1-3. a) ¿Gentecuna huañujpica imatataj tapurinchij? b) ¿Religioncunaca imatataj yachachin?

GENTECUNACA huaranga huaranga huatacunatami chashna tapurishca. Ñucanchijpish maipi causashpapish, maimanta cashpapish chashnallatajmi tapurinchij.

² Capítulo 5-pica Jesús huañushcamanta huiñai causaita chasquina cashcatami yacharcanchij. Shinallataj ‘huañuipish ña mana tiyana’ cashcatami yacharcanchij (Apocalipsis 21:4). Chai shimicuna pajtaringacamaca tucuicunami huañunchij. Rey Salomón nishca shinaca, ‘causacujcunaca huañuna cashcata yachanchijmi’ (Eclesiastés 9:5). Chaimantami causacushparaj tucuita rurasha ninchij. Shinapish ¿huañushpaca imashi tucushun? nishpami tapurinchij.

³ Shuj cˈuyashca familia huañujpica achcatami llaquirinchij. Shinallataj: ¿Huañushpaca imataj tucun? ¿Llaquipichu can? ¿Ñucanchijta ayudanchu? ¿Paita ayudai tucunchijchu? ¿Paita cutin ricushunchu? nishpami tapurinchij. Huaquin religioncunaca, allicunaca jahua pachamanmi rin, mana allicunaca ucu pachamanmi rin nincunami. Shujtaj religioncunaca, huañushcacunaca ñaupa yayacunahuan tandanacunamanmi rin nincunami. Cutin shujtaj religioncunaca, huañushpaca shujtaj cuerpopimi huacharinchij nincunami.

4. ¿Religioncunaca ima yuyaitataj yachachin?

 ⁴ Chˈican chˈican yuyaicunata charishpapish, religioncunaca cai yuyaitami yachachin: cuerpo huañushca qˈuipaca almaca causashpami catin nincunami. Huañushca qˈuipaca uyanchijmi, ricunchijmi, yuyanchijmi nishpami ñaupa religioncunapish, cunan punlla religioncunapish yachachin. ¿Chaica ciertochu can? Mana. Ñucanchijca uma ñutcu alli cajpimi uyanchij, ricunchij. Shinapish huañujpica uma ñutcupish ismushpami tucurin. Uma ñutcu tucurijpica ña mana uyanchijchu, mana ricunchijchu, mana yuyanchijchu.

5, 6. ¿Bibliapi yachachishca shinaca huañushpaca imataj tucunchij?

⁵ Huañushcacuna ima tucushcataca Jehová Diosca allimi yachan. Gentecuna huañushpaca chaipimi tucurin nishpami Bibliapica yachachin. Gentecuna huañushpaca mana ricunchu, mana uyanchu, mana yuyanchu. Ñucanchij cuerpo huañujpica mana ima causashpa catinchu. Huañushca qˈuipa causashpa catij espirituta o almataca mana charinchijchu. *

⁶ Causacujcunaca huañuna cashcata yachanmi nishca qˈuipaca, rey Salomonca “huañushcacunaca ña imata mana yachanchu” nircami. Shinallataj huañushcacunaca mana cˈuyanchu, mana pˈiñanchu. ‘Seolpica imata rurana mana tiyanchu. Imata yuyanapish, imata yachanapish, alli yachaipish mana tiyanchu’ nircami (Eclesiastés 9:5, 6, 10-ta rezai). Shinallataj huañushcamanta parlashpaca, Salmo 146:4-pica: “Chai punllallatajmi pai imata yuyarishcacunapish chingarin” ninmi. Shinashpaca huañushca qˈuipaca mana causashpa catinchijchu. Ñucanchij causaica espelma nina shinami can. Espelma nina huañushpaca mana  maiman rinchu. Ñucanchij causaipish huañujpimi tucurin.

7. ¿Huañuitaca imahuantaj Jesusca chˈimbapurarca?

⁷ Jesusca paipaj amigomanta parlashpami, huañushcacuna ima tucushcata huillarca. Paita catijcunamanca: “Ñucanchij cˈuyashca Lazaroca dormicunmi” nircami. Chashna nijpica Lázaro samaricushcallatami paicunaca yuyarca. Mana entendishcata ricushpami Jesusca: ‘Lazaroca huañushcami’ nirca (Juan 11:11-14-ta rezai). Cai versocunapi ricushca shinaca, huañuitaca dorminahuanmi Jesusca chˈimbapurarca. Lazaroca ni jahua pachaman, ni ucu pachaman mana rishcachu carca. Paipaj ñaupa yayacunahuanpish, angelcunahuanpish mana tandanacunaman rishcachu carca. Shujtaj cuerpopipish mana huacharishcachu carca. Lázaro huañushpaca huañuita dormicuj shinami saquirishca carca. Shujtaj punllapish Jairopaj ushushita causachicushpaca Jesusca: ‘huambraca mana huañushcachu, dormicunllami’ nirca (Lucas 8:52, 53).

8. ¿Jehová Diosca gentecuna ima shina causachuntaj munarca?

⁸ ¿Jehová Diosca gentecuna huañuchun munarcachu? Mana. Ña yachashca shinaca, Diosca paraíso Allpapimi ñucanchij punta yaya mamata churarca. Ungüicuna illaj, cushilla causachunmi munarca. ¿Shuj cˈuyaj yayaca paipaj huahuacuna yuyajyashpa huañuchun munanchu? Mana. Jehová Diospish chashnallatajmi paipaj huahuacunaca cushilla, huiñai huiñaita cai Allpapi causachun munarca. Bibliapi nishca shinaca Diosca “huiñai huiñaita causana munaitami” gentecunapaj shungupi churarca (Eclesiastés 3:11, NM). Chai huiñai  causaita ñucanchijman cungapajmi Jehová Diosca shuj ñanta pascashca.

9. a) ¿Jehová Diosca imatataj Adantaca mandarca? b) ¿Dios mandashcata cazunaca imamantataj mana sinchi carca?

⁹ Shinashpaca ¿imamantataj huañunchij? Chaita yachangapajca punta cˈari, punta huarmi Edén huertapi ima tucushcatami  ricuna canchij. “Taita Diosca chai huertapica, micunanqui tucui laya sumaj granocunata pˈucuj sumaj yuracunatami huiñachirca” (Génesis 2:9). Shinapish Jehová Diosca Adantaca cashnami mandarca: “Cai huertapi tiyaj tucui yuracunapi pˈucushcacunataca micunguilla. Ashtahuanpish huerta chaupipi tiyaj yuraca allita mana allita yachaj chayachijmi. Chai yuramantaca ama micungui. Chai yuramanta micushpaca, chai punllallatajmi huañungui” nircami (Génesis 2:16, 17). Chai mandashcata cazunaca mana sinchichu carca. Edén huertapica achca yuracunami tiyarca. Adán Evaca chai tucui yuracunamanta micunallami carca. Diosta cazushpaca pai tucuita cushcamanta, jucha illaj causaitapish cushcamanta pagui nishcatami ricuchinman carca. Shinallataj paicunata Jehová Dios mandachun munashcata, pailla mandana derechota charishcatami ricuchinman carca.

10, 11. a) ¿Ima shinataj ñucanchij punta yaya mamaca Diosta mana cazurca? b) ¿Diosta mana cazushpaca Adán Evaca imatataj ricuchirca?

¹⁰ Shinapish ñucanchij punta yaya mamaca Jehová Diosta mana cazurcachu. Shuj culebrata parlachishpami Diabloca Evataca: ‘¿Taita Dioschu, cai huertapi tiyaj yuracunamantaca ama micunguichij nirca?’ nishpa tapurca. Chashna nijpimi Evaca: ‘Huertapi tiyaj yuracunapi pˈucushca granocunataca micui tucunchijmi. Ashtahuanpish Taita Diosca: Cancuna ama huañungapajca, huerta chaupipi tiyaj yurapi pˈucushcataca amataj micunguichij, amataj tuparinguichijchu nircami’ nishpa cutichirca (Génesis 3:1-3).

¹¹ Cutin Diabloca “mana huañunguichijchu. Ashtahuanpish chai yuramanta micushpaca cancunapaj ñahuicuna pascarijpi Taita Dios shina tucunata, allitapish, mana allitapish yachaj tucuna cashcatamari Taita Diosca yachan” nircami (Génesis 3:4, 5). Chai yuramanta micunallamari cangui nishpami Diabloca Evata crichirca. Micushpaca canllatajmi allitapish, mana allitapish agllangui, can munashcatami rurangui nircami. Shinallataj “mana  huañunguichijchu” nishpaca Diosca llullacunmi nircami. Evaca Diablota crishpami yurapi pˈucushcata micurca. Qˈuipaca paipaj cusaman carajpimi cusapish micurca. ¿Paicunaca mana yachashcamantachu micurca? Mana. Jehová imata mandashcataca allimi yacharcacuna. Yurapi pˈucushcata micushpami, paicunapaj munaimanta Diosta mana cazurcacuna. Chashnami paicunaca Dios mandachun mana munashcata ricuchirca. ¡Jatun juchapimi urmarcacuna!

12. Shuj chˈimbapuraita rurashpa, Adán Eva mana cazujpi Jehová ima shina sintirishcata parlai.

¹² Shuj chˈimbapuraita rurashun: Cambaj churita huiñachishpa, cuidashpa charijpipish, canta mana cazushpa, cˈariyashpa  causajpica, ¿manachu achcata llaquiringuiman? Ari. Shinallataj ¿Adán Eva mana cazujpica ima shinashi Jehová Diosca sintirirca?

13. ¿Jehová Dios nishca shinaca Adán huañushpaca imataj tucurca?

¹³ ¿Adán Eva mana cazujpica Jehová Diosca causashpa catichun saquircachu? Mana. Paicunaca Jehová nishca shinami huañurcacuna. Huañushpaca mana espíritu shina shujtaj ladopi causanaman rircacunachu. Adán imamanta mana cazushcata tapushca qˈuipaca Jehová Diosca cashnami nirca: ‘Canca allpamanta rurashcami cangui. Ñutu allpamanta cashcamantaca ñutu allpallatajmi tucungui’ nircami (Génesis 3:19). Diosca allpamantami Adantaca rurarca (Génesis 2:7). Allpamanta manaraj rurajpica Adanca mana shujtaj ladopi causacurcachu. Allpallatajmi tucungui nishpaca, paipaj causai tucurina cashcatami ricuchirca. Chashnami Adanca allpa shina causai illaj saquirina carca.

14. ¿Imamantataj huañunchij?

¹⁴ Diosta cazushca cashpaca Adán Evaca cunancamami causacunman carca. Shinapish mana cazushpa juchapi urmashcamantami huañurcacuna. Ñucanchijpish Adanpaj huahua huahuacuna cashcamantami juchayuj canchij, huañuipish japin (Romanos 5:12-ta rezai). Adanpaj juchaca millai ungüi shinami can. Chai millai ungüita tucuicuna charishcamantami huañunchij. Huañuica ñucanchijta pˈiñaj enemigomi can (1 Corintios 15:26). Chai enemigomanta ñucanchijta quishpichingapajmi Jehová Diosca paipaj Churipaj causaita curca. Chaimantami ¡pagui nina canchij!

15. ¿Huañushcacuna ima tucushcata yachashpaca ima shinataj sintirinchij?

¹⁵ Huañushcacuna ima tucushcata Bibliapi yachashpaca allimi sintirinchij. Ima shinami ña yachashcanchij:  huañushcacunaca mana llaquita apacunchu, ñucanchijta mana ayudai tucunchu, ñucanchijpish paicunata mana ayudai tucunchijchu, shinallataj paicunahuan mana parlanacui tucunchijchu, huañushcacunaca ñucanchijta mana llaquichi tucunchu, chaimanta mana manchanachu canchij. Shujtaj religioncunapica huañushcacunata ayudai tucunchijmi nincunami. Chaita crishpami gentecunaca paicunaman cullquita cun. Shinapish ñucanchijca Biblia imata yachachishcata alli yachashcamantami chai llullacunata mana crinchij.

16. a) ¿Achca religioncunaca pi yachachishcatataj catincuna? b) ¿Diabloca ima shinataj religioncunata pandachishca?

¹⁶ ¿Cambaj religionca Biblia yachachishcata catinchu? Achca religioncunaca Diablo yachachishcata catishcamantami, Biblia yachachishcataca mana catincuna. Diablo pandachijpimi religioncunaca gentecunata crichishpa yachachin. Huañushpaca espíritu tucushpami shujtaj ladopi causanaman rinchij nincunami. Cai laya shujtaj llullacunatapish yachachishpami Diabloca Jehová Diosmanta gentecunata caruyachisha nin. ¿Ima shinataj Diosmanta caruyachin?

17. ¿Gentecunaca ucu pachapimi rupacun nishpaca ima shinataj Jehová Diosta cˈamincuna?

¹⁷ Ima shinami ña yacharcanchij: achca religioncunami mana allicunaca huiñai huiñaitami ucu pachapi rupangacuna nin. Chashna yachachishpaca Jehová Diosta cˈamishpami juchachincuna. Ñucanchijta cˈuyaj Yaya Diosca manataj chashna llaquichinchu (1 Juan 4:8-ta rezai). Shuj chˈimbapuraita rurashun: Shuj runaca paipaj churi mana cazushcamantami churipaj maquicunata ninapi rupachin. ¿Chai runata respetanguimanchu, rijsisha ninguimanchu? Mana. Millai runami can ninguimanmi. Satanasca chashnallatajmi Jehová Diosta juchachishca. Diosca millaimi can, gentecunataca huiñai huiñaitami ninapi llaquichin nishpami ñucanchijta crichisha nin.

18. ¿Imamantataj huaquin gentecunaca panteoncunaman micunata apan, huañushcacunamantapish Diosta mañachun pagancuna?

 ¹⁸ Diablo yuyachijpimi huaquin religioncunaca, huañushcacunaca espiritumi tucun, chaimantami paicunata respetana, ayudana canchij nincuna. Chashna yachachishpaca, huañushcacunataca cushichinami canchij, mana cashpaca pˈiñachishunmi nincunami. Chai llullata crishpami achca gentecunaca panteoncunaman micunata apan, huañushcacunamantapish Diosta mañachun pagancuna. Shinapish Bibliapica huañushcacunaca dormicunmi, ñucanchijca Jehová Diosllatami adorana canchij nishpami yachachin (Apocalipsis 4:11).

19. ¿Huañushcacuna ima tucushcata yachashpaca imatataj alli entendinchij?

¹⁹ Huañushcacuna ima tucushcata Bibliapi ña yachashcamantami, panda religioncunaca ñucanchijta ña mana pandachi tucun. Shinallataj paraíso Allpapi huiñai huiñaita causana cashcatami alli entendinchij. Huañushcacuna mana shujtaj ladopi espíritu shina causacushcata entendishpaca, paraíso Allpapi causana cashcatami tucui shunguhuan crinchij.

20. ¿Catij capitulopica ima tapuitataj cutichishun?

²⁰ Achca huatacuna huashamanmi Diosta alli servij Jobca: ‘¿Runa huañushpaca cutin causaringachu?’ nirca (Job 14:14). Shinashpaca ¿huañushpa dormicujcunaca causaringachu? Cai alli tapuitaca catij capitulopimi Bibliahuan cutichishun.