1. ¿Imatataj yachagrinchij?

JESUCRISTOCA Diosta ima shina mañana cashcatami yachachirca. Chai alli mañaipi tiyaj quimsa punta yuyaicunamanta Biblia imata yachachijta ricushun.

2. ¿Jesusca ima quimsa yuyaicunamantataj mañachun yachachirca?

² Chai mañaita callarishpaca Jesusca: “Jahua pachapi caj ñucanchij Yaya, cambaj jucha illaj shutitaca, alli nishca cachun. Can Mandana punlla ña chayamuchun. [Jahua pachapipish, NM], cai pachapipish can munashcata rurachun” nishpami yachachirca (Mateo 6:9-13). ¿Cai quimsa yuyaicunaca imatataj nisha nin?

3. ¿Diospaj Mandanamantaca imatataj yachana canchij?

³ Diospaj shutimantapish, paipaj munai maijan cashcatapish ñami yacharcanchij. Shinapish “Can Mandana chayamuchun” nishpaca ¿Jesusca imatataj nisha nirca? ¿Diospaj Mandanaca imataj can? Diospaj Mandana chayamushpaca ¿ima shinataj Diospaj shutita alli ninga? ¿Ima shinataj Diospaj munaita pajtachinga?

4. a) ¿Diospaj Mandanaca imataj can? b) ¿Diospaj Mandanapica pitaj Rey can?

⁴ Diospaj Mandanaca Jehová churashca shuj gobiernomi  can. Jehovallatajmi paipaj mandanapi mandachun shuj Reyta agllarca. Chai Reyca Jesucristomi can. Jesucristoca cai pachapi tiyaj tucui gobiernocunata yalli allimi can. Paica ‘Mandajcunapajpish Mandaj, Jatun Mandajcunapajpish Jatun Mandajmi’ can (Apocalipsis 17:14). Jesusca allita rurangapajmi tucui gobiernocunatapish yalli achca poderta charin.

5. a) ¿Diospaj Mandanaca maipitaj can? b) ¿Diospaj Mandanaca imatataj mandanga?

⁵ ¿Diospaj Mandanaca maipitaj can? Caita yachangapajca Jesús maipi cashcata yuyarishun. Jesús huañushpa causarishca 40 punllacuna qˈuipaca jahua pachamanmi rirca (Hechos 2:33). Shinashpaca Diospaj Mandanaca jahua pachapimi can. Chaimantami Bibliaca ‘jahua pacha Mandana’ nin (2 Timoteo 4:18). Diospaj Mandanaca jahua pachamantami cai Allpata mandanga (Apocalipsis 11:15-ta rezai).

6, 7. ¿Jesús shina alli Reyca imamantataj ni pi mana tiyan?

⁶ Jesús shina alli Reyca ni pi mana tiyanchu. ¿Imamantataj chashna ninchij? Bibliapi yachachishca shinaca Jesusca manataj huañungachu. Paica ‘huiñaita causai tucujmi’ can (Hebreos 7:16). Chaimantami pai rurashca achca alli ruraicunaca manataj tucuringa.

⁷ Jesusmanta Biblia imata yachachijta ricui: ‘Diospaj espiritumi paipi causanga. Chai espiritumari paimanca alli yuyaita, alli yachaita, yachaj canatapish, mandai tucunatapish cunga. Shinallataj Mandaj Diosta rijsinatapish, paita cazuj canatapishmi cunga. Mandaj Diosta tucui yuyaihuan cazuj canata yachachishpami pushanga. Paica mandanapica mana ñahuita ricushpalla, imatapish ningachu. Ima shina allichina cajpipish, mana shujtajcuna nishcallata uyangachu. Ashtahuanpish mana mitsari tucujcunapajmi cashcata ruranga. Llaquita apacuj huajchacunatami mitsanga.’ (Isaías 11:2-4, QC, 1989.) Cai  shimicunaca gentecunata cˈuyaihuan llaquishpa Jesús mandanatami ricuchin. ¿Jesús canta mandachun munanguichu?

8. ¿Picunataj Jesushuan mandanga?

⁸ Diospaj Mandanamanta ashtahuan yachashun: Jesusca mana paillachu mandanga, paihuanca shujtaj reycunami mandanga. Por ejemplo, apóstol Pabloca Timoteomanca: “Llaquicunatapish apashpaca, paihuanmi mandashun” nircami (2 Timoteo 2:12). Shinashpaca Pablopish, Timoteopish, shinallataj Dios agllashca allita ruraj shujtaj gentecunapishmi Diospaj Mandanapi Jesushuan mandanga. ¿Mashnacunashi Jesushuan mandanga?

9. a) ¿Mashna gentecunataj Jesushuan mandanga? b) ¿Diosca ima punllacunamantataj 144.000-cunataca tandachicushca?

⁹ Capítulo 7-pi ricushca shinaca, apóstol Juanca shuj muscuipi shinami ‘Sión urcu jahuapi o Diospaj Mandanapi Oveja o Jesucristo shayacujta ricurca. Paihuanca 144.000-mi carca. Chaicunaca Ovejapaj shutitapish, paipaj Yayapaj shutitapish, frentepi quillcashcacunami carca’. ¿Chai 144.000-cunaca picunataj can? Juanllatajmi ‘Paicunaca Oveja maita rishcata catijcunami. Paicunaca cai pachapi causajcunapaj chaupimanta randishpa quishpichishcacunami. Diospajpish, Ovejapajpish punta pˈucushca grano shinami’ nirca (Apocalipsis 14:1, 4). Paicunaca Jesús mandashcata tucuita pajtachishcamantami, jahua pachapi Jesushuan mandangapaj agllashcacuna can. Huañushca qˈuipaca jahua pachapi causarishpami Jesushuan ‘cai pachata mandangacuna’ (Apocalipsis 5:10). Apostolcunapaj punllacunamanta, cunancamami Jehová Diosca 144.000-cunata tandachicushca.

10. ¿Jesustapish, 144.000-cunatapish agllashpaca Jehová Diosca ima shinataj cˈuyaita ricuchirca?

¹⁰ Paipaj Mandanapi mandachun Jesustapish, 144.000 gentecunatapish Jehová agllashpaca paipaj cˈuyaitami ricuchishca.  Yuyarishun: Jesusca aichayuj tulluyujmi carca. Chaimantami gentecuna llaquilla causajta entendin. Pablo nishca shinaca: Jesustaca ñucanchijta shinallatajmi umasha nij llaquicuna japirca. Shinapish mana juchayuj tucurcachu (Hebreos 4:15; 5:8). Jesushuan mandagrijcunapish achca llaquicunatami apashca. Paicunapish ñucanchij shinallatajmi juchayuj can, ungüicunapish japishcami. Chaimantami paicunapish gentecunata alli entendin.

11. ¿Jesusca imamantataj paita catijcunataca jahua pachapipish Diospaj munai pajtarichun nishpa mañanguichij nirca?

¹¹ Diospaj Mandana chayamuchun nishca qˈuipaca, Jesusca paita catijcunataca: “Jahua pachapipish, cai pachapipish can munashcata rurachun” nishpa mañanguichij nircami. Jahua pachapica alli angelcunaca siempremi Diospaj munaita rurashca. Shinapish capítulo 3-pi ricushca shinaca, shuj angelca Diospaj munaita ruranata saquishpami Adán, Evata pandachirca. Chai angelca Diablomi can. Capítulo 10-pimi paimanta ashtahuan yachashun. Diablota, paita catij supaicunatapish asha tiempota jahua pachapi causachunmi Jehová Diosca saquirca. Shinashpaca Jesús cai Allpapi cajpica, mana tucuicunachu jahua pachapica Diospaj munaita pajtachicurca. Shinapish Diospaj Mandanapi Jesús mandai callarishpaca Diablohuanmi macanacuna carca (Apocalipsis 12:7-9-ta rezai).

12. ¿Apocalipsis 12:10-pi nishca shinaca ima ishqui ruraicunataj pajtarina carca?

¹² Cai shimicunami ima tucuna cashcata huillan: ‘Chai qˈuipaca cielopica, sinchita caparijtami uyarcani: “Diospaj ñaupajpi ñucanchij huauquicunata punllapish tutapish juchachijtaca o Diablotaca cielomanta ñami shitashca. Chaimanta cunanmari quishpirinapish ñucanchij Diospaj Mandanapish, pailla tucuita rurai tucuj canapish,  Cristo mandai tucunapish ña chayamushca”’ (Apocalipsis 12:10). ¿Cai versopi nishca shinaca ima ishqui ruraicunataj pajtarina carca? 1) Jesucristomi Diospaj Mandanapi mandai callarina carca. 2) Diablotami jahua pachamanta llujshichishpa cai Allpaman shitana carca.

13. ¿Diablota llujshichishpa shitashcamantaca, jahua pachapica ima shinataj causacuncuna?

¹³ ¿Apocalipsis 12:10 pajtarijpica imataj tucurca? Bibliapi ricushun: “Chaimanta cielopish, chaipi causajcunapish cushicuichij” ninmi (Apocalipsis 12:12). Diablota, paita catij supaicunatapish jahua pachamanta llujshichishpa shitajpica, alli angelcunaca achcatami cushicurca. Cunanca jahua pachapica Diosta cazujcunallami cushilla, tandalla causan. Shinashpaca jahua pachapica Diospaj munaica ñami pajtaricun.

14. ¿Diablota cai Allpaman shitashcamantaca ima shinataj causacunchij?

¹⁴ Cunanca cai Allpapi ima tucushcata Bibliapi ricushun: “Allpapi causajcuna, mama cuchapi causajcunaca ¡aij imachari tucunguichij! Diabloca pai munashcata rurana punllacuna ashalla cashcata yachashpami, jatunta pˈiñarishpa cancunapajman uriyashca” ninmi (Apocalipsis 12:12). Jahua pachamanta llujshichishpa shitashcamanta, ashalla punllacunata charishcamantami Diabloca pˈiñarishca can. Pˈiñarishca cashcamantami cai Allpapi causajcunata llaquichicun. Chai llaquicunamantaca catij capitulopimi ashtahuan yachashun. Shinashpaca ¿Diospaj Mandanaca ima shinataj Diospaj munaita cai Allpapi pajtachinga?

15. ¿Diosca imatataj cai Allpa pachahuanca rurasha nin?

¹⁵ ¿Cai Allpa pachahuan Dios imata rurasha nishcata yuyaringuichu? Capítulo 3-pi ricushca shinaca: Jehová Diosca Edén huertata rurashpami, cai Allpa shuj paraíso cachun, jucha illaj gentecuna huiñaita chaipi causachun munarca. Shinapish Adán, Evata Diablo pandachijpica,  Diospaj munaica cai Allpapi ña mana pajtaricurcachu. Shinapish Diosca cai shimicuna pajtarichunmi munan: “Allita rurajcunallami cai llajtapica causangacuna. Ima pandata mana rurajcunallami cai allpamantaca mana chingaringacuna” (Proverbios 2:21). Diospaj Mandanami cai shimicunata pajtachinga. ¿Ima shinashi pajtachinga?

16, 17. ¿Daniel 2:44-pica imatataj Diospaj Mandanamanta yachachin?

¹⁶ Daniel 2:44-pica cashnami nin: “Chai jatun mandajcuna mandacui punllacunapimi, jahua pacha Taita Diosca nunca pi mana chingachina mandanata churanga. Chai mandanataca shujtaj llajtacuna mandachunca manataj saquingachu. Shujtaj mandanacunataca tucuitami ñutushpa chingachinga. Paica manataj chingaringachu.” ¿Cai shimicunaca imatataj yachachin?

¹⁷ Primero, “chai jatun mandajcuna mandacui punllacunapimi” Diospaj Mandanaca mandai callaringa ninmi. Segundo, Diospaj Mandanaca manataj chingaringachu ninmi. Diospaj Mandanataca ni pi mana mishai tucungachu. Tercero, Diospaj Mandanaca chai jatun mandajcunahuanmi macanacunga ninmi. Chaipica Diospaj Mandanami mishanga. Qˈuipaca Diospaj Mandanallami gentecunata mandanga. Gentecunapish cushillami causanga.

18. ¿Cai Allpapi mandajcuna, Diospaj Mandanahuan macanacuitaca ima shinataj shutichin?

¹⁸ Diospaj Mandanaca jatun mandajcunahuanmi macanacunga. Chai macanacuimantaca Bibliaca achcatami yachachin. Macanacuna punlla chayamucujpica, millai supaicunami ‘tucui Allpapi mandajcunata’ llullashpa, ‘Tucuita Rurai Tucuj Diospaj jatun punllapi’ macanacuchun tandachinga. Chai tucui mandajcunataca ‘Hebreo rimaipi Armagedón’ nishcapimi tandachinga (Apocalipsis 16:14, 16). Cai versocunapi ricushca shinaca, cai Allpapi  mandajcunaca Diospaj Mandanahuanmi macanacunga. Chai macanacuitaca Armagedón nishpami shutichin.

19, 20. ¿Diospaj munaica imamantataj cai Allpapica manaraj pajtaricun?

¹⁹ ¿Armagedón macanacui qˈuipaca Diospaj Mandanaca imatataj ruranga? Yuyarishun: Jehová Diosca, cai Allpa shuj paraíso cachun, jucha illaj gentecuna paita servishpa causachunmi munarca. ¿Diospaj munaica imamantataj manaraj pajtaricun? Primero, tucuicunami juchayuj canchij, ungüicunapish, huañuipish japinmi. Shinapish capítulo 5-pi ricushca shinaca, huiñai causaita ñucanchijman cungapajmi Jesusca huañurca. Apóstol Juan nishcata yuyarishun: “Taita Diosca, cai pachapi causajcunata yallitaj cˈuyashpami, paipaj shujlla Churita cacharca. Pipish paita crijca ama chingarishpa, ashtahuanpish huiñai causaita charichunmi cacharca” (Juan 3:16).

²⁰ Segundo, cunan punllacunapica achca gentecunami mana allita ruran. Llullashpa, pandachishpa, huainayashpami causan. Diospaj munaita mana rurasha nincunachu. Shinapish paicunaca Armagedón macanacuipimi tucuringa (Salmo 37:10-ta rezai). Tercero, cai Allpapi mandajcunaca Diospaj munaita rurachunca mana yachachinchu. Achca mandajcunami mana mandai tucun, llaquichijcuna, shuhuacunami can. Chaimantami Bibliaca: “Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” nin (Eclesiastés 8:9).

21. ¿Diospaj Mandanaca ima shinataj Diospaj munaita cai Allpapi pajtachinga?

²¹ Armagedón qˈuipaca Diospaj Mandanallami tucuicunata mandanga. Diospaj munaita pajtachishpami achca bendicioncunata apamunga. Por ejemplo, Diablotaca paipaj supaicunandijmi huaranga huatacama huichcanga (Apocalipsis 20:1-3). Diospaj Mandanami Jesús huañushcamanta achca bendicioncunata cunga. Allita rurajcunaca  ungüicuna illajmi huiñaita causashun (Apocalipsis 22:1-3-ta rezai). Shinallataj cai Allpata shuj paraisota rurashpami Diospaj munaita pajtachinga, Diospaj shutitapish alli ninga. ¿Diospaj shutita alli ninaca imatataj nisha nin? Diospaj shutita jatunyachina nisha ninmi. Diospaj Mandanami tucuicuna chaita rurachun ayudanga.

22. ¿Jesús cai Allpapi cajpi o jahua pachaman rijpi Diospaj Mandana mana mandai callarishcataca ima shinataj yachanchij?

²² “Can Mandana punlla ña chayamuchun” nishpa Jesús yachachijpica Diospaj Mandanaca manaraj mandacurcachu. ¿Jesusca jahua pachaman rishpachu Diospaj Mandanapi mandai callarirca? Mana. Apóstol Pedro, apóstol Pablo nishca shinami, Salmo 110:1-pi caj shimicuna pajtarirca: “Mandaj Diosca ñucata mandajtaca: ‘Quiquinta pˈiñajcunata quiquinpaj chaqui sarunapi churangacama ñuca alli ladopi tiyarilla’ nircami” (Hechos 2:32-35; Hebreos 10:12, 13). Shinashpaca mandai callaringapajca Jesucristoca asha tiempotami shuyana carca.

23. a) ¿Diospaj Mandanaca ima horataj mandai callarirca? b) ¿Catij capitulopica imatataj ricushun?

²³ ¿Jesucristoca mashna tiempotataj shuyana carca? Huata 1870-pimi Bibliamanta alli yachacujcunaca ima huatacama Jesús shuyana cashcata entendircacuna. Paicunaca 1914-pi Diospaj Mandana mandai callarina cashcatami  entendircacuna. (1914-manta ashtahuan yachasha nishpaca páginas 215 a 218-ta ricui.) 1914 huatapi callarishpa ima tucushcata ricushpami Bibliamanta yachacujcuna alli entendishcata yachanchij. Bibliapi tiyaj profeciacuna pajtarishcamantami, 1914-pi Jehová Dios paipaj Mandanapi mandachun Jesusta churashcata entendinchij. Chaimantami cunan punllacunapica Diablopaj ‘ashalla punllacunapi’ causacunchij (Apocalipsis 12:12; Salmo 110:2). Shinallataj Diospaj Mandana, cai Allpapi Diospaj munaita ñalla pajtachina cashcatami yachanchij. ¿Caica manachu shuj alli huillai can? ¿Pajtaringachu? Catij capitulopimi cai yuyaimanta Biblia imata yachachijta ricushun.