PARTE 5
Jatun tamyami tiyarca: ¿Picunataj Diosta uyarca?
Noepaj punllacunapi causajcunaca mana allicunallatami rurarca Génesis 6:5
Adán Evahuan huahuacunata charijpimi, Allpapica achca gentecuna tiyarca. Shujtaj angelcunapish Satanás shina mana cazushpami Diospaj contra tucurca.
Huarmicunahuan cazaranata munashpami, jahua pachamanta uriyashpa gentecuna shina tucurca. Shujtaj gentecunata yalli sinchi, millai huahuacunatami charircacuna.
Millai gentecunahuanmi Allpaca jundarca. Bibliapica ninmi: Gentecunaca ‘yallitaj millaita rurashpami causarca’ nishpa. Paicunaca millaita ruranallatami yuyacurca.
Diosta cazushpami Noeca huambuj huasita rurarca Génesis 6:13, 14, 18, 19, 22
Noeca alli runami carca. Jehová Diosca Noeta nircami, millai gentecunataca jatun tamyahuanmi tucuchigrini nishpa.
Shuj huambuj huasita rurachunmi Diosca Noeta mandarca. Chaipimi paipaj familiata, tucui laya animalcunatapish yaicuchina carca.
Jatun tamya shamuna cashcata Noé huillajpica, gentecunaca mana uyarcachu. Huaquincunaca asircami, shujtajcunaca pꞌiñarircami.
Huambuna huasita Noé tucuchishpaca, animalcunatami chaiman yaicuchirca.
