1-3. a) ¿Imataj pˈiñaj runa shina ñucanchijta caticun? b) ¿Biblia imata yachachishcata entendishpaca ima shinataj sintirinchij?

CANTA yalli achca fuerzayuj, pˈiñaj runa callpashpa canta caticushcata yuyai. Canta japishpaca huañuchisha ninmi. Chai pˈiñaj runaca cambaj tauca amigocunatami ña huañuchishca. Utca callpajpipish chai pˈiñaj runaca canta llaquichingapajmi ña japigrin. Chashna llaquipi cajpica, canta ayudangapajmi ñapish shujtaj runa ricurin. Paica chai pˈiñaj runata yalli achca poderta charishcamantami canta ayudasha nin. ¡Chaimantami achcata cushicungui!

² Shuj pˈiñaj runa tucuicunata caticuj shinami causanchij. Capítulo 6-pi ricushca shinaca, huañuica shuj pˈiñaj enemigomi can. Huañuimantaca ni pi mana quishpiri tucunchijchu. ¿Cambaj cˈuyashca familia o amigo huañushcachu? Jehová Diosca huañuita yalli achca podertami charin. Paillami huañuimanta ñucanchijta quishpichi tucun. Huañuita ima shina mishanataca ñami ricuchishca. Bibliaca huañui tucurina cashcata parlashpami: ‘Tucui pˈiñajcunapaj qˈuipa chingachishca cana pˈiñajca, huañuimi’ nin (1 Corintios 15:26). ¡Caita yachashpaca achcatami cushicunchij!

 ³ Chai pˈiñaj enemigoca achcatami llaquichishca. Chaimantami huañushcacunata Jehová Dios causachisha nishcata yachashpaca achcata cushicunchij (Isaías 26:19). Chai sumaj yuyaitami Bibliaca yachachin.

4. a) ¿Paipaj amigo huañujpi Jesús ima shina sintirishcata yachashpaca, imatataj Jehová Diosmanta yachanchij? b) ¿Jesusca picunahuantaj alli apanacuj carca?

⁴ ¿Cambaj cˈuyashca familia o amigo huañushcachu? Ama huañuchun imata mana rurai tucushcamantami llaquilla sintirinchij. Chai llaquita chˈimbapuracushpaca, Diospaj Shimihuan cushichichunmi minishtinchij (2 Corintios 1:3, 4-ta rezai). Bibliapica Jehová Diospish, Jesuspish gentecuna huañujpi ima shina sintirishcatami yachachin. Paipaj amigo huañujpi Jesús ima shina sintirishcatami Bibliaca ricuchin. Chashnami Yaya Dios ima shina sintirishcata yachanchij (Juan 14:9). Jesús Jerusalenman rishpaca, Betania llajtapi causaj Lazarota, paipaj panicunatapishmi ricunaman rij carca. Paicunahuan alli apanacushcamantami Bibliaca “Jesusca Lazarotapish, Martatapish, Mariatapish cˈuyarcami” nin (Juan 11:5). Shinapish capítulo 6-pi ricushca shinaca, Lazaroca huañurcami.

5, 6. a) ¿Lázaro huañushcamanta familiacuna, amigocuna huacacujta ricushpaca Jesusca ima shinataj sintirirca? b) ¿Jesús yallitaj llaquirishcata yachashpaca imatataj entendinchij?

⁵ ¿Paipaj amigo huañujpica Jesusca ima shinataj sintirirca? Bibliapi nishca shinaca Lazaropaj familiapish, amigocunapish huacacujta ricushpaca ‘Jesuspish yallitajmi llaquirirca’. Qˈuipaca “huacarcami” (Juan 11:33, 35). ¿Imamantataj chashna llaquirirca? ¿Manachu imata rurai tucurca? Jesusca ñallami shuj sumaj milagrota ruragrirca (Juan 11:3, 4). Shinapish Lázaro huañujpi gentecuna llaquilla sintirishcata ricushpami, Jesusca yallitaj llaquirirca.

⁶ Jesús yallitaj llaquirishcata yachanaca achcatami  ayudan. Yaya Diospish, Jesuspish huañuita pˈiñashcatami entendinchij. Shinallataj Jehová Diosca huañuita tucuchingapajmi poderta charin. Diospaj poderhuan shuj milagrota Jesús rurashcata ricushun.

7, 8. a) ¿Lázaro huañujpica gentecunaca imatataj yuyarca? b) ¿Jesusca imatataj rurarca?

⁷ Lazarotaca shuj jutcupimi churashcacuna carca. Chai jutcuta tapacuj “rumita anchuchichij” nishpami Jesusca mandarca. Shina nijpimi Martaca, “ñamari chuscu punlla, ashnacungamari” nirca (Juan 11:39). Gentecunapaj ñahuipica imata mana rurai tucuipaj shinami ricurirca.

⁸ Rumita anchuchijpica, Jesusca sinchita caparishpami: ‘¡Lázaro, llujshimui!’ nirca. Shina nijpica ¿imataj tucurca? ‘Chai huañushcaca llujshimurcami’ (Juan 11:43, 44). ¿Chaita ricujcunaca ima shinashi sintirirca? Lazaropaj panicuna, familiacuna, amigocuna, vecinocunapish pai huañushcataca allimi yacharcacuna. Shinapish cunanca cutinmi paicunapaj ladopi carca. Chaita crina sinchi ricurijpipish cushicushpami ugllarishpa chasquircacuna. ¡Huañuica mana misharcachu!

9, 10. a) ¿Lazarota pi causachishcata ricuchingapajca Jesusca imatataj rurarca? b) ¿Causarishcacunamanta Bibliapi rezanaca imamantataj sumaj can?

⁹ Lazarota manaraj causachishpaca Jesusca Jehová Diostami mañarca (Juan 11:41, 42-ta rezai). Chashnami Jesusca Lazarota mana pailla causachishcata, ashtahuanpish Jehová causachishcata ricuchirca. Jehová Diosca mana chai cutinllachu gentecunata causachirca. Bibliapica 9 gentecunata causachishcatami yachachin. * Chai versocunata rezashpa yachanaca sumajmi can. Jehová Diosca mana  ñahuita ricushpallachu causachishca: jovencunata, yuyajcunata, cˈari o huarmi cajpi, israelita o shujtaj llajtamanta cajpipish causachishcami. ¡Causarishcacunata ricujcunaca cushillami sintirishca! Por ejemplo, shuj huarmi huambrata Jesús causachijpica paipaj yaya mamaca ‘mancharishcami’ saquirirca (Marcos 5:42). Chaipipish Jehová Diosmi paicunapaj ushushita causachishpa cushichirca.

¹⁰ Jesús causachishca gentecunaca cutinmi huañurca. Shinashpaca ¿Jesusca yangamantachu causachirca? Mana. Chai milagrocunaca Biblia yachachishcata alli entendingapaj, esperanzatapish charingapajmi ayudan.

11. ¿Lazaromanta yachashpaca ima shinataj Eclesiastés 9:5-ta ashtahuan entendinchij?

¹¹ Bibliapica “huañushcacunaca ña imata mana yachanchu” ninmi (Eclesiastés 9:5). Huañushcacunaca mana shujtaj ladopi causanchu, imata mana yuyanchu. Por ejemplo, Lázaro causarishpaca ¿jahua pacha ima shina cashcata parlashpa cushichircachu? ¿Ucu pacha ima shina cashcata parlashpa manchachircachu? Mana. Bibliapica mana chaita yachachinchu. Chuscu punllata huañushca cashpaca Lazaroca ‘imata mana yacharcachu’. Paica huañushpami dormicuj shina saquirirca (Juan 11:11).

12. ¿Imamantataj Lázaro causarishcata crinchij?

¹² Lázaro causarishcata yachashpaca gentecuna causarinataj cashcatami entendinchij. Jesusca achca gentecunapaj ñaupajpimi Lazarota causachirca. Chaimantami Jesusta pˈiñajcunapish mana imata ni tucushpa: “Cai runaca pi mana rurai tucuipajtamari achcata ruracun ¿imatataj rurashunri?” nircacuna (Juan 11:47). Achcacunami Lázaro causarishcata ricunaman rirca. Chaita ricushpami Jesuspi crircacuna. Shinallataj Jesustaca Dios cachashcatami entendircacuna. Religionta pushaj huaquin millai judiocunapish chaita entendishpami  Jesusta, Lazarota ima shina huañuchinata yuyarcacuna (Juan 11:53; 12:9-11).

13. ¿Huañushcacunata Jehová causachinataca imamantataj crinchij?

¹³ ¿Huañushcacuna causarinata crinachu canchij? Ari, Jesús yachachishca shinaca ‘tucui pambashcacunami’ causaringa (Juan 5:28). Jehová Diosca causaita cuj Diosmi can. ¿Manachu huañushcacunaman cutin causaita cui tucun? ¿Ñucanchij cˈuyashca familiata, amigocunata cungarishcachu? ¿Paica tucui huañushcacunata yuyarinchu? Caita yuyai: Cielopica huaranga huaranga luzerocunami tiyan. Jehová Diosca cada luzeropaj shutitami yachan (Isaías 40:26). Shinallataj huañushcacunataca cada uno ima shina cashcatami yuyarin. Paicunataca causachishataj ninmi.

14, 15. ¿Job nishca shinaca Jehová Diosca ima munaitataj charin?

¹⁴ ¿Jehová Diosca huañushcacunata causachisha ninchu? Biblia yachachishca shinaca paica causachina munaitami charin. Diosta servij Jobca: ‘¿Runa huañushpaca, cutin causaringachu?’ nishpami tapurca. Paita pambashca puestopi Dios yuyaringacama shuyasha nishpami: ‘Ñucata cayajpica, ñucaca cutichishami. Cambaj maquihuan rurashcataca cˈuyanguimi’ nirca (Job 14:13-15). Cai versopi “cˈuyanguimi” nishpaca hebreo shimipica, cutin ricuna munaita charinatami nisha nin.

¹⁵ Jehová Diosca huañushcacunata cutin ricuna munaitami charin. ¡Huañushcacunata pai causachina munaita charishcata yachashpaca achcatami cushicunchij! Shinapish ¿picunataj causaringa? ¿maipitaj causaringacuna?

16. ¿Huañushcacuna causarishpaca ima shinataj causanga?

¹⁶ Huañushcacuna causarishpaca cai pachapimi paicunapaj familiahuan tandanacurca. Ñaupa punllacunapi gentecuna causarishcata Bibliapi yachashpaca, shamuj punllacunapi ima tucunatami entendinchij. Shamuj punllacunapi causarijcunaca ashtahuan sumajtami causangacuna.  Capítulo 3-pi ricushca shinaca, Diosca cai Allpatami shuj paraisota ruranga. Shinashpaca huañushcacunaca macanacuicuna, ungüicuna, llaquicuna tucurijpimi causaringa. Paicunaca huiñai huiñaitami cushilla causai tucungacuna.

17. ¿Mashna gentecunataj causaringa?

¹⁷ ¿Picunataj causaringa? Jesús yachachishca shinaca Diospaj yuyaipi caj tucui huañushcacunami causaringa (Juan 5:28, 29). Shinallataj Apocalipsis 20:13-pica: ‘Mama cuchapish, huañuipish, Hadespish paicunapi caj huañushcacunata tigrachircami’ ninmi. (Hades imata nisha nishcata yachangapajca páginas 212 y 213-ta ricui.) Huaranga huaranga gentecuna causarijpica Hadesca chushajllami saquiringa. Apóstol Pablo nishca shinaca: ‘Cashcata rurajcunatapish, mana cashcata rurajcunatapishmi Taita Diosca causachinga’ (Hechos 24:15). ¿Cai versoca imatataj nisha nin?

18. a) ¿“Cashcata rurajcunaca” picunataj can? b) ¿Huañushcacuna causarinata yachashpaca ima shinataj sintiringui?

¹⁸ “Cashcata rurajcunaca” Jesús manaraj shamujpi cai Allpapi Diosta servishpa causajcunami can. Por ejemplo: Noé, Abrahán, Sara, Moisés, Rut, Ester, shujtajcunapish. Hebreos capítulo 11-pica, cashcata ruraj tauca cˈari, huarmicunamantami parlan. Shinallataj “cashcata rurajcunaca” cunan punllacunapi huañungacama Jehová Diosta servijcunami can. Huañushcacuna causarinata yachashpaca, huañunataca mana manchanchijchu (Hebreos 2:15).

19. a) ¿“Mana cashcata rurajcunaca” picunataj can? b) ¿Paicunaca imatataj ruranga?

¹⁹ Shinapish huaranga huaranga gentecunami Jehová Diosta mana rijsi tucushca. Chaimantami paita mana servishca, pai munashcatapish mana rurashca. Paicunami “mana cashcata rurajcuna” can. ¿Paicunaca imashi tucunga? Jehová Diosca mana cungarishpami paicunata causachinga. Chaipimi paimanta yachachun, paita servichun  tiempota cunga. Huaranga huatacunapimi huañushcacunaca causaringa. Causarishpaca cai Allpapi Diosta servijcunahuanmi paicunapish Diosta servingacuna. Chai punllacunaca sumajmi canga. Chai punllacunataca Bibliaca Juicio Punlla ninmi. *

20. a) ¿Gehenaca imataj can? b) ¿Chaipica picunataj can?

²⁰ Shinashpaca ¿tucui huañushcacunachu causaringa? Mana. Biblia yachachishca shinaca huaquincunaca Gehenapimi can. Huaquin Bibliacunapica ‘ucu pacha’ ninmi (Lucas 12:5). Gehenaca ñaupa Jerusalén llajta canllapi basurata, huañushcacunata rupachina pambami carca. ¿Judiocunaca picunatataj Gehenapi shitaj carca? Millaita rurashcamanta mana pambashcacunatami, mana causarinachu can nishpa chaipi shitajcuna carca. Shinashpaca Gehenaca huiñai huiñaita tucuchishca canata ricuchij shutimi can. Jesusmi maijancuna causarina cashcata ricunga. Shinapish Jehová Diosmi jatun Juez can (Hechos 10:42). Paica millaita rurashpa mana cambiasha nijcunataca manataj causachingachu.

21, 22. a) ¿Huaquincunaca maipi causangapajtaj causaringa? b) ¿Pitaj puntapica espíritu shina causarirca?

²¹ Bibliapi yachachishca shinaca, huaquincunaca jahua pachapi causangapajmi espíritu shina causaringa. Bibliapica Jesuslla chashna causarishcatami yachachin.

²² Jesustaca runa aichayuj cajpimi huañuchircacuna. Shinapish Jehová Diosca paipaj Churitaca mana Seolpi saquircachu (Salmo 16:10; Hechos 13:34, 35). Causachircami, pero mana runa aichayujta shinachu causachirca. Apóstol Pedro nishca shinaca, Cristoca ‘aichapica huañurcami, ashtahuanpish espiritupica causachishcami carca’ (1 Pedro 3:18). ¡Jatun milagromi carca! Jesusca cutinmi achca poderta charij espíritu carca (1 Corintios 15:3-6-ta rezai).  Jesusmi puntapica jahua pachapi causangapaj causarirca. Shinapish mana paillachu chashna causarina carca (Juan 3:13).

23, 24. ¿“Ashalla ovejacunaca” picunataj can, mashnacunataj can?

²³ Jesusca jahua pachaman tigrana cashcata yachashpami, paita catijcunataca “cancuna causanata allichingapajmi rigrini” nirca (Juan 14:2). Jahua pachapi causagrijcunataca ‘ashalla ovejacuna’ nircami (Lucas 12:32). ¿Ashalla ovejacunaca mashnacunataj can? Apóstol Juanca, ‘Sión urcu jahuapi Oveja o Jesús shayacujtami ricurcani. Paihuanca, 144.000-mi carca. Chaicunaca Ovejapaj shutitapish, paipaj Yayapaj shutitapish frentepi quillcashcacunami carca’ nircami (Apocalipsis 14:1).

²⁴ Chai 144.000 gentecunapurapica apostolcunapishmi can. Paicunatami Jehová Diosca jahua pachapi causachun causachinga. ¿Ima horashi chaita ruranga? Apóstol Pablo nishca shinaca ‘Jesús shamuna’ punllapimi chaita ruranga (1 Corintios 15:23). Griego shimipi, “Jesús shamuna” nishpaca, apóstol Pabloca Jesús mandana punllamantami parlacurca. Cunan punllacunapimi Jesús mandana punllapi causacunchij. Chaitaca capítulo 9-pimi ashtahuan yachashun. Cunanca 144.000 gentecunapuramantaca ashacunallami cai pachapi causacun. Paicuna huañushpaca ñahuita sipushpa pascaj shinallami jahua pachapi causarincuna (1 Corintios 15:51-55). Shinapish achca huaranga huaranga gentecunami, cai Allpa shuj paraíso tucujpi chaipi causangapaj causaringacuna.

25. ¿Catij capitulopica imatataj yachashun?

²⁵ Ñucanchijta pˈiñaj enemigotaca Jehová Diosca huiñaipajmi tucuchinga (Isaías 25:8-ta rezai). Chaitaca tucui shunguhuanmi crina canchij. Shinapish ¿jahua pachapi causagrijcunaca imatashi ruragrin? Paicunaca Diospaj Mandanapimi Jesushuan mandanga. Catij capitulopimi Diospaj Mandanamanta ashtahuan yachashun.