1. ¿Causaita charijcunataca pitaj rurarca?

JEHOVÁ DIOSCA “causaj Diosmari” nishpami profeta Jeremiasca huillarca (Jeremías 10:10). Shinallataj causaita charijcunata rurashcamantami, jahua pachapi cajcunapish: “Canmari tucui ima tiyajtapish rurashcangui. Can munashpa rurashcamantami tucui imapish tiyan” nircacuna (Apocalipsis 4:11). Rey Davidpish Jehová Diosta cantashpaca: “Causaita cuj pugyu yacuca quiquinpimi” nircami (Salmo 36:9). Chaimantami causaica Dios cushca regalo can.

2. ¿Tucuicuna causashpa catichunca ima shinataj Diosca ayudan?

² Shinallataj Jehová Diosca tucuicuna causashpa catichunmi ayudan (Hechos 17:28). Paimi micunata, yacuta, huairata, ñucanchij causacushca Allpatapish cun (Hechos 14:15-17-ta rezai). Chaimantami cushilla causai tucunchij. Shinapish tucui causaipi cushilla causangapajca Dios imata mandashcata yachashpami pajtachina canchij (Isaías 48:17, 18).

3. ¿Abelta Caín huañuchijpica Jehová Diosca imatataj rurarca?

³ Jehová Diosca ñucanchij causaitapish, shujtajcunapaj causaitapish cuidachunmi munan. Yuyarishun: Adán, Evapaj punta churi Cainca paipaj qˈuipa huauqui Abelhuanmi pˈiñarirca. Chaimantami Diosca ñataj juchapi urmanguiman nirca. Shinapish Cainca mana cazushpami  ‘Abelta huañuchirca’ (Génesis 4:3-8). Qˈuipaca Abelta huañuchishcamantami Jehová Diosca Cainta llaquichirca (Génesis 4:9-11).

4. ¿Moisesman cushca leypi yachachishca shinaca, causaitaca ima shinataj ricuna canchij?

⁴ Achca huatacuna qˈuipaca Jehová Diosca, pai munashca shina causachunmi israelitacunaman leycunata curca. Chai leycunata Moisés chasquishcamantami, Moisesman cushca ley nishpa shutichin. Chai leypica: “Ama huañuchingui” nishpami mandan (Deuteronomio 5:17). Chashnami Jehová Diosca paipaj ñaupajpica gentecunapaj causaica valishca cashcata israelitacunaman ricuchirca. Chashnallatajmi ñucanchijpish shujtajcunapaj causai valishca cashcata ricuna canchij.

5. ¿Shullunaca imamantataj mana alli can?

⁵ ¿Manaraj huacharishca huahuacunapaj causaitaca, Jehová Diosca ima shinataj ricun? Moisesman cushca leypica cashnami nin: “Maijan cˈaricuna macanacucushpa chichu huarmita panda macajpi huahua llujshijpica, ni pi mana huañujpica, chai runaca chai huarmipaj cusa mashnata pagachun nishcata pagachun, chai runaca juezcuna mandashcata pagachun. Ashtahuanpish maijanpish huañujpica, chai runapish huañuchishca cachun” (Éxodo 21:22, 23, NM). Leypi nishca shinaca huijsapi caj huahuata huañuchinaca mana allichu carca. Jehová Diospaj ñaupajpica chai huahuapaj causaipish valishcami can (Salmo 127:3-ta rezai). Shina cajpica shullunaca mana allichu can.

6. ¿Imamantataj shujtajcunata mana pˈiñana canchij?

⁶ Shujtajcunapaj causaita cuidangapajca cˈuyaimi minishtirin. Bibliapica cashnami nin: ‘Paipaj huauquita maijanpish pˈiñajca huañuchij shinallatajmi. Maijanpish huañuchijca, huiñai causaita mana charingachu’ (1 Juan 3:15). Huiñai causaita charisha nishpaca shujtajcunata pˈiñana yuyaitami shungumanta llujshichina canchij. Shujtajcunata pˈiñanaca mana allitami rurachin (1 Juan 3:11, 12). Chaimantami caishujhuan chaishujhuan cˈuyanacuna canchij.

7. ¿Ima viciocunahuantaj causaita mana cuidashcata ricuchinchij?

 ⁷ ¿Ñucanchij causaita cuidangapajca imatataj rurana canchij? Ñucanchijca mana huañusha ninchijchu. Shinapish huaquincunaca cai pachapi cushicusha nishpallami tabacota, marihuanata fumancuna, shinallataj yangamanta drogacunata ubyancuna. Chaimantami huaquincunaca ungushca causan, shujtajcunacarin huañushcami. Chai viciocunata charijcunaca causaita mana cuidanchu. Chai viciocunaca Diospaj ñaupajpica mapami can (Romanos 6:19; 12:1; 2 Corintios 7:1-ta rezai). Pai munashca shina Diosta servingapajca chai viciocunata saquinami canchij. Sinchi cajpipish Jehová Diosmi ñucanchijta ayudai tucun. Causaita alli cuidajpica Diosca achcatami cushicun. Causaica Dios cushca sumaj regalomi can.

8. ¿Causaita cuidasha nishpaca imatataj rurana canchij?

⁸ Causaita cuidasha nishpaca mana maipishcachun causanachu canchij. Carrota manejacushpa yallitaj callpana, telefonopi parlana, machashca manejanaca mana allichu can. Llaquichij pugllaicunatapish mana pugllanachu canchij (Salmo 11:5). Shinallataj Jehová cushca Leypica cashnami nin: “Terrasayuj huasita rurashpaca chai muyundijta pircanguichij. Chashna rurashpami maijan chai jahuamanta urmashpa huañujpica, cancunapaj huasi ucupuracunataca mana juchachishca canguichij” ninmi (Deuteronomio 22:8). ¿Chai leypica imatataj yachachin? Por ejemplo, huasipi gradacuna tiyajpica pi ama urmachun, ama chugririchunmi allichishpa charina canchij. Carrota charishpapish allichishpami charina canchij. Huasita, carrota alli allichishpami cambaj causaita, shujtajcunapaj causaitapish cuidangui.

9. ¿Animalcunapaj causaitaca ima shinataj cuidana canchij?

⁹ Animalcunapaj causaitapish cuidachunmi Diosca munan. Animalcunata micungapaj, churanata rurangapaj, shinallataj pitapish ama llaquichichunca huañuchi tucunchijmi (Génesis 3:21; 9:3; Éxodo 21:28). Shinapish animalcunataca mana maipishcachun charinachu, pugllangaraicupish  mana huañuchinachu canchij. Animalcunata alli charishpaca Dios munashca shinami causaita cuidashun (Proverbios 12:10).

10. ¿Causaipish yahuarpish Diospaj ñaupajpi valishca cashcataca ima shinataj yachanchij?

¹⁰ Jehová Diospaj ñaupajpica yahuarca causai shinallataj valishcami can. Abelta Caín huañuchijpica Jehová Diosca: “Cambaj huauquipaj yahuarmi ñucataca allpamanta caparicun” nircami (Génesis 4:10). Yahuarmanta parlashpaca Abelpaj causaimantami Diosca parlacurca. Abelpaj causaimi, imata rurashcata ricuhuayari nicuj shina caparicurca. Abelta huañuchishcamantami Jehová Diosca Cainta llaquichirca. Shinallataj Noepaj punllacunapi yacu juillu manaraj shamujpica gentecunaca frutacunata, chaquishca granocunata, verduracunallatami micuj carca. Shinapish yacu juillu qˈuipaca Jehová Diosca cashnami Noeta, paipaj churicunatapish mandarca: “Causaiyuj caj tucui animalcunaca cancuna micunapajmi”. Ashtahuanpish “causaita cuj yahuarndij aichataca ama micunguichij” nircami (Génesis 1:29; 9:3, 4). Shina cajpica yahuarca causai shinallataj valishcami can.

11. ¿Yahuarmanta parlashpaca Jehová Diosca imatataj israelitacunaman mandarca?

¹¹ Yahuarta mana micushpami yahuarca valishca cashcata ricuchinchij. Noeman yahuarta ama micungui nishca casi 800 huatacuna qˈuipaca, Jehová Diosca cashnami israelitacunaman mandarca: ‘Micuna animalta cashpa, alasyuj micuna animalta cashpapish huañuchishpaca yahuartaca allpahuan tapachichun. Aichayujcunaca yahuarmantami causan. Chaimantami israelcunataca: “Ima aichamantapish yahuartaca amataj micunguichijchu”’ nirca (Levítico 17:13, 14). Dios mandashcacunaca mana cambiarcachu. Paita servijcunaca aichata micunallami carca, shinapish yahuartaca mana micunachu carca. Yahuartaca allpapimi tallina carca. Yahuarta allpapi tallishpaca Jehová Diosman causaita tigrachij shinami carca.

12. ¿Yahuarmanta parlashpaca imatataj cazuna canchij?

 ¹² ¿Jesusta catijcunaca yahuarta micunachu canchij? Jesús huañushca qˈuipaca apostolcunapish, shujtaj pushaj huauquicunapishmi tandanacurcacuna. Chaipica Jesusta catijcuna imata cazuna cashcatami parlanacurcacuna. Caitami paicunaca nirca: ‘Jucha illaj espiritupish yuyachijpi, ñucanchij yuyaipipish chashna rurana alli cajpimi, cancuna yachanallata nishun ninchij: Rurashcalla dioscunaman cushcata ama micunguichij, yahuartapish, sipishpalla huañuchishca aichatapish ama micunguichij, ama huainayanguichij’ nircacunami (Hechos 15:28, 29; 21:25). Shinashpaca yahuarta mana micunachu canchij. Diospaj ñaupajpica yahuarta micunaca, rurashcalla dioscunata mañacuj shina, huainayacuj shinami can.

13. Shuj chˈimbapuraita rurashpa yahuarta mana churachina cashcata ricuchi.

¹³ ¿Yahuarta mana micushpapish venacunapi churachinachu canchij? Mana. Shuj chˈimbapuraita rurashun: Tragota ama ubyangui nishpa doctor mandajpica ¿tragota venacunapi churaringuimanchu? Mana churaringuimanchu. Chashnallataj yahuarta ama micungui nishpa Dios mandashpaca, cuerpopipish ama churachingui nishpami mandan. Shinashpaca ñucanchij cuerpopi yahuarta churachunca mana saquinachu canchij.

14. ¿Yahuarta churachinami cangui nijpica imatataj rurai tucunchij?

¹⁴ Shinapish ¿yallitaj chugririshca cashpa, o ima operacionta rurachina cashpaca imatataj rurai tucungui? Caipi yuyashun: Doctorcunaca yahuarta churachinami cangui, mana churachishpaca huañunguimi ningachari. Diosta servijcunaca mana huañusha ninchijchu. Dios cushca causaita cuidasha nishcamantami yahuar illaj shujtaj tratamientocunata chasqui tucunchij. Cunan punllacunapica chˈican chˈican tratamientocunami tiyan.

15. ¿Diosta cazushpaca ima bendiciontataj chasquishun?

¹⁵ ¿Ashtahuan causasha nishpa yahuarta churachishpaca imataj tucushun? Jesusca cashnami nirca: “Pipish quiquin  causaita quishpichisha nijca, chingaringami. Pipish ñucata catishcamanta quiquin causaita chingachijca huiñai causaitami japinga” nircami (Mateo 16:25). Mana huañusha nishcamanta yahuarta churachishpaca huiñai causaitami chingachishun. Dios mandashcacunaca ñucanchij allipaj cashcatami crina canchij. Ashtahuanpish ñucanchij huañujpica causaita cuj Diosca ñucanchijta causachingami (Juan 5:28, 29; Hebreos 11:6).

16. ¿Dios mandashcata cazushpaca imatataj mana rurana canchij?

¹⁶ Diosta servijcunaca tucui shunguhuanmi Dios mandashcata pajtachinchij. Chaimantami yahuarta mana micunchij, jambiringapajpish yahuarta mana churachinchij. * Yahuarta ruraj Diosca ñucanchijpaj ima alli cashcata allimi yachan. Ñucanchijca chaitami tucui shunguhuan crinchij. ¿Canpish chaita cringuichu?

17. ¿Jehová mandashca shinaca yahuarca imapajtaj carca?

¹⁷ Moisesman cushca leypimi yahuarca imapaj cashcata huillan. Jehová Diosca paita ima shina adorana cashcata huillashpami israelitacunamanca cashna mandarca: ‘Aichapaj causaica yahuarpimi. Yahuartaca cancunapaj almamanta o causaimanta altarpi churanapajmi curcani. Yahuarmi cancunapaj almata o causaitaca quishpichin’ nircami (Levítico 17:11). Israelitacuna  juchapi urmashpaca shuj animalta huañuchishpami, asha yahuartaca altarman apana carca, ña templota rurashca qˈuipaca templomanmi apana carca. Chashnami israelitacunaca juchacunamanta quishpiri tucurcacuna. Yahuarca chaipajmi carca.

18. ¿Jesús paipaj yahuarta jichashcamantaca ima bendicioncunatataj charishun?

¹⁸ Cunanca Moisesman cushca leytaca mana catinchijchu. Chaimantami animalcunata huañuchishpaca, yahuarta altarman mana apanchij (Hebreos 10:1). Shinapish sacrificiocunata rurashpa yahuarta jichanaca, qˈuipata Jesús shamushpa imata rurana cashcatami ricuchirca. Capítulo 5-pi ricushca shinaca, Jesusca ñucanchijta quishpichingapajmi paipaj yahuarta jichashpa huañurca. Huaquin punllacuna qˈuipaca jahua pachaman yaicushpami Jesusca Diospaj ñaupajpi ricurirca. Chaipica paipaj quiquin yahuarta cushpa huiñaipaj quishpichishcatami ricuchirca (Hebreos 9:11, 12).  Chaimantami juchacunamanta quishpirishpa huiñai causaita chari tucunchij (Mateo 20:28; Juan 3:16). Yahuarca quishpichingapaj cashcamantami valishca can (1 Pedro 1:18, 19). Ñucanchijca paipaj yahuarhuan Jesús randishcata crishpallami quishpirishun.

19. ¿“Yahuarmantaca ima juchachina illajmi canchij” ningapajca imatataj rurana canchij?

¹⁹ ¡Cˈuyaj Dios ñucanchijman causaita cushcamantaca diosolopagui ninchijmi! ¿Ima shinataj diosolopagui nishcata ricuchina canchij? Jesús huañushcata crishpaca huiñai causaitami charishun nishpami tucui gentecunaman huillana canchij. Jehová Diospajpish, ñucanchijpajpish causaica valishcami can. Chaimantami cushicushpa huillana canchij (Ezequiel 3:17-21-ta rezai). Tucuicunaman huillashpaca apóstol Pablo shinami ñucanchijpish: “Cancunapaj yahuarmantaca ima juchachina illajmi canchij. Taita Dios imallata munashcataca, mana pacashpami tucuita huillarcani” nishun (Hechos 20:26, 27). Shinashpaca causaipish, yahuarpish valishca cashcata ricuchingapajca tucuicunamanmi Diosmanta, paipaj munaimantapish huillana canchij.