Jesusta alli catijcunaca Jehová Diosta adoranamanta imapish caruyachichunca manataj saquinachu canchij. Canpish chaita ruragrishcataca segurosmi canchij. Jehová Diosca paimanta mana caruyashcamantami cantaca achcata valoran (1 Crónicas 28:9-ta liyipai). ¿Huaquinpica imamantataj Diosta sirvinataca saqui tucungui? ¿Diosta sirvinata ama saquingapajca imatataj rurana cangui?

1. ¿Jehová Diosta sirvinata saquichunca gentecunaca imatataj rurai tucun?

Maijancunaca Jehová Diosta sirvinata saquichunmi munancuna. Paicunaca Jehová Diosmanta caruyashpami ñucanchij feta chiriyachingapaj Diospaj organizacionmanta llullacunata nin. Cai gentecunatami apostatacuna nishpa rijsinchij. Religionta pushajcunapishmi mana sinchi cajcunata caruyachisha nishpa ñucanchijmantaca llullacunata nincuna. Diospaj pueblopaj contracunahuan parlana, paicunapaj librocunata liyina, Internetpi paicuna imata nishcata liyina, paicunapaj videocunata ricunaca peligrosomi can. Jehová Diosta sirvinamanta caruyachisha nij gentecunamanta parlashpaca Jesusca: “Chaicunataca saquichijlla. Paicunaca mana ricujcuna. Mana ricujcunallatataj pushajcunami. Mana ricujllataj caishuj mana ricujta pushajca, ishquindijtajmi jutcupi urmangacuna” nircami (Mateo 15:14).

¿Ñucanchij amigocuna testigo de Jehová canata saquijpica? Chai tucujpica llaquillami sintirinchij. Huaquinpica Diosta sirvinata saquijca Jehová Diosta sirvinata o ñucata apoyanatami agllana cangui ningachari. Pero ñucanchijca tucuimanta yallica Jehová Diosmanta manataj caruyanatami decidina canchij (Mateo 10:37). Ñucanchijca Diosta sirvinata saquijcunahuanca mana tandanacunchijchu. Chashnami Jehová mandashcata cazunchij (1 Corintios 5:11-ta liyipai).

2. ¿Panda religionhuan mana chagrurinaca huaquinpica imamantataj sinchi can?

Jehová Diosta cꞌuyashcamantaca panda religioncunahuan chagrurinataca mana munanchijchu. Ñucanchij trabajopipish, ima organizacioncunapipish, imata rurashpapish panda religioncunahuanca mana chagrurinachu canchij. Jehová Diosca paipaj pueblotaca: ‘Babilonia jatun pueblomanta llujshichij’ nishpami mandan (Apocalipsis 18:2, 4).

 ASHTAHUAN YACHAI

3. Panda yachachijcunamanta cuidari

¿Jehová Diospaj organizacionmanta mana allicunata nijpica imatataj rurana canchij? Proverbios 14:15-ta liyipai. Qꞌuipaca cai catij tapuitami yachashun:

• ¿Imamantataj tucui ima nishcacunataca mana crina canchij?

2 Juan 10-ta liyipai. Qꞌuipaca cai catij tapuicunatami yachashun:

• ¿Apostatacunahuanca apanacunachu canchij?

• Apostatacunahuan mana parlashpapish, ¿ima shinataj paicuna shina yuyai callari tucunchij?

• Ñucanchijcuna Jehovamanta o paipaj organizacionmanta llullacunata uyajpica, ¿Jehová Diosca ima shinashi sintiringa?

4. Shuj huauqui o shuj pani juchapi urmajpica Diosta sirvishpa cati

Shuj huauqui o shuj pani juchapi urmashcata yachashpaca, ¿imatataj rurana canchij? ¿Jehová Dios israelitacunaman cushca leymantaca imatataj yachanchij? Levítico 5:1-ta liyipai.

Cai versopi nishca shinaca shuj huauqui o shuj pani jatun juchata rurashcata yachaj chayashpaca ancianocunamanmi huillana canchij. Pero manaraj huillashpaca juchata ruraj huauquita o panitaca ancianocunahuan parlachunmi animana canchij. Chaita mana rurajpica Jehová Diosta cꞌuyashcamantami paicuna ima rurashcata ancianocunaman huillana canchij. Caicunata rurashpaca...

• ... ¿ima shinataj Jehová Diosta cꞌuyashcata, paita cazushcatapish ricuchinchij?

• ... ¿ima shinataj juchata rurajta cꞌuyashcata, pai alli cachun munashcata ricuchinchij?

• ... ¿ima shinataj huauqui panicunatapish cꞌuyashcata, paicuna alli cachun munashcata ricuchinchij?

 5. Babilonia jatun pueblomanta caruyai

 YUYARISHUNCHIJ

Diosta sirvinata amataj saquingapajca testigo de Jehová canata saquijcunahuanca mana tandanacunachu canchij. Shinallataj panda religioncunamantami caruyana canchij.

Yuyaringapaj tapuicuna

• ¿Imamantataj apostatacuna ima nishcata mana ricuna, mana liyina, mana uyana canchij?

• ¿Testigo de Jehová canata saquijcunahuanca tandanacushpachu catina canchij?

• Bibliapi mandashca shinaca ¿panda religioncunahuan ama chagruringapajca imatataj rurana canchij?