchij.
ASHTAHUAN YACHAI
Jehová Diosta cushichingapajca pai munashca fiestacunamanmi rina canchij. Chaipajca ima fiestaman rina cashcata o mana rina cashcata ricushun.
4. Jehovata pingaipi churaj fiestacunamanca mana rinachu canchij
Efesios 5:10-ta liyipai, NWT. Qꞌuipaca cai catij tapuicunatami yachashun:
-
¿Shuj fiestata ruragricushpaca imapitaj yuyana canchij?
-
¿Can causashca llajtapica ima fiestacunallatataj ruran?
-
¿Chai fiestacunataca Jehová Diosca ima shinataj ricun?
¿Cumpleañoscunamantaca Jehová Diosca imatataj yuyan? Diosta sirvijcuna cumpleañoscunata rurashcataca Bibliapica mana ninchu. Shinapish Bibliapica ishqui cumpleañoscunamantami parlan. Chai cumpleañoscunataca Diosta mana sirvijcunami rurarca. Génesis 40:20-22 y Mateo 14:6-10-ta liyipai. Qꞌuipaca cai catij tapuicunatami yachashun:
-
¿Cai fiestacunapica imataj tucurca?
-
Cai versocunata liyishca qꞌuipaca, ¿Jehová Diosca cumpleañoscunamantaca imatataj yuyan?
“Bibliapi mana yachachishca fiestaman rijpi o ñuca cumpleañosta rurajpica, ¿Jehová Diosca ima shinashi sintiringa?” nishpachari tapurishcangui. Éxodo 32:1-8-ta liyipai. VIDEOTA ricui. Qꞌuipaca cai catij tapuicunatami yachashun:
-
¿Maijan fiestacunata Dios chasquishcataca imamantataj yachana canchij?
-
¿Maijan fiestacunata Dios chasquishcataca ima shinataj yachai tucunchij?
¿Shuj fiestata Dios chasquishcataca ima shinataj yachanchij?
-
¿Bibliapi mana yachachishca fiestachu can? Chaita yachangapajca imamanta tiyai callarishcata yachai.
-
¿Chai fiestacunaca gentecunata, organizacioncunata, banderata, escudota jatunyachingapajchu can? Ñucanchijca Jehová Diosllatami jatunyachinchij. Shinallataj pailla tucui llaquicunata tucuchina cashcatami crinchij.
-
¿Bibliapi mana yachachishcacunatachu ruran? Mapa ruraicunamantami caruyana canchij.
5. Shujtajcuna cambaj crishcacunata respetachun ayudai
Jehová mana munashca fiestacunapi participachun nijpica huaquinpica mana participanaca sinchimi cai tucun. Pero can imamanta mana participashcatami pacienciahuan, respetohuan parlana cangui. Caita ima shina ruranata yachangapajca VIDEOTA ricui.
Mateo 7:12-ta liyipai. Qꞌuipaca cai catij tapuicunatami yachashun:
-
Cai versopi nishca shinaca ¿ñucanchij familiataca cai fiestataca mana ruranachu cangui nishpachu nina canchij?
-
¿Cambaj familiahuan huaquin fiestacunata mana rurashpapish paicunata cꞌuyashcataca ima shinataj ricuchingui?
6. Jehová Diosca cushilla cachunmi munan
Diosca ñucanchij familiahuan, ñucanchij amigocunahuanmi cushilla cachun munan. Eclesiastés 8:15-ta liyipai. Qꞌuipaca cai catij tapuitami yachashun:
-
Cai versopi nishca shinaca ¿Jehová Dios cushilla causachun munashcataca ima shinataj yachanchij?
Diosta sirvijcuna tandalla, cushilla pasachunmi Jehová Diosca munan. Diosta sirvijcuna cushilla cashcataca jatun tandanacuicunapimi ricunchij. Caita yachangapajca VIDEOTA ricui.
Gálatas 6:10-ta liyipai. Qꞌuipaca cai catij tapuicunatami yachashun:
-
¿Shujtajcunata ‘allita rurangapajca’ gentecuna rurashca fiestacunata ruranachu minishtirin?
-
¿Ima laya regalotataj cusha ninguiman: obligacionmanta cushca regalocunata o shungumanta cushca regalocunata?
-
Huaquin testigo de Jehovacunaca paipaj huahuacunamanca fiestacunatami rurancuna, regalocunatapishmi cuncuna. Can huahuacunata charishpaca ¿imatataj rurai tucungui?
HUAQUINCUNACA: “Fiestacuna maimanta shamushcaca mana importantechu can. Familiahuan, amigocunahuan pasanami importante can” nincunami.
-
¿Quiquinca imatataj ninguiman?
YUYARISHUNCHIJ
Jehová Diosca familiahuan, amigocunahuan cushilla cachunmi munan. Pero pai mana munashca fiestacunapi participachunca mana munanchu.
Yuyaringapaj tapuicuna
-
¿Jehová Dios shuj fiestata chasquishcata o mana chasquishcata yachangapajca imatataj tapurina canchij?
-
Huaquin fiestacunata imamanta mana rurashcataca ñucanchij familiaman, ñucanchij amigocunamanca, ¿ima shinataj intindichi tucunchij?
-
¿Jehová Dios ñucanchij divirtirichun, cushilla cachun munashcataca ima shinataj yachanchij?
CAICUNATAPISH RICUI
Diosta sirvijcuna imamanta huaquin fiestacunata mana rurashcata yachai.
“¿Testigo de Jehovacunaca imamantataj huaquin fiestacunataca mana ruran?” (jw.org paginapi ricui)
Cumpleañoscunata imamanta Jehová Dios mana chasquishcata yachai.
“¿Testigo de Jehovacunaca imamantataj mana cumpleañoscunata ruran?” (jw.org paginapi ricui)
Jehová Dios mana munashca fiestacunapi Diosta cꞌuyaj huahuacuna paita cushichingapaj imata rurashcata ricui.
Achca testigo de Jehovacunaca Navidad fiestataca mana rurancunachu. ¿Chashna decidishcamantaca cushillachu cancuna?
“Navidad fiestata mana rurashcamantaca mana llaquirincunachu” (Huillaj, 1 de diciembre de 2012)
Puede que también le interese
GENTECUNA RURASHCA TAPUICUNA
¿Testigo de Jehovacunaca ima shinataj Bibliamanta yachachincuna?
Testigo de Jehovacunahuan Bibliamanta gratis estudiacushpaca can charishca Bibliatami utilizai tucungui. Cambaj familiata o cambaj amigocunatapish canta compañachun invitai tucungui.
